Kun sin-o man ang propagandista sang kontra, madinalag-on ini sa pag-demonize ukon pagpaggwa kay Mayor Jose Espinosa III nga malain sa ti-on sang Dinagyang Festival bangud sa indi pag-agda kay Cong. Jerry Treñas sa kahiwatan.
Nagmadinalag-on gid sila sa pagpinta sang malain nga imahen ni Joe III sa mata sang publiko.
Matuod may sala ang alkalde sa indi pag-imbitar sa kongresista nga iya man lang bilas kag anay kaalyado sa politika sa programa sang Dinagyang. Indi malipod nga nagsugod sa pagdako ang festival sang panahon ni Treñas nga amo ang una nga nagaduso sang public private partnership ukon PPP. Kuntani bisan sa sini lang nga bagay, gin-imbitar man ang kongresista.
Apang sa sitwasyon sang ila habuyanay sang lunang sang bayaw, sa ila insultuhanay sa publiko kag sa media, makadto man ayhan si Treñas kun imbitaron ni Espinosa?
Sigurado ako indi. Man mabudlayan sila nga mag-akto nga okay lang sila bisan sa ila utok daw halos hamakan sang ila inumol ang tagsa-tagsa.
Bisan gin-imbitar, indi man magkadto si Treñas bangud sang away personal kag politika nila nga magbilas. Sa kapaslawan ni Joe III nga imbitaron si manong nya Jerry, nagwa nga malain ang batasan sang alkalde.
***
Matapos ang Dinagyang 2019, ang basura sa syudad nagdagsa man. Bisan ang mga tanom, halos nagkapalatay bangud ginlasak lang sang mga tumalan-aw.
Indi ini kahimuan ni Mayor Joe III apang sya gihapon ang ginabasol. Wala kuno sang plano, kulang sa kampanya kag koordinasyon kag nagdinamak ang syudad sang si Espinosa ang alkalde.
Pero anay ka, sin-o bala ang nagahaboy sang basura? Sin-o bala ang nagapangihi bisan diin lang? Sin-o bala ang naglasak sang mga tanom?
Kamo, indi man si Joe III!
Pero ngaa si Joe III ang ginabasul? Ngaa ang syudad ang ginamolay?
Mabudlay man nga ang inyo kadamak, ibasol nyo sa gobyerno. Kun tanan kita nagatipon sang atun basura, sigurado mabuhinan ang trabaho sang gobyerno.
***
Madamo ang nagasiling nga daw waiting shed kuno ang Iloilo grandstand. Mahal kuno sa balor nga P45 million ang proyekto.
Pero nakahibalo ayhan sila nga wala pa ina matapos? Ginhingagaw lang ini agud may maggamit sa Dinagyang Festival.
Mabudlay sa politiko kag netizens kay sila na ang engineer, sila pa ang architect. Budlay sa tawo kay sige kumento nga wala man sang ihibalo. Basta lang masakyan sang politika ang isyu./PN
