NAGAPABILIN nga may pagduda sa paminsaron sang mga Ilonggo kun bala wala gid man sang may matabo nga power blackout sa ti-on nga indi ma-renew ang franchise sang Panay Eelectric Company (PECO) kag madayun ang pagpasar sang franchise sang MORE Power.
Ini bangud tubtob sa karon wala nakapalapit sa publiko ang pamunuan sang MORE Power. Tanan nga paathag nga nabati-an gikan sa MORE natabu sa ila presentasyon sa konseho.
Bisan ang mga katapo sang media may mga palamangkutanon man kun bala doable ukon masarangan bala nga mahimo sang MORE Power ang ila pangako.
Sa tagsa ka may nagapamangkot sang ikasangkol sang MORE Power ila ginakapital sa sabat ang kadakuon sang ila ginpain nga pondo sa bangko. Siling sang ila mga tiglawas may kwarta ang MORE Power para diri. Ang pamangkot diri, masarangan bala sang kwarta nga mapadalagan ang kuryente kun wala ka sang pasildad? Kinahanglan sang MORE ang infrastructure sang PECO agud maka-distribute sang kuryente sa syudad sang Iloilo.
Sa mga interview naghatag sang pasalig ang pamunuan sang PECO nga maga-cooperate sila sa MORE para sa matalunsay nga transisyon sa masunod nga duha ka tuig. Ini bangud nga ginpagkit mismo sa franchise bill sang MORE nga dapat may duha ka tuig nga extension ang PECO agud may matalunsay nga transisyon.
Pero sigurado kita nga indi lang pag-ihatag sang mahapos sang PECO ang ila negosyo. Bisan nga may kasuguan nga mahimo makuha ini sang gobyerno para sa kaayuhan sang publiko, mangita man sigurado sang lusot ang PECO agud madepensahan ang ila palangabuhian.
Sa naggwa nga balita sa isa ka nasyonal nga pamantalaan, ginsiling nga nagapamatok ang katapo sang city council sa pagsulod sang MORE Power sa syudad. Sala ini nga pagpati.
Sa ti-on sang deliberasyon wala nagsiling ang mga konsehal nga indi sila sa MORE. Ang ila siling, madamo sang mga ginpresentar ang MORE nga daw mabudlay matuman. May mga data sila nga ginpresentar nga sang gin-double check sang isa sa mga konsehal, indi man matuod.
Tanan nga palamangkutanon sang mga konsehal nasentro sa kasiguraduhan kun may matabo nga blackout ukon wala. Buot hambalon may duda sila kun matuman sang MORE ang ila pangako. Siling gani ni Councilor Eley Estante, “Mabakal na lang ako nga daan sang generator.” Nagakahulugan nga wala nakumbinser sang MORE ang konsehal.
Kun duda ang mga konsehal nga may mas masangkad nga kinaalam kag paghangop, paano na lang ang mga ordinaryo mga pumuluyo?
Madamo pa sang dapat ipaathag ang MORE Power. Indi lang sa media, sa politiko, kundi labaw sa tanan sa mga konsumidor! (jpranco1975@gmail.com/PN)
