KAANGAY sang daludo sang tubig nga hilway nga naga-ilig ang kaalwan nga ginpakita sang mga pumuluyo sa primer distrito sang probinsya sang Iloilo.
Boluntaryo nga nagbalikid kag nagtan-ay sang bulig ang kada isa sa ila isig-kapareho. Nagpangibabaw ang duna nga kaalwan sang mga Ilonggo.
Pinasahi kag halandumon ang Enero 22 nga gindeklarar bilang Oca Garin Day ukon Kindness Day sa primer distrito sang Iloilo paagi sa Provincial Ordinance No. 2022-265 nga may tigulo “An Ordinance Declaring January 22 of Every Year as Oscar “Oca” Garin Day in the First District of Iloilo.”
Ang kada banwa sa primer distrito nagpasar sang ila kaugalingon nga municipal ordinance para sa sini nga katuyuan nga gintipon kag ginbasehan sa pagpasar sang provincial ordinance.
Ang mayor nga katuyuan sini nga dumdumon ang legasiya sang kaalwan nga ginpakita ni Mayor Oca Garin sa mga pumuluyo sa bug-os nga primer distrito. Ang pagdumdom sa iya kaadlawan amo man ang pagdumdom sa iya indi matakus nga kaalwan.
Nabantugan na kag masami na nga ginadumdom sang tanan ang iya tinaga nga “Do not only repay kindness, pass it on.” Nangin salandigan ini sang pagbinuligay sang kada isa agud nga matib-ong ang isig-kapareho nga makatibawas sa kapigaduhon. Ang iya nabuligan ginapanugyanan sini nga magbulig man sa iban kag indi na kinahanglan nga balikan ang iya gintan-ay nga kaalwan. Sa sini nga konsepto, mas madamo ang nakatibawas, mas madamo ang nag-ayuhan, mas madamo ang nakatigayon nga malab-ot ang ila handom.
Gindumdom ang Enero 22 bangud iya ini nga kaadlawan kag agud nga mapat-inan ang kalendaryo nga angay isaulog sa sini nga adlaw ang kaalwan nga iya ginpakita, ginpabatyag kag ginpatudok sa mga pumuluyo.
Nabun-ag sadtong Enero 22, 1941 sa Guimbal, Iloilo si anay Guimbal Mayor Oscar ‘Oca’ Garin sa iya ginikanan nga sanday Ricardo Grajales Garin, Sr. kag Purificacion Gencianeo Gemarino.
Nag-umpisa si Mayor Oca Garin sang iya professional career bilang Junior Civil Engineer, Acting Associate Engineer, nangin Associate Engineer sa Public Works and Highways (DPWH) umpisa 1969 tubtub 1973 kag pagkatapos sina nangin private civil works contractor. Nangin Ex-Officio Member sang Sangguniang Panlalawigan ng Iloilo, nga nagtiglawas sa Association of Barangay Captains (ABC) umpisa Agosto 1981 tubtub Mayo 1982, nagserbe bilang katapo sang House of Representatives sa 8th, 9th, 10th kag 12th Congress bilang tiglawas sang 1st District of Iloilo, kag nangin katapo sang House contingent sa gamhanan nga Commission on Appointments umpisa 1992 tubtub 1998. Nangin Presidential Assistant umpisa 2005 tubtub 2006 kag Administrator sang Philippine Coconut Authority umpisa 2006 tubtub 2011. Sadtong 2014, ginhatagan siya sang Alumni Achievement Award for Government and Public Service sang University of San Agustin. Nangin Municipal Mayor sang Guimbal, Iloilo umpisa Hunyo 2016 tubtub sa iya wala ginlauman nga pagtaliwan sadtong Setyembre 26, 2021.
Si Mayor Oca Garin ang pinakauna nga kongresman sang First District of Iloilo matapos nga nangin epektibo ang Local Government Code of 1991.
Nangin passionate advocate sang agrikultura si Mayor Oca Garin. Gintukod sini ang AAMBIS-OWA Party List nga sa nakalipas nga 11 ka tuig tuman ka daku ang kontribusyon sa ikaayo sang mga Ilonggo kag mga mangunguma nga Filipino. Sa nakalipas nga mga tuig, nangin host man siya sang ‘Owa Mangunguma’ nga isa ka radio program kada Domingo sang gab-i nga nagagiya sa mga mangunguma kag iban pa nga tagpalamati tuhoy sa natural farming kag livestock caring. Tagpasad man siya sang Guimbal BWP Rural Waterworks and Sanitation Association, Inc. nga nagahatag sang mainom nga suplay sang tubig sa mga residente kag mga establisemyento sa Poblacion kag malapit nga mga barangay sang Guimbal. Ginpangunahan man sini ang pagtukod sang Guimbal Development Cooperative nga naga-operate sa masobra na 28 ka tuig.
Nagbulig man siya sa madamo nga deserving indigent young people nga malab-ot nila ang ila damgo paagi sa scholarship program, nga may kondisyon nga ang madinalag-on nga iskolar dapat magbulig man sa isa pa ka deserving indigent kon tugutan na siya sang iya financial situation. Nagdala man siya sang socially relevant developments sa First District sang Iloilo. Ginpangunahan man sini ang konstruksyon sang tuman ka damo nga infrastructure projects sa First District sang Iloilo. Nagserbe siya sa masobra tatlo ka dekada, indi lamang bilang isa ka political leader kundi bilang isa man ka citizen nga may noble social responsibility nga makita sa iya philanthropic works bisan pa bilang isa ka private citizen, nga nagdala sang paglaum sa pumuluyo nga ang ila kabuhi iya natandog.
Bangud madamo ang nabuligan kag natandog sa iya ginpakita nga kaalwan, nangin palaagyan ang nagligad nga Enero 22, 2022 para sa mga pumuluyo nga ipakita ang ila duna nga kaalwan paagi sa boluntaryo nga pagpakigbahin sa mga hilikuton.
Naghatag sang diskwento ang mga negosyante sa ila ginabaligya nga mga produkto. May pribado nga mga indibidwal nga nagpanghatag sang kwarta agud makapaambit man sang grasya sang kaalwan. Ang mga transport group naghatag man sang diskwento sa pletehan. May mga nagpreparar sang pamahaw kag libre nga ginhatag sa ila kasilingan kag iban pa nga pumuluyo. May mga nagpanghatag man sang libre nga produkto kag pagkaon gikan sa ila mga baligya. May community pantry man sa sulod sang merkado kag libre tughong sang gatong sa mga gasolinahan kag iban pa nga lihok nga nga nagapakita sang kaalwan.
Sa natabu, masiling naton nga kon magdaludo ang kaalwan sang tawo sa iya isig-kapareho, kaangay naga-ilig lang nga indi mapunggan kag diri makita nga nalipay ang kada isa nga nagapaambit sang kaalwan sa iban.
Makalalaton ang kaalwan bangud ang kada isa naghimo gid sang paagi kon paano makapakigbahin kag nakapaambit sang ila duna nga kaalwan sa iban.
Matuod nga maalwan ang mga Ilonggo bangud masaligan gid sa panahon sang kalamidad kag bisan sa ano man nga huol nga nadangatan sang iban. Handa kita nga magbulig sa mga nahalitan ukon nalisdan.
Apang, importante man nga nakita naton nga bisan wala sang kalamidad mahimo kita nga makapaambit sang kaalwan. Indi na gali kinahanglan nga may masubo nga madangatan ang iban antes kita magbulig sa ila. Diri naton napamatud-an sa Oca Garin Day nga wala sang may makapugong sa duna nga kaalwan sang tawo.
Kabay nga ipakita naton ang aton duna nga kaalwan sa tanan nga tion, sa tanan nga higayon, kag sa bisan diin man kita nahamtang sa karon.
Kuntani ang ini nga lihok sa primer distrito mangin lihok man sang tanan nga Ilonggo sa bisan diin man nga lugar. Kuntani indi lamang ini makita sa primer distrito kundi makita man sa iban nga lugar.
Nagapasalamat gid si Vice Governor Christine ‘Tingting’ Garin sa iya mga kaupod sa 13th Iloilo SP nga naaprubahan ang ordinansa sa 3rd and Final Reading sa 122nd Regular Session.
Nagapasalamat pa gid siya, kaupod ang bug-os nga pamilya Garin, sa tanan nga nagpakigbahin sa Oca Garin Day nga nagpaambit sang ila pinasahi kag duna nga kaalwan. (bertladera@gmail.com/PN)
