“GOOD intentions are not enough…”, ang masiling ta gani sa iningles sa nahimo sang mga Garin sa isa ka ultimo nga pulis sang sini lang.
Ang maayo nga tinutuyo dapat updan man sing paghangop kag pagkilala sa kinamatarong sang iban, labi na gid ang may kubos nga kahimtangan, agud makapabilin kita nga makatawo.
Indi man kita malipat nga “The road to hell is paved with good intentions,” agud mangin maamligon kita sa aton himuon sa aton isigkatawo. Ina tungod sa aton pagpati nga husto kita, basi sa matuod gali sala kita kag malupigon pa.
***
Wala naluyagi ni Presidente Rodrigo Duterte ang natabo sa isa ka pulis sang Guimbal sa iya alegasyon, nga gin-ugyunan man sang resulta sang pag-imbestigar sang PRO-6, nga ginkastigo siya sang mga Garin sing wala karason-rason.
Gani gin-orderan ni Presidente si DILG Secretary Eduardo Año sa pagpasaka sang kaso sa kay Iloilo First District Congressman Richard Garin kag sa iya amay Guimbal Mayor Oscar Garin bisan pa nga kaalyado niya ini sa pulitika.
Natabo ining pangkastigo sang pulis sang kaagahon sang Miyerkoles, Disyembre 26, samtang gahingapos ang kahiwatan sang Disyembre sa Guimbal sa plaza sang mga a las 3 sang sinang kaagahon.
Angot ini sa pagkinagamo sang plaza sadtong Disyembre 22, sa diin ang isa ka SK kagawad nalamposan sang botelya sang anak sang isa ka SB sang Guimbal.
Akig gid ang duha ka Garin nga luyag gid pasakaan sing kaso ang ining anak sang SB agud “matagaan sing husto nga disiplina”.
Ugaling naareglo ang ining hitabo sang nagpirma na gid lang sang affidavit of non-interest ang SK kagawad kay, sunu sa iya, indi niya luyag mag-problema pa ang iya iloy nga OFW.
Sang maghilibalo dugang, nagagwa sa sugilanon nga si PO3 Federico Macaya Jr., 41, gid kuno ang nag-kumbinse sa biktima nga indi na lang ipasaka ang inquest agud ma-paylan sang kaso ang anak sang SB.
Naakig ang mga Garin sini. Kag ginpatawag gid ni Congressman Garin ang hepe sang pulis sa Guimbal nga si PSInsp. Antonio Monreal agud dalhon sa iya atubangan si PO3 Macaya.
Gin-orderan ni congressman si Monreal agud i-disarm (kuhaan pusil) kag ginkuha ang sakbit sini nga posas kag ginposasan si Macaya.
Ginpasikto ni congressman si Macaya kon siya gid ang nagkumbinse sa biktima nga iatras na lang ang kaso. Ginpanginwala ini ni Macaya. Boluntaryo kuno yadtong pagpirma sang biktima sang affidavit of desistance (non-interest).
Indi magpati si congressman. Pagkatapos sadto, ginsipa kuno ni congressman si Macaya sing pila ka beses, ginsiko, gintampa pila man ka beses, kag ginduplahan pa sing duha ka beses sa nawong samtang ginatayaan ni Mayor Garin sing armas si Macaya nga nagpakitluoy.
Ang siste kay wala man lang sing ginhimo ang hepe sang pulis, nga daw tando-tando nga nagtulok lang kag wala bisan man lang nagpatunga agud indi matam-an si Macaya.
Nangayo sing pasaylo si congressman sa natabo, apang sa PNP organization gid lang kag wala kay Macaya.
Nagpakita sing paghangop si PNP Regional Director Bulalacao kay ang sugid sa iya ginsumbag lang ang iya pulis, apang naakig na siya sang mahibal-an sang ulihi ang matuod-tuod gid nga natabo sa iya pulis.
“Wala ako sing kaakig sa pagkatawo ni congressman, apang akig ako sa iya ginbuhat,” sining ni Bulalacao sang mahibal-an nga gintampa pa ini kag, labaw kag labi sa tanan, sang ginduplahan pa sing duha ka beses sa nawong si Macaya.
Apat ka kaso ang gina-isip sang Campo Delgado: grave threat, physical injury, direct assault on person in authority, kag alarm and scandal.
Nag-order man si Bulalacao nga kuhaan ang mga Garin sang police escort. Gin-orderan man niya sila nga i-surrender ang ila wala lisensya nga mga armas.
Ang tanan nga mga pulis sang Guimbal ginpang-relieve man kag ginbuslan anay sing special unit. Gin-islan man si Monreal bilang hepe sang pulis sang Guimbal, nga basi mapasakaan pa sing administratibo nga kaso.
***
Ining natabo sa kay Macaya may leksyon man sa mga pulis. Tungod indi man ta gali maluyag matabo ini sa mga pulis, tani panumdumon man sang mga pulis nga tagaan man nila sing husto nga hustisya ang mga suspetsado nga madakpan nila./PN
