KON MAY mas importante pa sa ginhambal ni Presidente Rodrigo Duterte sa iya State of the Nation Address, ukon SONA, sadtong Lunes sang hapon ina amo ang pagkilala sa Diyos nga sang nagligad lang nga inadlaw gintawag niya nga “stupid.”
Sa tunga-tunga sang iya paghambal, kag samtang ginapaathag niya ang iya matahum nga mga damgo pa para sa mga pumuluyo, gindugang niya sa pagsiling ang:”God willing….” nga gatugyan sa Diyos sang Iya luyag gid nga matabo.
Kon sinsero man ukon indi ini nga paghatag niya sang kadungganan sa Diyos, nga “indi stupid” sa matuod, indi na ta seguro baisan pa.
Ang importante amo nga nahambal niya ini nga wala sing pang-alag-ag nga nagpahumok sang aton balatyagon kag nagpapati sa aton nga sinsero gid man ining iya paghatag sing kadungganan sa Diyos.
Lakip na ang bisan kis-a nga wala gid siya nakapamuyayaw sang “Putang ina mo!” sa sulod sang sobra 40 minutos niya nga SONA.
Nagpatimaan ini nga dinaug niya ang diyablo sa sini nga kahigayunan sang masami niya pang-insulto sa kon sin-o lang nga iloy, nga kon matuod man sa natungdan bisan gani si Kristo wala nag-kondena kag naghatag sang iya kapatawaran kag “second chance” sa pagbag-o.
***
Upod man kita sa Presidente sa matigdas gihapon niya nga tindug kontra sa ilegal nga droga tungod sang wala tupong nga panghalit sini sa aton mga kabataan kag sa sosyedad sa kabug-usan.
Ginpuis niya gihapon sa iya SONA ang mga human rights advocates sa pagsiling: “Your concern is human rights; mine is human lives…” Angot diri, siling ni Presidente nga sige ang “relentless kag chilling” nga away sa droga.
Ang aton lang amo nga sa sini nga away kontra droga, kondenahon ta lang ang kasal-anan kag indi ang “tawo nga ang Diyos mismo ang nagtuga sa iya imahen” kag ang paghatag sa ila sang “second chance” katulad sa ginhatag ni Kristo sa makasalanan nga si Maria Magdalena.
***
Ang iban nga concern ni Duterte sa SONA galakip sang mga isyu nga masami man niya ginaliwat-liwat sa iya mga pamulong-pulong.
Lakip sini ang contractualization, universal health care, isyu sa West Philippine Sea, ang justification sang martial law sa Mindanao, ang draft Federal Constitution (nga indi kita sugot tungod nagatukod ini sang authoritarian government), ang TRAIN Law (nga gina-kwestyon sang madamo), ang dugang nga sueldo sa armadong kusog kag iban pa nga mga government workers, libre nga edukasyon tubtub kolehiyo, ang pagpasanyog sang bulig sang gobyerno sa mga 4Ps, kag iban pa.
***
May rason matuod ang pagpasige sang mabaskug nga pagpakig-away sa ilegal nga droga nga ginapilit ni Presidente Duterte.
Sunu sa survey sang Pulse Asia (June 15-21, 2018), 69 porsyento sang mga Filipino ang gatan-aw sa Gyera kontra Droga nga amo ang numero uno gid nga accomplishment sang administrasyong Duterte.
Gasunod ang pag-away sa kriminalidad nga nagalab-ut sa 50 porsento nga ginasundan sang salary increase sang mga police kag mga soldado nga may 30 percent.
Ikaapat ang away sa graft and corruption nga may 28 percent. Ikalima amo ang grant of free education sa State Universities and Colleges (SUCs) nga may 21 percent.
***
Pila ka talalupangdon nga mga hitabo sa ikatlo nga SONA ni Presidente galakip sang kibot nga paghingyu sang kadam-an sang mga myembro sang Kamara sa pagpasumpa sa session hall mismo ni kon sin-o kay Congresswoman kag anay Presidente Gloria Macapagal-Arroyo bilang sal-i kay Cong. Pantaleon Alvares bilang House Speaker. Wala didto si Alvares sang matabo ini kay nagsugat siya kay Presidente upod si Senate President Vicente Sotto.
Ini nga hitabo nag-delay sang sobra isa ka oras sa SONA ni Presidente nga naka-schedule sa a las cuatro sang hapon.
Ugaling nahisugtan kaupod sa Presidente nga papungkuon anay si Alvares bilang Speaker tubtub matigayon ang formal gid nga botohay sa pag-ilis kay Alvares sal-i kay Arroyo, nga natabo gid man pagkatapos sang SONA ni Presidente.
Wala man mapirmahan ni Presidente Duterte and proposed Bangsamoro Organic Law nga na-schedule tani bag-o sang SONA.
Ginpasalig ugaling ni Presidente nga pirmahan niya ini sa sulod sang 48 ka oras pagkatapos sang SONA kay luyag pa niya basahon ini. (w_mateojr@yahoo.com/PN)
