EJK ginakahadlukan na sang bisan inosente nga pumuluyo

KON ginkalipay sadto sang mga pumuluyo ang pagdaug ni Presidente Duterte tungod sa iya pasalig nga papason niya ang mga kriminal kag ang mga durugista, may pangduha-duha na subong ang madamo sa ila kon bala malipay pa sila sa sining padayon nga pinatyanay sa aton sosyedad.

Sunu mismo sa report sang kapulisan, mga 5,000 na ka drug personalities ang napatay sa ila police operation sugod sang pagpungko sa pwesto ni Presidente Duterte sang 2016 kay nagbatu gid ini sila sa mga otoridad.

Sobra na sa pilu ining nagkalamatay, siling ugaling sang human rights watch diri sa pungsod kag sa luas, kag laban sini tungod sa “ilegal nga pagpamatay”, ukon EJK sa ila mismo pagtawag.

Of course, gina-deny sang kapulisan ining EJK kag gina-insistir nga napatay ining mga durugista tungod nagbatu sila sa mga otoridad nga kinahanglan na ma-depensahan man ang ila mga kaugalingon.

***

Sunu sa isa ka survey sang Social Weather Station (SWS), nga ginpagwa sini sadtong Marso 1, 2019, kag ginpublikar sang PhilStar.com sang Marso 2, 2019, kalabanan sang mga Filipino sa subong may kakulba na nga basi sila man  mangin biktima sang “ilegal nga pagpamatay”, ukon EJK, sa ila palibut.

Ang EJK,ukon extra-judicial killing, amo-amo man ini sa “summary execution”, sa diin ang isa ka akusado ginapatay gilayon nga indi matagaan sing “fair trial” agud mapamatbatan ugaling sang husgado.

Ang resulta sining SWS survey sa 1,440 ka respondents nagpakita nga 78 ka porsyento sa ila nagakabalaka na, ukon bisan gani sa sin-o sa ila kakilala, nga mangin biktima man sang sining EJK. Mas mataas ini nga resulta sang SWS survey sing 5 ka puntos halin sa 73 ka porsyento sadtong 2017.

Sang sining ulihi lang, ginbabando pa gani ni Presidente Duterte nga ang iya gyera kontra droga mangin mas mapintas (harsher) kag mas maduguon (bloodier). Natural lang seguro nga makadugang pa ini sang kabalaka sang mga pumuluyo sa nagakatabo nga pinatyanay nga ini sa mga police operation.

***

Ang nagligad nga eleksyon nagpakita ugaling nga ang SWS survey nga ini – sa diin 78 percent sang 1,440 ka respondents ang nagakabalaka – lain sangsa pagpati sang kabug-usan sang mga sobra 40 ka milyon nga bumoloto. Man todo suporta pa ini sila sa mga kandidato ni Presidente Duterte sang Mayo 13 nga eleksyon.

Nonetheless, ang ining kadam-an (78 percent) sunu sa SWS survey indi basta naton i-bale wala. Ina tungod sa aktuwal nga isip posible nga ang 78 percent nga nagakabalaka kaugyon man sang minilyon pa nga mga buomoloto, ugaling lang napierde sila sa kabug-usan sa pagpadaug sang mga kandidato sang oposisyon nga ila gin-updan tungod sa ila kabalaka batok sa EKJ sa panahon sining Duterte Administration.

Gani, dapat tagaan ini sang importansya kag pagtalupangod ni Presidente Duterte kag sang iya kapulisan ining ila maduguon nga police operation kon luyag nila padayunon ang pagsalig sang kalabanan nga mga pumuluyo sa ila.

Kon ang ining kabalaka sang mga pumuluyo nga basi mangin biktima man sila sang EJK yara lang matuod sa minoriya sang kabug-usan sang mga bumoloto, madale ugaling magbutu ini kon indi naton ini matadlong.

Dugang pa, indi man kita pirme makapanghinaw sing kasal-anan katulad ni Ponso Pilato kag sang mga soldadong Romano nga pagpatay lang ang unod lang sang ila ulo agud mapahumot ang ila record sa serbisyo.

Dapat magkilala kita nga may mga paagi sa pagpasabat ang mga akusado sang ila kasal-anan nga indi basta patyon lang sila. Importante sa Diyos ang kabuhi sang tawo nga siya mismo ang nagtuga. May kasuguan man ang tawo kag ang Diyos kon paano ini sila pasabton sang ila kasal-anan sing nagakaigu. (w_mateojr@yahoo.com/PN)