BOLAHAN gid ang mga kapitan kada eleksyon. Sila ang ginapalapitan sang mga kandidato agud makuha ang ila suporta. Kun sin-o kuno ang damo kapitan amo ang daug.
Pero ngaa amo ini ang pagpati sang mga politiko? Napamatud-an na gid man bala ini nga formula?
Sang gin-engkwentro ni anay Tanodbayan Raul Gonzalez Sr. si anay lone district Cong. Rafael Lopez-Vito, mga kapitan man ang iya una ginpuntariya. Sang nakuha ang ila suporta, nangin kampante na si Gonzalez. Kag matuod, ginpukan nya ang nakapanggamot na nga politiko sa syudad sang Iloilo.
Subong nga nagabungguanay sa pagkaalkalde sang syudad sang Iloilo ang magbilas nga sanday Cong. Jerry Treñas kag Mayor Jose Espinosa III sa pagkaalkalde sang syudad, sanday kapitan naman ang bida. Kampante si Treñas bangud 160 sa kabug-usan nga 180 ka kapitan ang iya.
Ngaa bala daw langit ang pagsalig sang isa ka kandidato kun ang mga kapitan ang iya kaupd? Indi bala nga sa adlaw sang eleksyon, isa man lang ka boto ang sigurado nga mahatag ni kap?
Ano bala ang ginapasalig ni kap kay congressman? Ano naman ang kabaylo sang pasalig ni kap kay Mr. Politiko?
Sa mga pumuluyo, mangin mabinantayon kamo subong nga election. Basi ginabaligya na kamo ni kap sa kay sin-o dira nga kandidato. Basi magkumod-kumod naman kamo nga pagkatapos sang election, daw damo kwarta ni kap.
Suno sa mga insiders, sa tagsa ka pagtambong ni kap sa meeting kay Mr. Politiko, may ginabaton sila nga kwarta. Bisan pamelete nyo lang kuno. Sang malayo pa ang election, may tag P500; sang malapit na lang indi na kuno magnubo sa P1,000 ang ginahatag ni Mr. Politiko.
Panawagan sa mag pumuluyo, mangkuta nyo abi kun ngaa daw madilap gid si kap ninyo sa buli ni Mr. Politiko. Ano bala ang kabaylo? Basi bala kun ginabaligya na kamo ni kap kay Mr. Politiko? Busog si kap, kamo naman nada, zero.
Wala man nagakahulugan nga magpabayad man kamo sa inyo boto. Ang punto diri, indi kamo pag-i-kapital ni kap ninyo agud makakuha kwarta kay Mr. Politiko.
Basi bala ginanegosyohan kamo ni kap. (jpranco1975@gmail.com/PN)
