NAGAKABALAKA ang mga senador sa mangin dalagan sang ila kandidatura kag sa mga magasakdag sa ila kon ila pa gid nga sakdagon ang Ta Reform for Acceleration and Inclusion ukon TRAIN 2 bangud sa mga reklamo kag sentimento nga ginapahayag sang mga pumuluyo sa ginpatuman nga TRAIN law.
Kahibalo sila nga magalas-ay ang mga botante kag wala sang negosyante nga magasakdag sa ila kandidatura kon magapabor sila sa hagna nga para sa ila may mabug-at nga epekto sa pangabuhi sa mga pumuluyo.
Apisar nga nagpanawagan si Presidente Rodrigo Duterte sa iya nga ikatatlo nga State of the Nation Address ukon SONA nga sakdagon ang TRAIN package 2 apang malas-ay ang pagpanamil sang mga senador bisan pa nga may yara sang mga kongresista nga magaduso sini sa Kamara.
Katuyan sang TRAIN 2 nga ma-rationalize ang investment incentives kag mabuhinan ang corporate income tax.
Sa ginhiwat nga caucus sadtong Martes sang mga senador, ginpamangkot ni Senador Sonny Angara nga chairman sang ways and means committee ang iya mga kaupdanan nga nagpahayag nga wala sang bisan isa sa ila ang magasakdag ukon magadepensa sa hagna.
Nagapaminsar ang liderato sang Senado sa pag-aprubar sang mga nakalinya nga mga hagna sa baylo sang TRAIN 2.
Ginakahangaw-an sang mga senador ang mangin epekto sang pagdula sang mga insentibo nga ginahatag sa pila ka mga industriya kaangay sang business process outsourcing kag export manufacturers nga mahimo makatuga sang pagkawad-an sang trabaho sang iban nga mamumugon.
Ginalantaw nila nga maayo ang tuyo nga pagpanubo sa corporate income tax apang dapat mangita sang paagi kon paano mabalanse ang isa pa ka katuyuan nga pagdula sang mga insentibo.
Nahangpan sang mga senador ang tuyo sang presidente bangud man sa nagadaku nga mga kagastuhanan sang gobyerno.
Samtang, nagpaandam naman sanday Budget Secretary Benjamin Diokno kag Education secretary Leonor Briones sa mangin epekto kon indi mapasar sa sini nga tuig ang packages sang TRAIN law sa sini nga tuig bangud may eleksyon na sa 2019 kag maatrasar naman ini bangud magluwaas sa TRAIN 2, may nagahulat pa nga TRAIN 3 tubtub TRAIN 5.
Ginsiling sini nga pagatipunon sang presidente ang mga katapo sang Legislative-Executive Development Advisory Council ukon LEDAC agud iduso ang pag-arpubar sang TRAIN 2.
Dapat mapahangop sa mga nagakabalaka ang katuyuan, ang proseso, ang mangin dalagan kag mangin epekto kon igapatuman ang TRAIN 2.
Madamo sang mga major social services ang mahimo mapondohan sang tax reform programs kag maaberya lang kon indi matigayon.
Ang kahangawa nagatuhaw sa pinsar sang kulang sa ihibalo. Ang kahadlok nagatublag sa dughan sang kulang sa paghangop. Ang tanan nga bag-o ginakahangaw-an, makatulublag, masakit kag ginakatalawan. Ang tanan nga katuyuan mahimo nga malisyahan. Nagakabuhi nakita sa karon kag nahibaluan na naton ang sitwasyon. Hatagan naton sang higayon ang mga reporma sa pagbuhis, bisan masakit pa sa aton kahimtangan, nga ang katuyuan amo ang mauswagon nga pagpangabuhi.
Ang epekto kon maaberya ang TRAIN 2 amo ang pagdalok naton nga hatagan sang higayon ang aton pungsod nga mag-uswag. (bertladera@gmail.com/PN)
