Ni CYRUS M. GARDE
Syudad sang BACOLOD – Patay ang anay katapo sang Civilian Armed Forces Geographical Unit (CAFGU) sang ginluthang sang maka-pila ka beses sa atubang sang iya asawa, alas-dos sa hapon sang Domingo sa Mandayao 2, Brgy. Mansalanao, La Castellana, Negros Occidental.
Ang biktima ginkilala ni Senior Insp. Ruben Pajarito nga si Jovito Velasco, 55, kag pumoluyo sang amo nga barangay.
Nakaagom ini sang madamo nga pilas sa lawas kag ulo tuga sang kalibre .45 nga gintunaan sang iya gilayon nga kamatayon.
Sunu pa sa kapulisan nga ginluthang ang biktima nga upod ang iya asawa nga si Angelica samtang nagapanaog na sila sa traysikol nga ila ginsakyan. Wala naman gintadog si Angelica.
Nahibaluan nga halin sa banwa ang mag-asawa bangod tinda ukon market day kag nagapauli na sang ginsunod sang tatlo ka mga suspek.
Sang namutikan ni Jovito nga may malain nga matabo, naglukso ini gikan sa traysikol agud manago sa sulod sang kampo sang tubo, apang ginsunod pa gid sia sang mga suspek kag ginpaulanan sang luthang.
Naglab-ot sa 11 tanan ka mga basiyo sang kalibre .45 ang napulotan sa eksena sang insidente.
Ginapahayag nga ginsuspetsahan sang mga suspek ang biktima nga asset sang military bangod isa sia anay ka CAFGU.
Sunu naman kay Angelica, nabatian niya nga nagasinggit pa ang mga suspek nga NPA sila kag traidor ang biktima bangod asset sang military. Gindugang sini nga kilala niya ang isa sa mga suspek, apang wala gihingadlan ni Pajarito samtang wala pa napasaka ang kaso sa korte./H
