Ni Cyrus M. Garde
Syudad sang BACOLOD – Patay ang anay katapo sang Sangguniang Bayan (SB) sang banwa sang Ilog sa Negros Occidental sang ginluthang sang Martes sang gab-i sa isa ka ilimnan sa Brgy. Dancalan, Ilog.
Si Edmund Turk Vail, 45 anyos, may asawa kag duha ka kabataan, nakaangkon sang igu sa iya ulo, dughan kag iban pa nga parte sang lawas.
Ining biktima amo na ang pangulo karon sang Ilog water district.
Ginhingagaw pa ini sia dala sa ospital sa Syudad sang Kabankalan, apang ginbawian na sang kabuhi.
Samtang, isa ang nasalabat sa pagpangluthang nga amo si Engr. Cero Santiago nga may igu sa wala nga kilid, apang indi malubha.
Nahibaluan sang HUBLAS nga duha ka tawo ang nagasakay sa motorsiklo kag nanaog kag ang isa diretso nga nagsulod sa ilimnan.
Nangayo pa ini sang katahuran sa biktima sa pagsiling “maayong gab-i” kag hinali lang dayon nga ginluthang ang biktima.
Anum ka mga basiyo sang kalibre .45 ang nakuha sa duog sang insidente kag gina-usisa pa subong sang Ilog PNP sa idalom ni Senior Inspector Renante Salgado ang natabo.
Lakip sa mga anggulo nga ginalantaw sang kapulisan amo ang problema sa pamilya angut sa ila propiedad./H
