TANAN nga pamaagi ang ginahimo karon agud lamang nga mapahagan-hagan, kon indi man lubos nga matapna, ang pagdamo sang kaso sang nagpositibo sa COVID-19.
Napatudok na sa pinsar kag pagginawi sang kada persona nga masami magsuksok sang facemask ilabi na kon yara sa madamo nga tawo, nagasakay sa jeep, ukon nagapamalaklon sa merkado.
Nangin kabahin na sang mga importante nga ginasuksok ang facemask, kaangay ini sang panapot sa lawas nga dapat nagatakod antes maggwa sa ganhaan kag magtikang sa dalan.
Apang may mga namutikan ang mga otoridad nga mas makapaayopa gid kon magsuksok sang face shield magluwas sa nasuksok na nga facemask.
Nakita sang mga otoridad nga dugang nga proteksyon para sa indibidwal ang pagsuksok sang facemask rason nga dapat magsuksok sini antes makasakay sa jeep ukon magsulod sa mall.
Tanan nga bag-o nga pagsulundan nga ginapatuman aton gid ginabalabagan apang sa paglipas sang panahon, ini na ang aton naandan. Nangin kabahin na ini sang aton matag-adlaw nga pagsinarayo.
Madamo na sang ordinansa nga ginapatuman, ilabi na nga ini ang ginbalay base man sa mga patakaran nga ginapatuman sang National Inter-Agency Task Force kag sa mga executive order nga ginapagwa sang provincial government kag city government.
Katuyuan sang ordinansa nga mas mahatagan sang bug-at ang mga ginapatuman nga patakaran bangud may nasaad nga penalidad ukon multa sa indi magtuman.
Bangud nga kinahanglan,importante kag nagasibu sa panahon, gin-aprubahan sang 13th Iloilo Sangguniang Panlalawigan ang ordinansa nga naga-require sa paggamit sang face shield.
Sa ginhiwat nga 58th Regular Session, ang Proposed Provincial Ordinance No. 2020-08-09 nga ang author amo mismo si Vice Gov. Christine “Tingting” Garin ang gin-aprubahan sang Sangguniang Panlalawigan.
Ginrekomendar sang Committee on Public Order and Security sa pagpamuno ni 2nd District Board Member June Mondejar ang pag-adoptar sang committee report, ginduso para sa Second Reading, kag gilayon nga gin-aprubahan sa Third and Final Reading mismo sa 58th Regular Session matapos ang pagdiskurso kag pagklaro sa pila ka mga nasaad agud mangin hitso ang pagpatuman sini.
Nahibaluan nga ang Proposed Provincial Ordinance No. 2020-08-09 may tigulo nga “An Ordinance Requiring the Use of Face Shield in All Public Places, Private Establishments, Other Work Places, and while Riding on any Means of Public Transportation During the Duration of COVID-19 Pandemic and for Other Purposes.”
Ginsiling sang sponsor sang sini nga Proposed Provincial Ordinance 2020-08-09 nga si Board Member Mondejar nga gin-refer ini sa iya komitiba durante nga ginahiwat ang 57th Regular Session kag gin-transmit sa iya komitiba sang SP Secretary, Atty. Raul Tiosayco Jr., sadtong Agosto 27, 2020 “for study, report and recommendation” kag ang konsiderasyon sa pag-akto sa sini nga proposed Ordinance dapat kabigon nga “urgent” bangud makalalaton ang COVID-19 kag ang paglaton wala sang holiday.
Nagatuyo ang proposed Ordinance nga epektibo nga matapna ang paglapta sang COVID-19 sa probinsya sang Iloilo paagi sa pagmandu sang compulsory nga paggamit sang face shield sa mga pampubliko nga lugar kaangay sang merkado publiko, mga supermarket, mga department store, mga public plaza, mga simbahan, mga mall, mga restaurant, mga dalan, mga botika, mga private establishment, iban pa nga work places kag samtang nagasakay sa anuman nga sahi sang pampubliko nga transportasyon sa sulod sang nasakupan sang probinsya sang Iloilo kag may penalidad para sa paglapas ukon indi pagsunod.
Matuod nga may mga bagay nga kon kaisa nagabatyga kita sang kabudlay sa pagsuksok sang face shield apang dapat naton paminsaron nga ang tuyo sini amo ang proteksyon para sa aton. Wala ini gina-require para lang sa kakombenyente ukon pasahu lamang.
Kaangay sang bulong, pilit naton nga ginatumar kag ginatulon bisan mapait bangud ini ang makapasulhay sa aton ginaagunto nga masakit.
Madamo sang pamaagi agud nga ang mabudlay mangin mahapos. Kaangay sa akon mismo nga nabudlayan maggamit sini, ilabi na kon mataas ang grado sang antipara, bangud may “distortion” nga nagakatabu nga gintunaan na sang akon pagkahagmak sa semento.
Apang, wala kita sang dapat sukmaan, basulon ukon untaton na ang paggamit sang face shield. Ginpaminsar ko nga ang face shield gina-require lang kon magsakay sa jeep, kon magsulod sa mall, kag iban pa nga lugar nga dapat nagagamit sini kon nagatransaksyon. Nagakaangay lang nga kakason anay ang face shield kon nagalakat sa dalan agud nga indi matublag ang lantaw sa ginatapakan ukon mas klaro ang kada pagtikang.
Dapat kahibalo lang kita magtimbang sa mga lihok nga nagakaangay agud nga indi kita madisgrasya sa dalan kag indi kita malatnan sang COVID-19.
Ang paggamit sang face shield kaangay man sa mga taming sang mga hangaway sadtong una nga panahon. May mga taming nga mabug-at, may malapad, may mabakod, may desinyo kag iban pa. Diri makita kon ano ang ila naluyagan nga sa ila pagpati daku ang mabulig sa ila batok sa ila kasumpong.
Kaangay man ini sa aton sitwasyon sa karon, may face shield nga lagpas sa sag-ang, may yara sang lagpas sa idalom sang ilong, may manipis, may madamol, may manami ang desinyo, kag may ordinaryo.
Yara sa imo ang pagpili sa imo naluyagan nga sahi sang face shield. Ikaw ang mas nakahibalo kon ano nga sahi sang taming ang imo gamiton agud mapangapinan mo ang imo kaugalingon batok sa COVID-19.(bertladera@gmail.com/PN)
