TARSO ining abyan naton. Indi siya luyag madayon ang masunod nga boksing ni Manny Pacquiao. Labi na gid kay malapit na ang 2022 election.
“Man, gamiton lang sina ang iya kitaon sa boksing sa iya kampanya sa palaabuton nga 2022 election,” siling niya.
“Siling ko anay ga-enjoy ka gid sang boksing ni Pacquiao?”
“Indi na subong! Gamiton lang sina ang iya minilyon nga kitaon sa iya pagdalagan kontra sa akon kandidato,” dugang niya.
“Ngaa, sin-o ang kandidato mo para presidente?”
“Natural, indi si Pacquiao. Okey lang siya sa boksing. Pero, indi boksing ang pagka-presidente. Kinahanglan niya ang bastante nga alam kag guts.”
“Well, kulang gid man sing alam si Pacquiao, pero basi bastante man siya sa pinaniiran agud magpalakat sing panghimanwa. Sa guts, sobra-sobra man siya a. Daw toro kon magsoroso sa kontra sa ring!”
“Ano nga pinaniiran man? Basi magsugo lang nga magsugo kag isalig lang niya ang tanan sa mga tinawo kay sa boksing man lang sia sagad. Aba, delikado ina, nga daan damo corrupt sa gobyerno. Kon sa guts, wala man. Wala gani niya ginpangapinan ang pagpamuyayaw ni Presidente sa Diyos, nga gintawag niya nga ‘stupid’. Wala siya kuno kabati sinang ginsiling ni Presidente. Wala man siya naghatag opinyon sa pag-apin sa Diyos kon diin daw pastor siya sa iya relihiyon (Tuod?). Maayo pa si Brother Eddie, ginsaway gid niya si Presidente kag ginlaygayan nga sala yadtong ginhimo ni Presidente,” paathag pa sang aton abyan.
Well, opinyon ina ya sang aton abyan. Kon luyag ninyo husayon ini sa boksing, siling lang kamo kay sugiran ko ining akon abyan. He-he-he!
***
Good news! Sunu sa report sang World Health Organization, nga gindala sang Washington Post sadtong Peb. 17, 2021, daku na ang pagnubo sang mga kaso sang COVID-19 sa bug-os nga kalibutan. Mga 16 ka porsyento na, bisan sa pag-outbreak pa sang pila ka lugar.
Sa Filipinas gani daku man ang pagnubo sang COVID-19 cases halin sadtong pag-peak sini sadtong Agosto 2020.
Sunu sa Dept. of Health (DOH), may 4,358 ka new cases sadtong Agosto 15, 2020, samtang ang 7-day average naglab-ut sa 4,333.
Amat-amat ini nagnubo on the 7-day average sa 4,330 sadtong Agosto 10, 2020, although ang bag-o nga kaso sa ina nga adlaw naglab-ut sa 6,725.
Halin sadto (Agosto 15, 2020) madasig na nagnubo ang 7-day average sini, kag nag-plateau (nagnubo nga wala na gawa nagsaka) na tubtub Pebrero 18, 2021, kon san-o nag-average na lang ang mga kaso sa pitu ka adlaw sa 1,697, samtang may bag-o nga mga kaso sa sina nga adlaw sing 1,739.
Ngaa ayhan? Ina seguro sa sige-sige nga pagtuman sang health protocols sang kadam-an kontra sa pagpanglaton ukon transmission sang virus.
Aang mga scientist nagapati ugaling nga indi na ini maglab-ut pa sa zero transmission.
Una, tungod sa karon indi pa mapatuman sing lubos ang vaccination tungod madamo ang wala luyag magpa-bakuna. Tungod ini sa pagkahangawa sa pila ka kaso sang pagkamatay sa vaccination.
Ang Bloomberg Media nag-report nga 50% ang indi luyag magpabakuna sa United States kag mga 40% naman sa Uropa. Amo-amo man ang indi luyag magpabakuna sa Filipinas.
Nagdugang pa gid ang problema sang pagtuhaw sang mga variant nga nagtuhaw sa UK, South Africa kag Brazil nga sobra kadasig sang pagpanglaton nga indi malab-ut sang vaccination para sa herd immunity.
So, ang daku gid lang nga mahimo naton amo ang proteksyon sa kada isa nga mabakunahan, nga indi man gani lubos kay ang immunity nga mahatag sini wala gapareho sa kada tawo. Naga-range lang ini halin sa tatlo tubtub 6 ka bulan. Although indi na mag-severe ang igu sang COVID-19 sa ila.
Ang indi malab-ut sang bakuna masalig na gid lang seguro sa pagpabakud sang ila immune system paagi sa bagay nga pagkaon, ehersiyo, kag sang hygienic practice.
Makabulig man sa “peace of mind” sang iban nga “mild” lang ang igu sang COVID-19 sa kadam-an (80%) nga madali man paayuhon.
Posible man gani, sunu sa experyensya sa coronavirus epidemic sang 1889, nga magtahaw na ang epekto sini kag mahulog na lang sa “common cold” nga ma-tolerar na sang katauhan, nga pwede naton ma-expect sa padayon nga pagnubo sang mga kaso sang COVID-19./PN
