GARBOSO…ini ang isa ka tinaga nga husto nga paglaragway sa plano sang syudad sang Iloilo nga ire-develop ang Iloilo Central Market.
Matapos ang duha ka hugnat sang konsultasyon sa mga vendors, wala naman sang nagapamatok bangud nakita nila nga matahum ang proyekto. Ang kinahanglan lang nga siguraduhon sang pamunuan ni Mayor Jose Espinosa III nga indi mabutang sa alang-alang ang palangabuhian sang mga vendors.
Kun ang mga vandors ang pamangkuton ,mas gusto nila ang matinlo kag modern nga merkado. Merkado nga kun magsulod ka, indi ka magpang-alang-alang kundi magganyat ka bangud sang katinlo.
Sa umpisa, daw makaduda ka gid man sa intention sang proyekto. Makasiling ka nga daw politika lang. Pero kun hatagan sang madalum nga paghangup, maayo ang intention sang proyekto.
Sa pihak sini may nagapamalabag sa proyekto bangud sa pagpati nga maapektuhan ang palangabuhian sang mga vendors kag indi masarangan sang syudad ang proyekto.
Masubo nga bisan maayo pa ang proyekto may nagapamatok. Indi bangud sa indi maayo ang proyekto kundi sa personal nga interes sang mga nagapamatok.
Matuod nga kun madayun ini nga proyekto mangin legasiya ini ni Mayor Jose Espinosa III. Kun madayun ang poryekto, magamarka sa paminsaron sang mga Ilonggo nga si Espinosa lang ang nakasolbar sang problema sa merkado nga wala gid nahimo sang iban nga nakaligad nga mga administrasyon.
Kun matabu ini, masakit sa dulonggan kun ikaw kasumpong sa politika ni Espinosa.
Garboso kag ambisyo pero maayo ang proyekto.
Ti-on na nga hatagan sang kahigayunan ang proyekto para sa kaayuhan sang mas madamo. Ipahigad ang politika. Sa nagapamatok, ano ang inyo mahatag nga option?
Sa bahin naman sang syudad, indi lang ang Iloilo Central Market ang dapat nga kaayuhon. May mga merkado pa nga problemado man kaangay sang Iloilo Terminal Market nga nagahulat sang pagkaayo.
Ang atun mg vendors ngahulat sang pagbag-o sang merkado nga para sa kaayuhan sang tanan. (jpranco1975@gmail.com/PN)
