DALAYAWON ang pagka-propesyunal sang mga katapo sang media sa syudad sang Iloilo. Ila gin-agwanta ang kapait sang sitwasyon tubtub nga natapos ang okasyon nga wala sang sablag kag nangin madinalag-on.
Bisan pa sa panugod pa lang nasimhutan na sang kadamuan ang tuhay nga tinutuyo kag indi mabaton nga patakaran kag pagpalakat sa komite para sa publisidad sang 2020 Dinagyang Festival apang ginpilit sang iban nga tunlon ang mapait nga apyan, pilit nga ginsulay ang ulan sang tunok, pilit nga ginsumalang ang matalom nga labaha lamang nga ipakita ang pag-ugyon kag agud nga indi mabutang sa alang-alang ang paghiwat sang selebrasyon.
Ginpasulabi sang mga katapo sang media sa Iloilo nga ihatag ang lubos nga suporta sa kadungganan sang mga Ilonggo. Wala nagtuga sang anuman nga eksena bisan pa nga nagabatyag na sang pagpang-ipit, bisan pa nga ginadis-ug kag ginadaug-daug sang kaangay nga manugbantala sang balita.
Masakit paminsaron nga gingamit sa bentaha sang nagadumala ang selebrasyon sang Dinagyang paagi sa pagpasulabi sa iya kaugalingon kag ang pagdingot sa iya mga kasumpong. Tanan kita nagatib-ong sa patron, tanan kita naga-ugyon para sa kadalag-an, tanan kita boluntaryo nga nagasakripisyo para sa kadalag-an kag kadungganan sang Iloilo.
Apang, nangin daluk ang iban, namentaha paagi sa pagdis-ug sa iya kasumpong kag gingamit ang higayon agud nga dugmukon ang nagabuylog sa okasyon.
Kon paminsaron, indi dapat maghiwat sang sinapol sa lugar nga indi patas sa tanan. Dapat ginahiwat ini sa ‘neutral ground’ kag agud nga wala sang malisya kag kahangawa sa mga tumalambong.
Ang paghatag sang accreditation isa ka pribilihiyo kag indi dapat magpangibabaw sa kinamatarong nga nasaad sa idalom sang konstitusyon. Dapat mas kilalahon ang kinamatarong sang mamantala kag ihatag sa ila ang higayon nga makabantala.
Kon ang rason sa indi paghatag sang accreditation amo ang indi pagtambong sa mga sinapol nga ginahiwat, kuntani wala man ginhatagan ang international media, national media kag iban mga yara sa social media nga wala man nagatambong sa sinapol ukon wala sang higayon nga makatambong sa sinapol.
Maathag nga luyag ipiton ang tingog sang kasumpong. Maathag nga gintuyo gid kag gintarget ang kasumpong nga ipiton agud nga malipong.
Nagalaum kita nga masanagan ang Iloilo Festivals Foundation Inc. sa natabu kag magahimo sang angay nga tikang agud indi na maliwat pa nga magluntad sa palaabuton.
Ginasiling naton nga ang Dinagyang iya sang mga Ilonggo kag indi iya sang IFFI. Madamo na sang pulitiko ang nagsaka kag nagpanaog sa pwesto, madamo na sang nagdumala sa Dinagyang ang nagbulos-bulos apang ang Dinagyang nagapabilin sa iya kahimtangan.
Gintugyanan lang ang IFFI nga magdumala, wala ila sang kinamatarong nga makontrolar sa tanan kag magpang-ipit sa bolutaryo nga nagabuylog agud nga magmadinalag-on ang kahiwatan.
May angay nga lugar ang tagsa ka kompetisyon. Kahibalo kita nga hugot ang kompetisyon sa kada media outlet sa syudad. Apang ang Dinagyang Festival indi ang angay nga higayon para sa mainit nga kompetisyon kag pagpamentaha sa posisyon.
Kuntani mangin leksyon sa city government ang natabu. Indi malipayon ang nagapang-ipit sang tingog bisan pa nga siya lang ang nagalanog. Sa likod sang paminsaron, kahibalo ang natungdan kon ano ang ginhimo niya nga pagpamentaha sa iya posisyon. (bertladera@gmail.com/PN)
