PINASAHI ang pag-atipan sa ila. Ginapamatian kag ginhatagan sang solusyon ang ila palaligban. May tan-ay nga palangabuhian sa luyag magligwat sang ila palangitan-an.
Bulahan ang mga sidewalk vendor sa syudad sang Iloilo. Ginapabatyag sila nga may kabilinggan sila sa sosyudad. Ginahatagan sila sang higayon agud mapamatian antes ipatuman ang mandu nga supak sa ila naandan kag sa ila buot.
Sa iban nga syudad sang pungsod, ora-orada ang pagpatuman sang mandu nga hawanan ang mga dalanon kag kakason ang mga sablag nga naga-okupar sa pampubliko nga lugar.
Madamo sang mga manugbaligya sa kalye didto sa Manila ang nagatiyabaw kag nagpangabay nga hatagan sila sang gamay nga tion apang wala na sila ginpamatian pa kag wala na ginhatagan pa sang higayon.
Dapat pasalamatan sang mga sidewalk vendor nga may malum-ok nga kamot si Mayor Jerry Treñas bangud naghatag pa siya sang higayon, pito ka adlaw nga plaso, agud nga makapanghimos sila sang ila mga baligya kag makasaylo sa gintigana sa ila nga lugar.
Nagadamo sang kapin sa 1,500 ang sidewalk vendors nga makita sa mga dalanon sang JM Basa, Iznart, Guanco, Aldeguer, Valeria, Quezon, Mabini, Ledesma kag iban pa. Kadamuan sa ila ang makita sa palibot sang Plazoleta Gay.
Ginpatawag sila paagi sa hinun-anon agud nga masabat ang ila mga palamangkutanon, masanagan ang ila nadulman nga pinsar kag mapakalma ang ila nagakabalaka nga balatyagon. Apang, kaangay sang pag-inom sang bulong, indi gilayon makwa ang gina-agunto nga kahangawa.
BULIG-PINANSYAL
Ginpasaligan sila sang city government nga hatagan sang singko mil pesos bilang bulig-pinansyal. Matuod nga indi daku ang kantidad apang mas maayo na lang ina nga ginhatagan pa sila sang syudad. Ang iban nga local government unit wala gid sang ginatan-ay nga kaangay sini sa mga natublag nga manugbaligya. Dapat nakapalista sila sa City Social Welfare and Development Office, dapat indi magdoble ang ila ngalan sa listahan kag dapat residente sila sang syudad sang Iloilo.
LIVELIHOOD TRAINING
Ginhatagan man sila sang city government sang opsyon kon luyag nila mag-angkon sang kaalam kag ikasangkol sa pagwelding, mekaniko, panday kag iba pa nga paghanas nga ginatan-ay sang TESDA para sa ila. Higayon ini agud nga makaangkon sila sang oportunidad para sa iban naman nga sahi sang palangabuhian kag, kon mahimo, indi na sila magsandig pa sa pagpangabuhi bilang sidewalk vendor. Indi naton mapaktan kon mas mag-ayuhan pa gid ang ila kabuhi kon batunon nila ang ini nga higayon nga libre nga ginatan-ay sang gobyerno.
SAYLO SA MERKADO
Ginatan-ay man sang city government ang bakante nga lote nga gingamit sadto sang PECO sa dalan sang JM Basa sa city proper agud nga ila pahamtangan. Diri sila magabaligya agud nga indi sila makasablag sa sidewalk. May bakante man nga espasyo sa ikaduha nga panalgan sang Iloilo Terminal Market nga ginatan-ay ang city government.
Halos nahumlad na sang city government ang magtimbang sini nga palad para sa benepisyo sang mga sidewalk vendor. Nangin mahumok ang mga kamot ni Mayor Jerry Treñas sa pag-amuma sa ila nga pila ka dekada na nga nagapangabuhi sa sidewalk kag ginahatagan sang espesyal nga pagtalupangod.
Indi na dapat magpakatig-a pa ang mga sidewalk vendors, dapat nga magbuylog sila bangud gina-alay-ay na sila sang city government. (bertladera@gmail.com/PN)
