SIN-O ang nagabantay sa hulag ni Mayor Jose Espinosa III?
Ngaa bala tanan nga hulag madasig nga maglusot sa media kag sa social media?
Halimbawa lang diri ang kabahin sang iya mensahe sa sinapol sang Regional Development Council (RDC) sadtong Byernes sa Jubilee Hall. Sa iya mensahe ginsiling sang alkalde, “This is my first time to attend (clap) as member of the Regional Development Council. So Ma’am (RDC chairman Gov. Rhodora Cadiao) wala pa ko ‘ya sang role as a member and I don’t know why I am here? Maybe by accident or but now I am here hosting you.”
Matapos ang mensahe sang pagpang-abi-abi ni Espinosa, madamo dayun ang nagapinamangkot kun nakahambal gid man ang alkalde nga wala sya nakahibalo kun ngaa ara sya. Kaangay bala nga gusto pagwaon nga wala sang ihibalo ang alkalde kun ano ang iya papel sa RDC. Ukon gusto man nila pagwaon nga wala sang naming-an ang alkalde kun ano ang RDC.
Pero kun pamati-an ang kabug-usan nga mensahe sang alkalde antes kag makalipas nga ginbuy-an niya ang amo nga linya, maathag nga gusto lang sang alkalde nga mag mag-an ang atmosphere sa venue. Daw ka imposible man siguro nga wala sang idea ang alkalde kun ano ang RDC.
Maathag nga ginabantayan ang alkalde sang iya mangin kapaltahan. Ginabantayan kun ano ang mga mabuy-an niya nga tinaga agud gamiton para mapagwa nga mahuyang sya nga alkalde. Ay nano, nagaandar na ang makinaryas sang iban?
Sa matuod lang, isa sa kahinaan ni Mayor Joe amo ang iya kakulang sang eloquence sa paghambal. Indi sya kaangay sang iban nga daw tuburan sang tinaga ang ila bibig, nga wala untat sa pag-ilig ang mga pulong.
Sang bise alkalde pa sya, isa man ako sang nagmuno sang iya kahinaan nga ina. Pero subong nga sya na ang alkalde, makita man ang paghimakas niya nga maka-deliver sang ginapaabot sa iya nga mensahe. Bisan paano nagatuon man ang alkalde kun paano mag-deliver sang iya mensahe.
Ti-on na nga maghalong ang alkalde sa iya mga statements. Ini bangud nga ginagamit na ini agud palutawon ang impresyon nga mahina sya nga klase sang alkalde. Maathag nga umpisa na ang politika. Maathag nga gusto sang iban may kakulangan ang alkalde.
Kun may isa man ka bentaha si Espinosa amo nga may pagkabugoy sya batasan. Buot hambalon, bisan sa diin mo masumalang pwede mo palapitan kay wala sang madamo nga nagabantay. Sya pa gani ang nagapamakal sang groceries kun kaisa.
Kun mahuyang nga mayoralty material si Joe III ngaa nga kinahanglan pa nga bantayan sya sang iban? Indi ayhan nga haum-haum lang ang kahuyang sang alkalde? Indi ayhan ang nagasiling nga mahina sya amo pa ang mas labaw nga mahuyang?
Ah, sige lang bantayi nyo si Joe III! (jpranco1975@gmail.com/PN)
