NAGAKUOB sila sa ila ginapanaguan, nagalikaw nga masiplatan ang paglabaw sang ila mga ulo gikan sa buho nga ginahamtangan.
Kaangay sini ang sitwasyon sang mga tawo nga sadto naimbolbar sa ginadumilian nga druga, nga kon maglakat sa dalan sila ang ginakakulbaan bangud sa ila kapintas kag indi mapaktan nga paminsaron nga basi maghalit sa iban nga tawo.
Sila sadto ang mga pikahan nga ginalikawan nga masumalang ukon masalapay man lang bangud nga basi magsingki kag magpanghalit. Sila ang sadto nagapatupling sa mga madulom nga bahin kag nagabantay sang ila mga biktimahon. Sila ang mga nagapatupong sa poste kag hinali nga mag-ulhot kag magpangtaya sang kutsilyo ukon pusil kag magdeklarar sang holdap.
Karon nga nagsupog ang gobyerno sa pagtapna sang madata nga ilegal nga druga, ang pagbaligyaanay kag ang paggamit sini, nakita naton ang masanag nga resulta sang kampanya bangud nga nadula na ang kahagnop sa pagpanglakaton sa dalan sa tion sang kagab-ihon.
Nagsagunson ang insidente sang pagpamatay nga ang mga suspek nakasakay sa motorsiklo kag kadamuan sang mga biktima nga nagsungka sadto sa Oplan Tokhang sang kapulisan.
May pasuni nga ang may kahimuan mga drug personality ukon ila grupo nga luyag bawion ang drug trade nga ila ginbayaan sadtong nag-init ang kampanya sang gobyerno batok sa ilegal nga druga, ila ginalimpyuhan ang ila ugsaran gikan sa ila ginakabig nga mga samong ukon posible mangin kakompetensya sa ila negosyo.
May pasuni man nga posible ginasilhigan sang pila ka gung-an nga alagad sang kasuguan ang ila rawit agud wala sang may magamit batok sa ila sa palaabuton, magapabilin nga likom ang ila sikreto.
May pasuni pa gid nga mismo ang mga otoridad ang nagapamatbat sa sini nga mga tawo, apang ang tanan ginapanginwala sang aton kapulisan kag ginpat-ud nga wala sila sang kahilabtanan sa sini nga mga insidente.
Madamo man sang nagkalapukan nga mga suspek nga nagbatu sa kapulisan sang sila ang ginpaidalom sa buy bust operation. May mga kumbinsido apang may mga duduso sa natabu.
Sa pihak sini tanan, ginapabugal sang kapulisan, ilabi na sang Iloilo City Police Office nga nagnubo sang kapin sa 62.50 percent ang crime volume sa syudad umpisa Agosto 31 tubtub Setyembre 6 sa sini nga tuig ipaangid sa kaangay nga panahon sang nagligag nga tuig.
Nakabalhag lang ang ICPO sang 34 ka insidente sang krimen nga mas manubo sang 50 ka insidente sa natumod nga panahon gikan sa 84 ka insidente sa nakaligad nga tuig.
Ginapabugal sang kapulisan ang ila ginahimo nga maximum police visibility kag paghiwat sang checkpoints sa palibot sang syudad.
Kadungan man diri ang masandukot nga buy bust operation nga amo ang nagapapuhag sa mga tawo nga imbolbado sa ilegal nga druga.
Naglipas na ang panahon nga ang nagadominar sa dalanon lunsay mga hurong, mga pikahan kag mga nagapaisog-isog sa dalan. Nagtahaw na ang madata sadto nga mga hubog nga nagalakat sa dalan, ukon ang pagmaoy kag paghalit sa iban. Halos naalimunaw naman ang mga kuging nga nagaduyog-duyog sa kilid sang dalan.
Samtang ginakibang ang nagapakibang, mangin masulhay ang aton lakat sa dalan. (bertladera@gmail.com/PN)
