NAGAPASULOD na kita sa binulan sang mga “ber” kag sa masami masaku na ang paghulag sang mga tawo sa santu man sa naandan nga gawi, mapagsik nga mga pangpanglakaton kag maduagon nga pagsinarayo ang ginapasalig sa aton sang sini nga mga binulan.
Magluwas pa sina, nagapsulod man kita sa panahon sang eleksyon kag lauman na ang pag-amat-amat sang pagsaku sang tanan kag ang nagaynay nga ilig sang kwarta sang mga kandidato.
Luyag naton ipahanumdom sa mga ahensya sang gobyerno kag mismo sa lokal nga pamunuan sang syudad nga dapat hatagan na sang atensyon ang komprehensibo nga plano para sa transportasyon sa syudad. Dapat nasuguran na ang plano kag nalantaw na ang mangin senaryo sa palaabuton.
Indi naton luyag nga mag-agwanta sa panahon sang paskwa nga wala sang masakyan ang mga pumuluyo bangud nga kulang ang kadamuon sang taxi sa syudad. Nangin eksperyensya na sadto pa nga wala sang taxi nga may nagapila sa mga mall ukon sa mga establisemento komersyal sa palibot sang syudad bangud sa kadamo sang pasahero nga nagasakay sa taxi.
Maathag naman nga ginpalayag sang Association of Taxi Operators in Panay ukon ATOP nga kapin sa 300 ka yunit pa sang taxi ang kulang kag dapat nga mapun-an antes pa nga magkaproblema ang tanan.
Madamo na sang mga mall, mga establisemento komersyal kag mga lugar nga ginatipunan ukon ginadugukan sang mga tawo. Tuhay sa una nga panahon nga nakakonsentrar lang sa isa ka lugar ukon sa ilisipon lang nga mga lugar. Sa karon, halos indi na maisip ang kadamuon sang mga lugar nga ginapadulungan sang mga tawo nga ang iban ang malayo sa ruta sang mga dyip ukon nagakadapat nga magsakay sa taxi agud nga wala sang huol ang pagpadulong sa imo pakadtuan.
Dapat nagatamwa na ang plano sang syudad sang Iloilo, ilabi na sang konseho sang syudad nga nagatuon sa sini nga bagay, agud nga makita na sang tanan ang kahimtangan sang sini nga plano kag kon ano pa ang angay nga itugda kon may yara sang kulang nga dapat pun-an.
Mapagsik ang ekonomiya sang syudad, madamo sang negosyo, madamo sang may ikasarang kag posible magka-interes nga magsulod sa negosyo sang transportasyon ukon maga-angkon sang prangkisa agud nga makapabiyahe sang iya mga taxi.
Naglipas na ang panahon nga pila lang ang makasarang mag-invest sa sini nga negosyo. Madamo na sa karon sang intresado, santu man sa kahimtangan sang ekonomiya.
May mga negosyo subong sa transportasyon nga nagasandig sa teknolohiya gamit ang cellphone agud nga mapahapos ang pagpakig-angot sang pasahero sa iya masakyan nga taxi.
Dapat buksan na sang syudad ang iya ganhaan sa mga inobasyon kag inisyatibo. Dapat amumahon sang syudad sa iya ugsaran ang mga nagatan-ay sang higayon agud nga makabulig sa paghatag sang solusyon sa kakulang sang taxi nga masakyan sang mga tumandok, nga dumuluong kag mga bisita.
Samtang ginapadugay sang mga natungdan ang pagdesisyon, may mga pumuluyo nga magabalakhuon, magaantus sa kauyaya, kag magapakunol sa buylo sang ekonomiya sang Iloilo./PN
