MADAMO pa ang wala nagapati sa siling ni Presidente Duterte nga indi gid niya iga-endorso si Marcos Jr. sa pagka-Presidente.
Kita ugaling nagapati nga “Never na!” nga maga-endorso pa si Presidente Duterte kay Marcos Jr. Kag ina bisan pa sa pagkilala naton sa iya pagka-“unpredictable”. Ngaa man?
Tungod ina sa daku gid nga kasal-anan ni Marcos Jr. sa kay Presidente, nga wala gid niya maisip upod sa iya mga trolls.
Ginapakalain niya gali ang administrasyon ni Duterte sa sining tagline, ukon political slogan, nga Bayan Bangon Muli (BBM). In fact, kon ginpaligban gid nila ang buot silingon sini, pang-“opposition” pa gani ining political slogan!
Sa ining tagline ginapahayag ni Marcos Jr. nga wala nangin madinalag-on ang administrasyon ni Presidente Duterte tungod ginapabangon ini ni Marcos Jr. sa iya katulogon, ukon kapaslawan. Nga matuod naman!
In fact, gapati kita nga ina gid man ang paghangop ni Presidente sining tagline ni Marcos Jr. bisan gahipos lang siya parti sini.
Ti, maluyag bala sini si Presidente mamati, labi na gid sa sige pagliwat-liwat sining tagline ni Marcos Jr. sa iya kampanya?
Kon ikaw si Presidente Duterte, may gana ka pa ayhan mag-endorso kay Marcos Jr. nga sige libak niya – kag sang naga-upod sa iya – sa imo sa kada singgit nila sang Bayan Bangon Muli?
Kag wala gid mabasol si Marcos Jr., kon mabisto na ini sang mga maka-Duterte, kundi ang iya makitid nga panghuna-huna. Ina ang luyag naton mangin Presidente ang may makitid sing panghuna-huna? Indi na!
***
Mahuyog si Presidente Duterte maghampang “unpredictable” paagi sa paghatag sang halog nga mga desisyon ukon binutig nga ginabawi-bawi niya.
Tungod sining iya “unpredictability” indi makahulag ukon maka-desisyon sing dale-dale ang iya mga kontra sa pulitika sang kon ano ang ipangontra sa iya.
In fact, ginhimo niya ini sa pinakamasakit gid nga mga paagi – katulad sang pag-atake sa Papa sa Roma sa isyu sang trapiko sa pag-abot sini sa Filipinas kag sa Diyos mismo nga sang ulihi ginbawi-bawi niya. Nagtulod ini sa pagbahin-bahin sang mga halog sa pagtuo nga mga katoliko sa kon ano gid ang pagtan-aw sa iya.
Karon gani ginahimo man ini nga mga taktika sang pila ka kandidato paagi sa mga fake news kag malimbungon nga mga propaganda agud pakalainon ang mga kasumpong.
Kaluluoy gani si VP Leni Robredo sa iya pagdalagan sa pagka-Presidente, tungod sa ginahimo nila nga mga fake news kag malim bungon nga mga propaganda.
Katulad abe sa ila akusasyon nga kuno komunista si VP Leni. Amo man ini ang gin-isyu ni Diktador Marcos sadto batok kay Senador Ninoy Aquino.
Imagine, si VP Leni nangin asawa pa kuno sang isa ka 15 anyos nga komunista. Sus, sobra-sobra na ina ya!
Ang matuod gali kay luyag lang ni Marcos Sr. magtener sa poder. Ugaling indi bilang alagad sang Demokrasya kundi sang isa ka “pasista” nga luyag dulaon sa iya dalanon ang tanan nga nagapamatok sa iya pagginahum.
Si Ninoy Aquino kag ang iya asawa nga si Cory ang matuod gid gali nga maki-Demokrasya, nga sang nangin Presidente ginbalik ang Demokrasya halin sa “pasista” nga pagginahom ni Marcos Sr.
As always, “Truth shall set us free”, amo gani nga napatumba gid man ang “pasista” nga rehimen ni Marcos Sr. Segurado, amo man ina ang matabo sa mga butigon kag sungayan nga mga kandidato!
***
Tungod sini, luyag ta diri ipahanumdum sa sining Semana Santa, labi na gid sa pagkabanhaw ni Kristo (Domingo, Abril 17) kon ano ka importante ang Kamatuoran.
Sa pagkit-anay ni Santo Tomas kag nabanhaw nga Kristo, ginpakita diri kon ano ka importante ang Kamatuoran – sa personal nga pagkakita kag nabatian ang masaligan nga pag-testigo mismo ni Kristo.
Gani Indi lang kita magpati sa sugid sang kon sin-o lang nga kandidato.
Ang dapat patihan kag updan naton amo ang masaligan kag indi ang malimbungon – ang maka-Diyos, may matuod nga ikasarang sa kinaalam kag experyensya, may matuod-tuod nga pagkabalaka, kag may “resibo” sang iya hinimuan.
Indi ang puro pangako lang kag mahuyog magpalupad sing sugilanon!
Indi ta man pag-ibaligya ang aton boto kay indi naton masaligan inang nagabaligya sing boto. Bawion nila inang ila ginasto sa pagpangawat sa gobyerno nga sa bulsa lang nila makadto kag indi sa kaayuhan sang mga pumuluyo. God bless!/PN
