SA TANAN nga survey nga ginpagwa sang kampo ni Cong. Jerry Treñas, milya-mliya ang iya abanse sa iya bilas nga si Mayor Jose Espinosa III sa engkwentro sa pagkaalkalde sa syudad. Kun ikaw ang kandidato, mangin kampante ka na.
Apang ngaa bala nga padayun nga natensyon si Treñas? Kaangay lang bala nga daw hawot-hawot ang iya kadalag-an. Mayoriya sang mga kapitan sang syudad nagasuporta man sa iya. Ngaa daw ginakulbaan pa si Treñas?
Sa tanan nga mga isyu, nagapanagang lang pirme si Espinosa. Kun pamati-an mo ang mga nagkalainlain nga media outlets halos pabor ang linyada sang ila kumentaryo kay Treñas samtang puno naman sang pagpakamalaut si Espinosa.
Ngaa daw ginakulbaan pa si Treñas? Indi pa ayhan sya sigurado sang iya kadalag-an?
Kun tan-awon lang ang aura sang magbilas, daw si Espinosa pa ang kampante kag mas tensyonado si Treñas.
Indi ayhan nga nakita niya ang tuman ka dako nga diperensya sa ila Pre-campaign rallies?
Kun basehan ang nagtambong, mas madamo ang sa kampo ni Espinosa samtang pila lang ang sa rally Treñas. Ngaa ayhan?
Siling sang mga observer possible nga wala sang ginhip-hip sa mga audience ang gobyerno gani gamay lang nagtambong?
Kun pahambalon, bastante sa pondo? Ugaling base bala nga ang ila kwarta amo pa ang magadala sa ila sa kalutusan?
Samtang goody-goody lang si Joe, si Treñas kaangay lang nga ginapamalhas kag tensyunado. Base nakapoy na sila sang bantay sang hulag ni Joe III. Base amo na ini ang ginasiling sang kampo sang alkalde nga tapos na, daug na.
Pahayag sang kampo ni Joe III, amat-amat lang makaabanse gid kita. Indi kinahanglan magdali kag ang nauna amo ang mapaulihi.
Hay ang politika gid tuod, wala sang kasiguraduhan samtang wala pa sang proklamasyon.
Buslot na ang bulsa sang iban kag ang audience nagayuhum-yuhum na lang. (jpranco1975@gmail.com/PN)
