NAGLANOG sa bug-os nga kalibutan ang impormasyon nga gindakop si former President Rodrigo Roa Duterte sang International Criminal Police Organization (Interpol) sa iya pagpanaog sa eroplano gikan sa Hong Kong sadtong Martes, Marso 11, 2025.
Madamo sang nagkahangawa tungod nga ginpasilabtan kita sang dumuluong sa pagpalakat sang aton hustiya sa pungsod. Kon may nahimo sia nga sala, angay nga kasuhan sia sa korte sang Pilipinas kag mga pumuluyo ang magahusgar sa kon ano ang iya ginhimo.
Kon masupog kita magsinggit nga dapat naton pangapinan ang aton teritoryo batok sa mga nagapanglaksam kag dapat amligan ang aton soberanya, ngaa kahapos sa aton magsungka para sa aton hustisya?
Amat-amat nga napukaw ang pumuluyo, liwat nga nagdabdab ang ila emosyon bangud sa nadangatan sang anay presidente.
Madamo sa social media ang nagapahayag nga bisan may nagasawayan sila sa sahi sang iya pagpamalakat sa gobyerno apang nabatyagan nila ang kalinong sang palibot, wala sang katagam nga nagapanglakaton kon gab-i gikan sa obra ukon sa pag-eskwela.
Nabatyagan sang tanan ang kahadlok sang mga hurong sa anay presidente nga bisan mismo ang kapulisan nagatadlong sa ila mga hilikuton.
Kaangay sia sang taming nga nagapangapin sa pumuluyo. Kaangay sia sang isa ka matuod nga amay nga ang handom amo ang maayo nga madangtan sang iya kabataan.
Mismo ang mga pulis kag suldado sa iya panahon ang mas nagpagsik ang ila pagpanerbisyo tungod nga may amay nga nagatatap sa ila, nagasabat sa ila kinahanglanon kag naga-ulikid sa ila sitwasyon.
Indi perpekto ang pagpatigayon sang ‘war on drug’ tungod may mga nasalapay, may nasalabat, may yara sang nahul-an. Indi mapulong ang dalagan sang sitwasyon kon nagahinugasa kag tuman ka sangkad sang ginasolbar nga problema. Apang, ang importante nga mayoriya sang pumuluyo ang nakaagom sang alibyo gikan sa sitwasyon.
Mas madamo nagapabutyag kag nagapamatuod nga mas luwas ang paglakat sa dalan sa bisan ano nga oras sadtong panahon ni former President Rodrigo Roa Duterte.
Mapamatud-an ko ini tungod antes sia nangin presidente sang pungsod, halos alas dos sang kaagahon ako nagapauli gikan sa istasyon sang radyo tungod naga-obra ako sang balita agud nga ibantala sa sina nga aga, madamo sang mga kalalakihan nga ang iban mga pikahan ang kasakay ko sa jeep. Suno sa ila gikan sila sa isa ka barangay sa city proper nga bantog sadto sa presensya sang ilegal nga druga. Nagpanaog sila sa jeep, kapin sila sa pito ka persona, kag nagdiretso sa alagyan pakadto sa Barangay Bakhaw.
Sigon sa ila sugilanon, mahibaluan mo nga lunsay nakadruga. Bwenas lang ako nga wala sang may malain nga ginhimo sa akon samtang kami ang nagasakay sa jeep.
Pag-abot ko sa plaza sang Jaro, may nga nagapungko sa gutter, nagaduyo, pikahan, kag mahibaluan mo nga naigu sang druga.
Makatalagam ang sitwasyon sadtong wala pa sa pwesto si former President Rodrigo Roa Duterte. Halos kada gab-i nagapangalihid ka sa dalan kag nagakahangawa nga basi may maglambat sing hinali kag kon may malain nga matabu.
Sang nakapungko na sia sa pwesto, didto na kag naghawan ang dalan, nakaginhawa ang tanan kag mas kampante, nga bisan maagab-ihan sa dalan, nga wala sang may malain nga matabu.
Liwaton ko, indi perpekto ang ‘war on drug’ tungod may iban nga nag-abuser kag naglapaw sa pagtuman sang katungdanan. May mga nagpalpak, hungod man kag sa indi. Apang, ang porsyento sang benepisyo mas lapaw sa kadamuon sang mga nasalapay kag nahul-an.
Lantawa ang mga balita, sadto bulto kag linibo ang makumpiskar nga ilegal nga druga, subong kinilo-kilo kag milyunes na ang makumpiskar sang kapulisan. Ang mga nadakpan sadto liwat nga nagbalik sa ila lihok sa subong nga panahon kag mas masupog na sila.
Ang pag-arestar kay former President Rodrigo Roa Duterte bangud sa ginapasuni nga krimen batuk sa katawhan isa ka alegasyon nga wala man sia direkta nga may kahimuan. Nagpangapin lamang sia sa mga pumuluyo, sa mga inosente kag gina-amligan niya nga indi mahalitan ang nagasunod nga henerasyon.
Nagtinguha lamang sia nga maserbisyuhan ang pumuluyo kag mahatag ang kutob sang iya ikasarang agud nga maproteksyunan ang pumuluyo batok sa halit sang ilegal nga druga.
Nag-ulikid lamang sia sa mga pulis kag suldado paagi sa paghatag sa ila sang labaw nga importansya, sa ila benepisyo, sa ila sweldo, kag kagamitan agud nga mapapas ang kasumpong sang estado.
Bisan pa nga gindakop sia kag dal-on sa The Netherlands, apang nakatatak na sa paminsaron kag balatyagon sang mga Filipino ang legasiya kag pagpalangga ni former President Rodrigo Roa Duterte.
Nagalaum kita nga may solusyon kag makabalik sia sa pungsod sa madali nga panahon. Nagalaum kita nga makamuklat ang gobyerno nga dapat ipanindugan kag itib-ong ang aton soberanya batok sa pagpasilabot sang mga dumuluong.
Kon nabungkag man ang taming, nakatuon na nga magpangapin ang ginpangapinan.
Ang pisikal nga taming posible nga maguba, apang ang taming sang balatyagon kag sang paminsaron magapabilin nga mapag-on. (bertladera@gmail.com/PN)
