NAGAHINGAPOS na ang kampanya sang mga kandidato para sa Mayo 14 nga Barangay kag Sangguniang Kabataan Elections.
Madamo sang mga kandidato ang liwat nga nagapapili sa ila nga posisyon, may mga bag-uhan nga nagahandom nga makaserbisyo man sa ila komunidad kag may mga punong barangay nga nag-us-os sa pagka-barangay kagawad.
Madamo man sang mga kabataan nga napilitan nga magpapili bilang SK chairman kag SK kagawad, apang may mga barangay nga kulang ang kadamuon sang kandidato para sa posisyon kag may mga barangay nga wala sang kandidato.
Posible nga nagtuhay na ang pag-apresyar sang mga kabataan sa lakat sang pulitika kag indi sila handa nga maghulag upod sa mas may edad sa ila sa pagdumala sa ila barangay. Posible man nga bangud sa karon nga sitwasyon nga mas luyag nila nga wala sila sang salabton kag ginaabaga nga obligasyon sa ila lugar.
Sa bahin sang mga nagapapili sa pagka-punong barangay kag pagka-kagawad, madamo sa ila ang nagasiling nga sila mga mapisan, maalam, masaligan, tampad, mahapos palapitan, handa nga magserbisyo, handa nga magsakripisyo, may plano para sa pagtin-ad sang barangay, katimbang sa kauswagan, kag madamo pa nga mga adbokasiya kag plano agud nga mahaylo ang mga botante.
Importante nga ila mapabutyag ang ila direksyon agud mahibaluan sang mga botante kon ano ang ila katuyuan sa pagpili sa ila barangay.
May yara sang may napamatud-an na, may yara nga wala gid sang may napakita nga mehura kag may yara sang nagapanglubaybay pa sa iya nga pagpanghimanwa.
Matuod nga ind mo maagom ang imo ginahandom nga posisyon kon sadto pa wala ka na naghimo sang maayo sa imo palibot, kon sadto pa indi ka aktibo sa hilikuton sa inyo komunidad, kag kon sadto kaangay lang nga wala ka sang labot sa nagakatabu sa imo nga palibot.
May yara man nga aktibo sa mga aktibides sa barangay apang wala sang huyog nga magpapili, apang ginaduso, napilitan, kag nagpadalagan sa pasalig nga siya ang suportahan.
Tuhay man ang ila kahimtangan, tuhay man ang ila adbokasiya, tuhay man ang ila pagsinarayo sa ila barangay, apang ang talaksan sang botante kon kilala niya ang nagapapili, kon angay nga ibutang sa pwesto kag kon iya matawag sa tion sang emerhensya ukon kasablagan.
Nagapili ang mga botante sang kandidato nga makasabat sa iya kaugalingon nga mga interes, sa kandidato nga iya makapyutan sa oras nga siya ang nagasarurot kag sa kandidato nga iya masaligan sa tion sang kahul-anan.
Indi makapanggas ang kandidato sang hamili nga boto kon wala siya nakatanum sang maayo nga kabubut-on.
Mabudlay magpapili nga sang sini lang nag-aktibo sa barangay bangud nagakatingala ang botante, ginapamangkot ang iya intensyon, kag ginadudahan ang iya ang katuyuan kag ikasarang sa pagserbisyo.
Matuod nga halos nalibot na sang mga kandidato ang ila barangay, nakumusta, nayuhuman kag natamyaw na ang kadamuan sa mga botante, magaboto man ukon indi magaboto sa ila, ang importante nga nagakilala nila ang ila kauglingon kag intensyon.
Sa maabot nga Mayo 14 na ang pagpanggas sa mga bunga matapos nga ginhawanan kag gintamnan. (bertladera@gmail.com/PN)
