PADAYON ang ginahimo nga pagkaayo kag pagpasangkad sang mga dalan. Makapamatuod diri ang kadamuan nga masami nagataris sa mga dalanon sang syudad lakip na sa mga kabarangayan nga ang ila karsada ang ginakay-o man.
Matahum lantawon kon hawan kag wala sang sablag nga masalapuan, tayuyon ang dalagan sang salakyan kag madasig nga makalab-ot sa padulungan.
Ginhandum sang proyekto nga pasangkaron ang dalan agud nga mas matawhay ang pagbiyahe, agud nga indi maatrasar kag agud nga wala sang may masagairan sa dalan.
Ang maayo nga katuyuan ang nangin wala sang kapuslanan bangud sa nagakatabu sa karon sa aton palibot. Madamo sang nagapagusa sa pagdulog sa bisan indi angay nga dulugan, madamo sang nagaparking sa indi angay nga parkingan nga nagaresulta sa liwat nga pagkitid sang dalan kag nagapabudlay sa iban pa nga nagalabay nga salakyan.
Kon sa mga circumferential road ukon access road, masangkad ang dalan apang sa handong nga bahin ginahimo nga temporaryo nga parkingan sang mga dalagku nga salakyan, may mga baligya sa kilid sang highway nga ginadulugan kag gina-idasan kag wala sang may nagasaway rason nga ila na naandan.
Sa bahin sang mga dalanon sa barangay sang syudad, apisar nga nagsangkad ang dalan kag sementado na apang ang saw-id sa kilid ang indi madula. Madamo sa gihapon sang mga salakyan nga guba nga ginahimo talyer ang dalan, madamo sang traysikad ukon traysikol sa kilid kag ang nagalabay amo ang nagapangalihid.
Tion na nga dapat disiplinahon ang mga pumuluyo nga indi nila paghimuon nga kabahin sang ila ugsaran ang dalan, indi na pagbularan, indi paghimuon nga kaugalingon nga parkingan, indi paghimuon nga lugar sa pagpasundayag sang ila salakyan.
Dapat man ipatudok sa mga opisyales sa barangay nga may katungdanan sila nga ipabilin ang kalinong kag katawhay sa ila nasakupan kag kabahin diri ang matawhay nga pag-ilig sang trapiko sa dalan kag ang mga nagalabay indi masablagan.
Ipahangop dapat sa mga opisyales sang barangay nga katungdana nila nga tapnaon ang indi husto nga gawi sang ila pumuluyo, dapat disiplinahon nga ang dalan indi nila pagsablagan, kag gamiton nila ang ila poder agud nga wala sang may mag-abusar sa dalan.
Tion naman para sa city government nga liwat nga magpaminsar sa kon ano ang dapat nga himuon, kag magbalay sang mga polisiya nga makahatag sang solusyon sa sini nga palaligban.
Dapat tapnaon sang city government ang ilegal nga pagparking, dapat ipatuman ang mga ordinansa sa trapiko kag ipatudok ang disiplina sa tawo.
Kon magpiyong ang gobyerno sa nagakatabu, wala sang masangkad nga dalan para sa mga dungol kag ulugtasan.
Yamuhaton nila ang gobyerno paagi sa pagpasaway, kadlawan nila ang nagadumala nga indi makadisiplina sa ila.
Nagalaum kita nga hatagan importansya kag daku nga balor ang katuyuan kon ngaa ginpasangkad ang dalan, kon ngaa gingastuhan kag kon ngaa ang proyekto ginpatuman.
Kuntani indi mangin bulag ang city government kag mga barangay official sa ila palibot, kuntani indi nila pagtugutan nga ang sementado kag ginpasangkad nga dalan mangin wala kapuslanan bangud ginhimo nga parkingan. (bertladera@gmail.com/PN)
