MATAPOS ang kapin pito ka tuig nga pagdulog sang liga sang mga kababaihan nga mamalidha, liwat ini nga nagbangon, nagtingob kag nagpagsik paagi sa paghimakas sang isa ka pinasahi nga lider nga Ilongga.
Ginsumpong ang hangkat sang pandemya, ginpadulungan ang kada rehiyon kag probinsya agud pukawon ang mga mamalidha nga kababaihan agud nga maghugpong. Bisan makapoy, ginbatas, ginhimakasan nga matigayon ang tanan agud nga mabugkos ang kababaihan kag mangin lehitimo nga organisasyon.
Ginbatuan sini ang kabudlay, gin-atubang ang mga pagpangkat kag tuman ka damo nga talakladon nga mga hilikuton tubtob nga nagmadinalag-on.
Nangin maragtason ang tanan kag napagkit na sa kasaysayan nga may isa naman ka Ilongga nga nagpangibabaw bilang lider sang kakabaihan nga mamalidha sa gobyerno-nasyunal.
Sa masobra pila ka gatus ka mga kababaihan nga mamalidha sa bug-os nga pungsod, gintib-ong nila bilang presidente sang Lady Local Legislators’ League (Four-L) of the Philippines si Iloilo Vice Gov.
Christine “Tingting” Garin.
Ginhiwat ang National Summit sadtong Agosto 10-12, 2023 sa Century Park Hotel, Malate, Manila. Kadungan sini ang ratification sang amendments sang Constitution and By-Laws sang sini nga liga kag ang pagpili nila sang ila national officers.
Nangin kapalaran na ni Iloilo Vice Governor Christine “Tingting” Garin nga magpapili nga wala sang kasumpong. Nagpapili siya nga mangin presidente sang Four-L Philippines nga wala sang kasumpong. Kaangay man ini sadtong nagpapili siya sa sining iya ulihi nga termino bilang bise gobernador sang nagligad nga eleksyon nga wala sang kasumpong.
May tema ini nga “Four-L Philippines: Revitalized and United for a Brighter Tomorrow”. Bangud ini sa nasiling na nga kapin pito ka tuig nga nagdulog ang liga kag liwat nga nagtingob, nagpagsik, naghimakas para sa mas masanag nga bwas-damlag. Luyag sang kababaihan nga mamalidha nga ipakita ang ila kusog kag importante nga papel sa pagduso sang mga adbokasiya nga makahatag sang benepisyo, indi lang sa ila nga mga kababaihan kag kabataan kundi para sa tanan nga pumuluyo.
Madamo sang mga national officials ang nagtambong kag nagpadala sang iya mensahe si Vice President Sara Duterte nga nagapanginbulahan sa liga kag nagsiling nga ang ila lihok patimaan sang nagakusog nga kababaihan nga mamalidha.
Samtang, nagpadala man sang video message si President Ferdinand Marcos, Jr. nga nagapanginbulahan sa mga delegado sa madinalag-on nga paghiwat sang summit. Ang pagtililipon isa ka higayon sa kolaborasyon sang kada isa sa pagpasar sang mga ordinansa na nakalinya sa national development agenda.
Nanumpa sa ila katungdanan ang bag-o napilian nga mga officer sa kay Atty. Benjamin “Benhur” D. Abalos, Jr., Secretary of the Department of Interior and Local Government (DILG).
Ang bag-o napilian nga officers amo sanday Vice Governor Christine “Tingting” S. Garin sang Iloilo Province bilang President, City Councilor Kate Coseteng sang Quezon City bilang Vice President, Board Member Mila Catabay Lauigan sang Cagayan Province bilang Secretary General, Vice Governor Mei Ling Quezon sang Siquijor Province bilang Treasurer, Board Member Patri Chan sang Zamboanga del Norte bilang Auditor, Vice Governor Glenda Ong Bongao sang Albay Province bilang PRO, Board Member Karla Adajar sang Laguna Province bilang Vice President for Luzon, kag ang Board of Directors for Luzon amo sanday Vice Governor Cecile Araneta Marcos sang Ilocos Norte Province, Vice Governor Jaq Khonghun sang Zambales Province, Vice Governor Diana Apigo Tayag sang Occidental Mindoro Province, kag Board Member Marie Rose Fongwan Kepes sang Benguet Province.
Ang Vice President for Visayas amo si Vice Governor Maricar Sison Goteesan sang Eastern Samar Province, kag ang Board of Directors for Visayas amo sanday Vice Mayor Myra Colis sang Mabini, Bohol, Vice Governor Rose Emilia G. Mercado sang Southern Leyte Province, Board Member Tata Corominas sang Cebu Province, kag Vice Mayor Analiza Tabujara sang Cauayan, Negros Occidental.
Ang Vice President for Mindanao amo si Board Member Charina Izquierdo Isahac sang Sulu, kag ang Board of Directors amo sanday Board Member Cecile Diel sang South Cotabao, Vice Mayor Josephine Mariscal sang Sta. Maria, Davao Occidental, SB Member Djaam Macarambon sang Kolambugan, Lanao del Norte, kag SB Member Rebecca Hampac sang Veruela, Agusan del Sur.
Pinasahi nga liderato ni Iloilo Vice Governor Christine “Tingting” Garin ang nagtib-ong sa iya sa nasyunal nga posisyon nga pangunahan ang mga kababaihan nga mamalidha sa bug-os nga pungsod.
Dalayawon ang mga Ilongga nga ginakilala ang kinaiya bilang lider sang pungsod.
Nahurma kag napagkit sa maragtas ang ngalan ni Iloilo Vice Governor Christine “Tingting” Garin nga nagapanguna sa nasyunal nga organisasyon sang mga babaye nga mamalidha sang pungsod. (bertladera@gmail.com/PN)
