NANGIN tuman ka daku nga higayon para sa mga pumuluyo, ilabi na sa mga nagatrabaho sa gobyerno nga makapaliwa-liwa kag pun-on sang handumanan ang malawig nga panahon nga wala sang trabaho.
Ang iban sadtong Miyerkules Santo pa lamang, bangud nga half-day ang trabaho, temprano na nga nagbiyahe padulong sa ila natalana nga destinasyon agud nga temprano man nga makapalagyo sa nawong sang trabaho kag makakita sang tuhay nga lalantawon nga makahatag sang preska nga paminsaron kag komportable nga balatyagon.
Nagpabor pa gid ang panahon tungod nga ang Lunes, Abril 10, gindeklarar man nga holiday tungod nga ginsaylo ang pagkomemorar sang Araw ng Kagitingan. Nangin mas malawig ang pagpahuway sa trabaho, mas nakatipon sang panibag-o nga kusog, kag preska nga motibasyon sa pagtrabaho ang mga empleyado.
Ginakabig ini sang mga eksperto nga ‘revenge travel’ sang mga pumuluyo nga kapin sa tatlo ka tuig nga gindalukan sang higayon bangud sa pandemya. Ang kauhaw sang tawo nga magtamba-tamba sa tubig-dagat ukon sa swimming pool ang makita sa ila entusiasmo sa pagdayon sang ila natalana nga biyahe.
Naghatag man ini sang kabuhi sa mga negosyo sa palibot. Nakaganar ang mga tourist destination, inland kag beach resorts, lakip ang cottage industries nga nagkalit man sa pagbaligya sang ila mga produkto bangud sa pag-antisipar nga madamo ang magalagaw nga pumuluyo kag mahatagan man sila higayon nga mabaklan ang ila produkto.
Nabuligan ang magagmay naton nga mga negosyante, kaangay sang mga manugbaligya sa banwa sang Leon, sa Igbaras, kag iban pa nga kabanwahanan sa probinsya sang Iloilo. Indi man magpaulihi ang probinsya sang Guimaras tungod gindugukan man sila sang mga pumuluyo gikan sa probinsya sang Iloilo kag iban pa nga luyag man manaksihon sa ila ginahiwat nga pagtaltal sa Balaan Bukid.
Madamo man ang naghingagaw nga makabiyahe padulong sa isla sang Boracay kag ang iban nagdiretso sa probinsya sang Negros Occidental.
Nagasinumbali lamang ang nagabiyahe, gikan diri padulong didto, kag gikan didto padulong diri.
Nagresulta ini sa masobra 600 mil ka mga pasahero nga nagbiyahe nga nagtabok-tabok kag pagwa-pasulod sa mga probinsya sa palibot sang Western Visayas.
Nakabalhag ang Philippine Coast Guard (PCG) diri sa Western Visayas sang 612,259 ka mga pasahero umpisa Abril 2 tubtob udto sang Domingo, Abril 9. Sa sini nga kadamuon, 259,915 ang outbound passengers kag 353,064 ang inbound.
Madamo sang mga nagabiya sa ila probinsya ukon outbound passengers ang nagapadulong sa iban nga probinsya ukon inbound passengers.
Namutikan sang PCG-WV nga samtang nagahilapit ang mga kahiwatan may kaantanan sa Semana Santa sa isa ka lugar, mas nagadamo ang nagapasulod nga mga pasahero sa partikular nga probinsya.
Kon kaisa, ang iban nga wala sang plano, hinali lang nga magdesisyon kag magbiyahe tungod nga nakita nila sa social media ang ginahimo sang iban kag luyag man nila ma-eksperyensyahan, para may isugid sa iban, may i-post sa social media kag agud indi mauyang ang ila panahon sang pagbakasyon.
Matuod nga ang esensya sang kwaresma sa karon nga panahon amo ang pagbakasyon. Ginakabig sang iban nga pagpamalandong man ang pagpadulong sa isa ka lugar agud nga magpakalinong, mag-relaks kag maghatag sang tion para sa kaugalingon nga hilway sa mga palaligban sa trabaho kag sa palibot nga gina-istaran.
Para sa iban, ang paghangaw-hangaw isa ka sahi sang pagpamalandong. Ilabi na kon tingob ang pamilya, naga-bonding, kag nagatuga sang isa ka tumalagsahon nga handumanan sa kabuhi.
Indi naton mabasol ang tawo kon kalitan nila ang panahon sang kwaresma agud nga maka-eskapo sa madamo nga palaligban sa pagpangabuhi.
Lauman naton nga sa masunod nga mga tinuig, mas madamo ang magabiyahe kag mas magagutok ang mga lugar nga ginakadtuan. Posible nga may pagpasangkad nga matabu ukon may bag-o nga magatuhaw nga mga establisemyento.
Mas pilion sang mga nagasunod kag sining ulihi nga henerasyon nga hiwaton ang pagdumdom sang kwaresma sa iban nga lugar nga malayo sa ila ginapuy-an, kag sa mga inland kag beach resorts.
Magapadayon ang tuhay nga sahi sang pagpamalandong sang mga pumuluyo, kaangay sa nagakatabu karon.
Magapadayon man ang pagpanawagan sang simbahan nga dapat magsimba kag mag-upod sa mga lihok nga ginahiwat sa simbahan.
Apang, mas magapangibabaw diri ang huyog sang tawo nga didto magkadto sa beach tungod nga ini na ang ila naandan kag daw kaangay nga nasubli nga lihok gikan sa ila ginikanan kag pamilya.
Padayon nga kalitan sang pumuluyo ang panahon sang kwaresma nga mangin panahon sang pagbakasyon, panahon sang pagtililipon, kag panahon nga mangin turista sa iban nga probinsya. (bertladera@gmail.com/PN)
