NANGIN magansal sa aton dulunggan ang mga hitabu sang damlag lamang kag sang tinalikdan lang angot sa insidente sang pagpangluthang.
Wala sang may nagakalipay sa tion nga may ginapatay nga tawo. Indi kita ka husgar sa kon ano ang iya kinaiya bilang isa ka persona kag indi naton matungkad ang motibo sang tagpangamot sa krimen magluwas lamang kon madakpan kag magtuad kon ngaa nahimo niya ang pagpatay.
May nagasiling nga nagahulat na lamang ang laya nga puno sang kahoy kon san-o ini matumba, ayhan paagi sa makusog nga hangin ukon sa hungod nga pagtapas agud nga matumba na kag indi na makatuga sang peligro sa iya palibot.
Madumduman sang tanan nga nagpaggwa ang administrasyon ni Duterte sang ngalan sang mga punong barangay nga yara sa ila nga narco-list kag isa sa nalawagan amo si anay Punong Barangay Gemma Calzado nga lubos nga nagpanginwala sa iya kahilabtanan sa anuman nga aktibidades sa ilegal nga druga.
May mga natingala man kon ngaa ang mga ngalan nga ila ginalauman ang wala nalawagan kag nagadudad sa sistema sa paglakip sa ngalan sang mga persona nga ginadudahan may kaantanan sa ilegal nga druga.
Apang kon akon maglantaw, posible nga ginhungod yadto agud nga mga bantog nga persona nga wala ginlawag ang magapati sa ila kaugalingon nga limpyo na sila, nga pwede na sila makalagaw kag may kahilwayan na sa paggwa sa ila ginahukmungan.
Gin-ila sila sang panahon, makanay, kalmante kag wala sang kabalak-an. Apang sa mga panambiton sang mga tigulang, may yara sang magalagabong sa tuman ka tingil nga kalinong. Kag didto natabu ang wala ginalauman.
Ginkibot ang tanan sadtong hapon sang kapiyestahan ni San Juan de Bautista bangud naglanog ang balita nga si Punong Barangay Remia Prevendido Gregori ang ginluthang sang wala nakilala nga mga suspek. Ginsulod siya sa ila hulot sa beach resort sa bahin sang San Joaquin, Iloilo.
Wala sang maathag nga indikasyon nga may matumod nga mga suspek nga nagadamo sa pulo ka persona nga sakay sa duha ka Toyota Vios kag may nagasunod pa nga motorsiklo.
Ginsundan ini sang raid nga ginpatigayon sa Barangay Tanza Esperanza, City Proper kag pagkarekober sang pila ka armas-luthang kag ang pagkapukan ni Andrew Altas nga ginapasuni nagbatu sa kapulisan rason nga naluthangan.
Sa mga ginadudahan nga mga persona nga imbolbado sa ilegal nga druga apang wala nadala sa ginpanglawag sang sining ulihi lang, sila karon ang nagabatyag sang kakugmat, nagakabalaka nga sila ang basi maabtan man sang indi manami nga kapalaran.
Ang mga hitabu nga aton nakita kag nabatian ang magapalab-ot sang mensahe sa mga persona nga imbolbado sa ilegal nga druga nga ang listahan kag ang lawag tuhay nga bagay kag indi makapanas sa ila kahilabtanan, akuon man nila ukon ipanginwala.
Sin-o ayhan ang mga nagluthang? May yara bala sang nagasakay sa sirkumstansya agud nga dudahan kag ibasol sa gobyerrno ang natabu? Ukon, posible ayhan nga nag-unyat sang kusog ang gobyerno?
Maathag nga sa mga nagkalahinabu sila ang ginpakampante kag gin-atake. (bertladera@gmail.com/PN)
