SUGOD Marso subong nga tuig, hinali nagbag-o ang pangabuhi sang kalibutan. Ini tuga sang paglapnag sang coronavirus nga amo ang nagdala sang COVID-19. Hinali nagbag-o ang sitwasyon sang tanan. Pagbyahe, okasyon, pagtuon kag madamo pa.
Masakit paminsaron nga ang kabuhi natun ginakontrol sang isa lang ka virus. Kaangay nga gin-ulipon kita nga ang hulag sandig sa dikta sang ara sa ibabaw nga pamunuan. Napanas ang atun kultura kag tradisyon bangud sang pandemya.
Halimbawa lang nga diri sa syudad sang Iloilo wala na kita nakasaulog sang atun Charter Day sadtong Agosto. Samtang sa bug-os nga pungsod, gindumilian ang pagbisita sa mga patyo sadtong Pista Minatay. Ini kuntani ang higayun nga makatipon ang pamilya apang ini ginpunggan sang sining pandemya.
Subong nga Disyembre, ginadumilian man ang pagsaulog sang mga Christmas parties kag pagtipon agud sug-alawon ang bag-ong tuig. Bisan ang tradisyunal nga Misa de Gallo apektado man.
Tanan natun nga hulag ginamando sang ara sa ibabaw. Ini sa tuyo nga malikawan ang malapnagon nga paglatun-laton sang virus. Ini mga mando dala man sang pamahog sang virus.
Sa Enero sa masunod nga tuig, wala naman sang Dinagyang sa Kalye. Sa baylo virtual na lang ang tanan.
Ang pinakamabudlay subong amo ang sistema sang edukasyon. Tanan nagapabutyag sang kabudlay bangud sang modular, online ukon ang mga radio-based kag TV-based learnings.
Tanan natun nga naandan ginpanas gid sang pandemya. Kun indi kita mangin mahinalungon, makatalagam nga base kita man panason ni pandemya./PN
