NAGPAUKOY sa malawig nga tinion. Naglikaw sa paglantaw sa iban nga higayon. Nangin komportable sa matag-adlaw nga hilikuton.
Ginpamuklat sang trahedya nga natabu sadtong Agosto 3, 2019 ang mata sang kalibutan. Madamo sang luha ang nag-ilig bangud sa kasubo kag bangud sa makahalusbo nga hitabu.
Napagkit na sa maragtas sang mga trahedya ang kamatayon sang 31 ka persona. Kabahin sila sa mga nagsakripisyo sang ila kabuhi agud matalupangdan ang madugay na nga ginapabuyan-buyanan kag ang pagsalig sang gobyerno sang Guimaras sa nagasumpong sa hangin kag balud nga mga sakayan.
Sa nasiling na, ang buron nga mata magaathag kon ini ang mahugasan sang luha. Bangud sa trahedya, mas natalupangdan ang mga bagay nga dapat ginhatagan sang prayoridad, ang mga bagay nga dapat ginsunod kag ginpatuman, ang mga kakulangan nga dapat pun-an kag ang mga pag-imprubar nga dapat naaguman.
Masakit kuntani paminsaron kon ngaa kinahanglan pa nga may mautas nga kabuhi lamang nga mabalikdan ang kakulangan, lamang nga atipanon ang mga bagay nga dapat unahon. Ginhalad nila ang ila kabuhi sa altar sang pagkamarasmas agud nga makamurarat ang mga yara sa poder nga pasulabihon ang pag-amlig sa mga nagatabok, nagapakadto-pakari, sa Iloilo kag Guimaras.
Tion na nga magpangisog ang Guimaras provincial government nga ipakigbato kag ipasulabi ang pagtukod sang taytay bilang alternatibo nga alagyan nga magamit sang pumuluyo. Kahibalo kita nga ang taytay indi solusyon nga wala na sang may madisgrasya, kundi ang taytay makabulig sa pagpahagan-hagan sa magaluntad nga disgrasya bangud wala sang sin-o man nga tawo ang makapakot sa mahimo matabu apang may ikasangkol kita nga makapangita sang paagi nga makalikaw ukon mahagan-hagan ang daku nga kahalitan.
Sa malawig nga panahon, nahigot ang probinsya sang Guimaras sa biyahe sang sakayan bangud wala na sang paaliwansan, wala na sang iban pa nga alternatibo kundi magkomporme sa sini nga sahi sang transportasyon. Apang kon analisahon, mahinay ang pagtin-ad sang Guimaras bangud sa sahi sang transportasyon may yara sila. Nahadlok ang gobyerno sang Guimaras sa reklamo sang mga nagapangabuhi sa sakayan kag sa mga sumalakay. Diri nahigot ang ila kamot kag panimuot rason nga nagasunod na lang sila sa huyog sang mga tawo sa sini nga sektor sang transportasyon.
Mahimo man lang gali nga makabiyahe ang mga fastcraft kag mga roro. Mas madasig, mas luwas, kag wala sang kontra-tyempo ang pagtabok sa dagat. Kahibalo man gali ang provincial government maglantaw sa iban nga opsyon. Nakamuklat na ang provincial government nga indi nila dapat pag-idaluk sa iban ang higayon nga sila ang maserbihan. Indi sila dapat magtulok lang sa interes sang mga sakayanon kundi sa interes man sang bug-os nga pumuluyo sang probinsya.
Madamo sang plano ang wala gintuman ukon nahatagan sang katumanan kaangay sa mga promisa sadto sang gintukod ang mall kag ang bag-o nga dungkaan. Wala sang ferry boat nga nagtuhaw. Mahimo nga nagapanukot lang ang panahon sa mga promisa nga wala natigayon.
Mas masakit maglahog ang kapalaran bangud madamo sang kabuhi ang nahul-an.
Kabay nga makamuklat na ang pumuluyo kag gobyerno sang Guimaras kag ang palaabuton makita nila sang maathag matapos nga sila ang ginpukaw sang sirkumstansya. (bertladera@gmail.com/PN)
