KAANGAY sang manugpangisda nga nagapaniguro sang madamo nga hulik, iya ginsabwag ang iya nga lambat sang nakita sini nga may nagapunong nga mga isda.
Antes pa man sini ginhabyog ang iya lambat, iya na ginlantaw kon sa diin posible nagahukmong ang mga silikpawon agud nga kon iya na mahabyog kag mahunos may yara na siya sang madamo nga hulik.
Kasubong sa mga istratehiya sa patag sang pulitika. Ang mga may huyog nga magpapili ang temprano pa nga nagalakbay sa banas nga dapat usuyon, ginahulong-hulong ang palibot kag ginabulubanta ang kadamuon sang mga tawo nga mahimo sini malabayan.
Madugay na nga naplastar sang magbilas ang ila mga tawo nga nagasakdag sa ila. May grupo na ang tagsa-tagsa kag makabig nga lunsay may mga makinaryas kag may pwersa nga handa sa pagsugod sang panahon sang kampanyahanay tubtub sa adlaw sang piniliay.
Lantawa ang sitwasyon, ang wala kay Mayor Jose Espinosa III didto sa kay Cong. Jerry Treñas. Ang nagalas-ay kay Mayor Espinosa didto naman nagapahamot kay Congressman Treñas.
Sa umpisa pa lang, sila na nga duha ang nagsalida sa ibabaw sang entablado sang pulitika, sila ang nagapasundayag, kag sila ang nagapanguna nga karakter. Sa pagbukas sang telon kag sa pagtakop sang telon, ila nga duha nga nawong amo ang ang kitaon.
Nagsugod sa pahayag nga sakdagon sang isa ang kandidatura sang isa, tubtub sa panahon nga nagsipak sila kag naghandom sa isa lang ka posisyon.
Didto na sila nag-agaw sang eksena, ang ila banggi-anay sa istorya, ang pagpangamras sang isa kag ang pagpa-ukoy sang isa.
Makalilingaw nga lantawon rason nga nabuyo man ang nagaplano nga mangin oposisyon. Ginalantaw nila kon mangin malala ang away sang magbilas kag luyag nila nga mag-upod sa ila kadampig agud lupigon ang ila kasumpong.
Ginpahulat sila sang ila ginakabig nga kadampig tubtub sa naghingapos ang panahon nga makahimo sang desisyon.
Samtang sila ang nagahulat, ang magbilas ang wala untat sa pagpanglambat sa mga mangin ila tagsakdag, wala untat ang ila paglibot sa mga barangay kag masaku ang ila nga listahanay.
Himuon naton nga ehemplo ang 100 lang ka botante. Kon nalista ang 50 sa kay Espinosa kag ang 50 kay Treñas, ano na lang ang ilista sang ikatatlo nga grupo?
Kon ihambal naton nga indi tanan yara sa ila apang posible nga ang mayoriya yara sa ila bangud temprano pa sila nagpanikpaw kag kon may mabilin gid man nga indi sa ila, posible nga ilisipon na lang.
Tandaan nga sila ang yara sa poder, sila ang ang nagagamit sang resources – tawo, badyet, kag kagamitan – sang gobyerno agud nga mas mangin malapit sa mga tawo.
Wala naton ginahikayan ang nagahimakas bangud posible ang ikatatlo nga grupo may yara man sang ginatago nga sikreto nga pampalipong sa ila mga kasumpong, apang ang paghulat magapapugday sa kapagsik sang mga nagahulat.
Lantawa liwat kon bala ini ang istratehiya sang magbilas agud nga indi makaplastar ang ila mangin kasumpong.
Paano ka pa makapanginpadlos kon nalakip ka na sa ila nga ginpukot? (bertladera@gmail.com/PN)
