NAGTAHAW na ang kagansal nga nagapatunga sa magtimbang nga bahin. Napintukan na ang malawig nga sugilanon. Naathagan na ang buron nga sitwasyon. Nasanagan na kon kanday sin-o ang magapapili sa sini nga eleksyon sa syudad sang Iloilo.
Matuod nga tuhay ang sitwasyon karon kaysa sa kinaandan tungod nga sadto temprano pa ginaplastar na ang mga magapapili sa linyada apang karon daw makahalawat-hawat tungod mismo sa ulihi na nga adlaw sang pag-file sang certificate of candidacy gina-anunsyo kon kanday sin-o ang malakip sa grupo.
Makahalawat-hawat tungod nga nagalaum ang tanan nga magapapili si former Mayor Jed Patrick Mabilog bilang alkalde sang syudad sang Iloilo. Apang, nabatian sa iya mismo nga pag-anunsyo nga indi siya magkandidato.
Kon aton lantawon, sa una pa lang, kahibalo kita nga indi na siya makapapili bangud sa iya ginapangatubang nga kaso. Kahibalo man kita nga mabali lamang ini kon hatagan siya sang pasaylo sang Presidente sang pungsod agud matugutan nga makapapili. Napaslawan siya bangud sa malip-ot nga panahon kag nagapati siya nga may nagapugong tungod nga isa siya ka sablag sa handom sang iya mangin kasumpong.
Kon padalman naton ang mga hitabu, ginwahig ang grupo ni Congresswoman JamJam Baronda kag gin-anunsyo nga may mangin kasumpong siya sa pagka-kongresista. Tungod sini, nangita siya sang paagi kon paano pangapinan ang iya kaugalingon gikan sa sini nga mga hangkat sa iya posisyon.
Sa kon ano man nga mga sirkumstansya, nag-abot sa syudad sang Iloilo si former Mayor Jed Patrick Mabilog kag naghatag sang mapag-on nga suporta kay Baronda. Ang iya ginakahidlawan nga presensya nagbulong sa kamingaw sang mga Ilonggo. Nagpapagsik ini kag naghatag sang paglaum sa ila agud nga makalampuwas sa matalom nga kuko sang pamigos kag pamahog.
Nakita sang mga pumuluyo ang higayon nga may makatapna na sa pamigos kag pamahog. Nakita man nila nga may maisog kag masupog nga nagapahayag sang pagpamatok sa mga polisa nga indi paborable sa mga pumuluyo.
Tungod sini, nahuman sa pinsar sang kadamuan nga mangin hugot nga kasumpong sa pagka-alkalde sa syudad sang Iloilo si former Mayor Jed Patrick Mabilog.
Sa nasiling na, nagtinguha man siya nga masabat ang hingyo sang pumuluyo apang may mas makusog kag gamhanan nga mga kamot nga nagakumpas sa ibabaw nga amo ang nagpugong nga matuman ang iya handom suno sa iya.
Kon napaslawan man siya nga makapapili, nagmadinalag-on man siya nga maligwat ang konsentrasyon sang pwersa nga nagatuyo nga magrumpag sa pwesto ni Congresswoman Baronda.
Bangud sa eskrima sang pwersa, nagliwat ang plastar sang kasumpong ni Baronda. Nag-ugyon sa iya ang panahon, higayon, kag sitwasyon.
Kon may yara man sang pwersa gikan sa ibabaw, normal ina tungod luyag nila nga mapreserbar nga tingob ang mga dalagku nga syudad kag probinsya. Luyag nila nga indi mabudlayan sa pagplastar para sa ila masunod nga mga plano.
Kahibalo naman kita nga ang midterm election amo ang magasugid sa sitwasyon sang Presidential Election. Dapat subong pa lang makalaging na ang mga kandidato kag posible nga mga mangin kaalyado.
Indi luyag sang ibabaw nga magarot kag damo sila sang atubangon ukon istoryahon nga mga personalidad. Mas mahapos kon nagatingob agud nga madasig ang pagpatuman sang ila mga plano kag programa kag mas may garantiya nga mangin madinalag-on ang ila katuyuan.
Masiling naton nga naareglo ang magtimbang nga bahin. Nahisugtan ang mga posisyon nga wala sang kasumpong.
Madamo man sang nalugaw-an apang talalupangdon ang pagtahaw sang init sang emosyon. Kaangay nga daw ginsabyahan ang nagadaba-daba nga kalayo. Apang padayon nga naga-aligmat ang kada isa sa posible liwat nga pag-ibwal sang kalayo tungod nga may nabilin pa nga baga sang emosyon sa dughan sang kada isa.
Kon pasangkaron naton ang aton panan-awan, kon dulaon lang naton ang ekspektasyon, makita naton nga daku ang nabulig ni Mabilog sa pagpugong sa madugmukon nga pwersa. Nakabulig siya nga maliso ang sentro sang puntirya, nahugpong niya ang mga indibidwal nga may isa ka handom kag kawsa para sa pagserbisyo sa mga Ilonggo.
Nasalbar ni Mabilog ang Team Gugma kag iya ini nga naduso agud nga magsulong padulong sa mas masanag nga kadalag-an.
Indi man magbiya si Mabilog. Padayon siya nga maga-upod sa iya grupo, magalibot sa kabarangayan kag magatib-ong sa ila agud nga maagom nila ang ila handom nga makaserbisyo sa pumuluyo.
Wala sang kapaslawan nga natabu kundi kadalag-an, tungod nga napahagan-hagan niya ang tum-ok sang pwersa, napadulog niya ang habyog sang pwersa, napatingob niya ang mga kawsa kag adbokasiya, kag makapasanag siya sa mga isyu nga dapat tutukan kag hatagan sang solusyon sa nagakaangay nga panahon.
Magapabilin si Mabilog nga haligi nga may kapag-on, magabantay sa tanan nga tion, salandigan sang mga ginakapoy kag ginapigos kag magatipon sang pwersa para sa liwat nga pagpanumbalik sa pagserbisyo bilang amay sang syudad sang Iloilo. (bertladera@gmail.com/PN)
