DAW KA DASIG lang sang tanan nga hitabo sang nagligad nga semana. Naglupad ako pakadto Cebu sang Hueves. Wala maligaran isa ka adlaw nagbalik man dayon. Viernes. Dasigay lang pero ang matahum sina kay dala ko ang kadalag-an sang akon inobrahan.
Isa ako ka journalist. Broadcast journalist to be exact. Journalism ang tawag sa obra sang mga journalist. Sa ila ginatugyan ang pagtipon sang data kag iban nga current information para mapahibalo ang public sang nagakalanabo sa palibot. Kon kaisa, indi maayo ukon makabahala ang information nga natipon. Kon kaisa makakilibot. May mga bes nga makasiligni ang balita. Apang may mga balita nga “inspiring” man.
Ginatipon sang journalist ukon journo (informal ukon slang sang journalist) ang mga kasayuran kag ginapahibalo sa publiko para makahimo ang publiko sang nagakadapat nga aksyon o desisyon sandig sa natipon nga information.
May mga kahigayunan nga daw sa ginapuga ka ukon mabudlayan sang tuman sa paglagas sang balita kag makahingabot lang sa deadline.
Dako na nga kalipay kon may magmuno na nabasahan nila ang imo sulat o nabatian ang imo gin-report.
Wala man sa ginapangita namon ang pagpasalamat sang publiko, pero, siempre lain man kon matalupangdan.
Humalin sang 2012, ang Globe Telecom nagakilala sang contribution sang journalists sa katilingban paagi sa Globe Media Excellence Awards (GMEA). Nagsugod ang pagkilala sang mga excellent output sa Cebu sa pagsaulog sang peryodista o journos didto sang Press Freedom Week (malapit sa mga inadlaw sang anibersaryo sang deklarasyon sa Martial Law nga nag-ipit sang kahilwayan sang press). Sang 2016, ginpakamaayo nga ang GMEA pasangkaron sa iban pa nga rehiyon sa Visayas kag sa Mindanao.
Karon nga tuig, pila ka Iloilo-based journalists ang nakalusot sa finalists, ini’ng inyo alagad, isa na, bisan nga gin-dominate sang Cebu-based journo sang kadalag-an.
Suno kay Yoly Crisanto, Senior Vice President for Corporate Communications sang Globe, napulo’g isa (11) ka winners ang ginpili sang anum ka respetado nga hurado kag siyam ka screeners nga nagbusisi sang mga entries nga ginsumite.
Ang mga hurado amo sanday Ahmed Cuizon, Regional Director sang Land Transportation, Franchising and Regulatory Board (LTFRB) Region III; Auke Idzenga, Chief Executive Officer sang Alternative Indigenous Development Foundation Inc.; Maria Lea Lara, executive director sang Iloilo Business Club; Atty. Jocelle Batapa-Sigue, co-founder sang National ICT Confederation of the Philippines (NICP); Sarah Santiago, editor-in-chief sang Wonder.ph; kag Eileen Mangubat, senior lecturer sa University of the Philippines Cebu nga sadto anay publisher kag editor-in-chief sang Cebu Daily News/Inquirer Publications Inc.
Ang screeners gikan sa academe amo sanday Karlon Rama sang University of San Carlos; Mia Embalzado-Mateo sang Saint Theresa’s College; Atty. Ian Vincent Manticajon sang University of the Philippines Cebu; Dr. Maria Teresa Asistido, STI West Negros University; Ivy Gonzales Aboy, University of Negros Occidental-Recoletos; Dr. Nieves Pepito, University sang Negros Occidental-Recoletos; Dr. Zoilo Andrada Jr. sang University of the Philippines Visayas; Zsa Zsa Bacaling sang West Visayas State University College of Communication; kag Rhoda Garzon- Campillan sang Mass Communication program sang University of St. Agustin.
Ang Cebu media icon nga si Atty. Pachico A. Seares kag Sun.Star Managing Editor Cherry Ann Lim nagpamuno sa 11 ka Visayas winners sang Globe Media Excellence Awards (GMEA) 2019.
Tatlo ka nagdalaog naka-base sa gwa sang Cebu – Bohol, Tacloban kag Iloilo City nga gin-anunsyo sa special recognition ceremonies sa Radisson Blu Cebu Hotel sa Cebu City sadtong Septiembre 19, 2019.
Ginpahayag ni Crisanto nga padayon nga ginapadunggan sang Globe Telecom ang media practitioners paagi sa GMEA, sa ikapito na nga kahigayunan paagi sa pagkilala sang excellent work sa nagkalainlain nga category.
Karon nga tuig, ang Globe Media Excellence Awards nagsunod sang digital direction kon sa diin apat ka award category para sa digital media entries ang ginkilalala.
Ang mga pasakop nga ginsumite karon nga tuig nakasandig sa apat ka sustainable focus area sang GMEA nga amo ang care for the environment, positive societal impact, care for people, kag the digital nation.
Si Mananabang Seares nga nagretiro nga Editor-in-Chief sang Sun.Star Cebu sang 2010 ang nagdumala sang nasambit nga pahayagan halin sang Noviembre 25, 1982.
Ginpili sya sang GMEA 2019 judges bilang Newsmaker of the Year. Si Lim, nagdaog sang duha ka magkatuhay nga awards – Explanatory / lnvestigative Story / Documentary of the Year for Print Award kag Editor of the Year Award.
Ang iban pa nga mga nagdaog amo ang mga masunod:
• News Report of the Year for Print – Joey Gabieta (Philippine Daily Inquirer)
• Explanatory / lnvestigative Story / Documentary of the Year for Print – Cherry Ann Lim (Sun.Star Cebu)
• News Report of the Year for Radio – Runelyn Jamolo (Radyo Pilipinas) para sa pasakop nga ginatug-uluhan “Tulong-tulong para sa Kabataan sang Bagongbong” (Ang kasubong nga estorya nabalhag man sa “Labay Man Akon” column sang Panay News)
• Breaking News of the Year for Digital – Leo Udtohan (Philippine Daily Inquirer)
• Explanatory / lnvestigative Story of the Year for Digital – Rhick Lars Vladimer Albay (Rappler Move) nga contributor man sang Panay News
• Explanatory / lnvestigative Video Story of the Year for Digital – Charry Lane Coronel kag Alex Badayos (Sun.Star Cebu)
• Photo of the Year for Digital – Alan Tangcawan (SuperBalita Cebu)
• Social Media Advocacy of the Year – Vernon Joseph Go (vernongo.com)
• Environment Story of the Year – Rhick Lars Vladimer Albay (Panay News)
• Editor of the Year – Cherry Ann Lim (Sun.Star Cebu)
• Newsmaker of the Year – Atty. Pachico A. Seares (Sun.Star Cebu)
Luyag ko lang pasalamatan ang mga tawo nga nagbulig sa panibag-o nga kadalag-an ko. (Sang 2016, ini’ng inyo alagad man ang nakakuha sang amo man nga kadungganan. Sang 2017, si Joel Franco sa amo man nga category. Liwat nadepensahan sang mga Ilonggo reporter ang ini nga kadungganan.)
Ginapasalamatan ko lang ang mga manunudlo sang BAES kag ang bilog nga komunidad sa pamuno sang hulag sang Pareja family sa pagtugyan nila sang ila estorya sa akon.
Kabay kontani nga madamo pa gid nga mga entry gikan sa mga colleagues ko diri sa Iloilo ang masumite sa masunod nga paghiwat sang GMEA, bangud sampaton sa igkasarang ang Iloilo-based media (ginkulang lang sila seguro sa panahon sa pagtipon sang ila mga sinulatan o nahimuan.)/PN
