KINAHANGLAN ta seguro sang kasuguan nga nagahatag sing grace period sa pagbayad sang aton consumption bill.
Sa eksperyensya sang madamo diri sa siyudad sang Iloilo, isa lang ka adlaw nga naatrasar ka sa pagbayad may multa ka na sing 20 porsyento sa MIWD.
May amo man nga multa sa isa ka memorial park nga nahibal-an naton. Natabuan lang nga nagmasakit ang kliyente sa balay kag indi makasulod sa upisina minultahan dayon. Puede man kadtuan sa balay ang kliyente sang ahente apang nagpadungol ini nga naghulat sa upisina sa kliyente nga nagmasakit, kag pinatungan gid sing multa ang kliyente sang indi makaulhot sa upisina.
Daw martial law ni Marcos nga wala patawad bisan may rason ka pa!
To be fair sa mga may konsiderasyon nga mga kumpaniya, ang Panay Electric Company (PECO) gahatag, sandig sa aton eksperyensya, sing allowance sa pagbayad sing atrasado sa pila ka adlaw nga wala sing multa.
Tani makita ini nga problema sang aton mapisan kag maabi-abihon nga Congressman (sang Iloilo) Toto Defensor kag Congressman (Iloilo City) Jerry Treñas agud mapasaran ini sing kasuguan.
***
NAPIERDE kita sa China sang nagligad nga engkwentro sadtong Martes, Agosto 21, sa duha gid lang ka puntos, 80-82, sa ginahiwat sa karon nga Asian Games.
In fact, abanse kita, 80-77, sa China samtang gapasulod na ang hampang sa lapit isa na lang ka minuto. Nakalagas ugaling ang China kag nagpatas ang score, 80-80. Na-foul ang China kag nakadugang sang duha ka puntos paagi sa free shots.
Nakahingagaw ang Pilipinas, paagi kay Paul Lee, agud maka-3 pointer samtang mga anom na lang ka segundos, ugaling wala makapasulod.
Nonetheless, upod kita kay Coach Yeng Guiao sa pagpati nga nagdaug kita bisan nalutos.
Ina tungod ang padaug sang Pilipinas ginbanta lang sa 20 porsyento, tungod man sa tatlo ka mataas nga player sang China nga kanday NBA player Zhou Qi (7’2”), NBA player Ding Yanyuhang (6’.7”), kag NBA draft Wang Shelin (7.0’) nga masami dungan pa nga nagahampang.
Ginadayaw man naton si Jordan Clarkson sa iya maayo gid nga hampang sadtong pagdaug sang Pilipinas kontra Kasakhstan, 96-59, sa diin namuntos siya sing husto.
Tam-an man kaayo sang hampang ni Clarkson kontra sa China, sa diin duha lang ang abanse sang China sa Pilipinas. Nag-score siya diri sing 28 bisan indi lubos ang iya hampang tungod nakapahuway siya sang magbiring ang iya tiil.
Ginadayaw ta man ang hampang sang Pilipinas, sa kabug-usan. Nangin madinalag-on ang fast play nila nga nag-confuse sang guarding sang mas dalagku nga mga Intsik. Epektibo man sila sa perimeter shots kag sa penetration.
Kon nakalusot si Pringle sa idalom sang ring, sang ang score 80-77 na pabor sa Pilipinas, nagdaug na seguro ang Pilipinas sa naulihi nga ginutlo sang hampang.
Sa nasiling ta na ugaling, nakabawi ang China kag nagpatas sa 80-80 ang score. Na-foul kag nakapuntos sing duha sa free shots. Naghingagaw si Paul Lee para sa isa ka 3-pointer apang nalugaw-an. Well, malas lang seguro.
***
Wala kita gapati nga malampasan sang Kazakhstan ang abanse sang Pilipinas nga 37 points (96-59) sa ila hampang sa China kag ang Pilipinas ang makasulod sa quarterfinals.
Sa pagdaug sang South Korea sa Group A (Group D ang Pilipinas), mangin kasumpong sang Pilipinas ang South Korea sa palaabuton nga Agosto 27.
Galaum kita nga dag-on sang Pilipinas ang South Korea sa sining hugada nga kaupod ang aton ka-Filipino nga si NBA Cavaliers Jordan Clarkson sa idalom sang isa ka coach (Yeng Guiao) nga daw NBA coach man magdala sang aton mga player.
Good luck sa aton tanan nga mga Filipino! (w_mateojr@yahoo.com/PN)
