ISA SA patimaan sang kakomitido sang MORE Power nga buligan ang syudad sang Iloilo sa iya mga plano, programa kag proyekto, ang paglunsar sang Underground Distribution System (UDS).
Nakahibalo man ang tanan kon ano ang sitwasyon sang mga nagawayway nga mga linya sang kuryente, sang telepono, kag iban pa nga ginabansagan sang iban nga mga ‘spaghetti wires’ sa tunga sang mga poste. May iban sini nga nagasambod kag may nagabugkos, apang ang malaw-ay lang kon may nagatunton ukon nagawayway nga nagatublag sa mga nagalabay sa dalan.
Isa sa kabangdanan sa mga gina-ugtasan sang mga maniniyot amo ang kabudlay sa pagpangita sang manami nga anggulo sa pag-piktyur sa dumaan nga edipisyo ukon ginatawag nga heitage building bangud nagasamulak sa manami nga view ang mga kable.
Kahibalo man ang tanan kon ano ka gasto ang ini nga lihok nga paghpid sa kable, kag ang paghimo sang kaugalingon nga linya sa idalom ukon ilubong sa duta agud ng wala na sang may magawayway nga kable gikan sa ibabaw.
Nagpangita sang paagi ang MORE Power kag ginmedyusan ang 96.4 million pesos para sa sini nga proyekto nga Underground Distribution System (UDS). Ginhiwat ang groundbreaking ceremony sadtong Martes, Mayo 30, 2023, bilang panugod sa paghatag sang katumanan sa sining madugay na nga ginahandom nga madula ang samong sa panan-awan samtang nagatulok sa mga manami nga heritage building, ilabi na sa heritage zone nga Calle Real sa bahin sang dalan J.M. Basa.
Kapin sa walo ka bulan ini nga obrahon kag tatlo ka hut-ong ang proyekto. Sa pagsugod sang proyekto, kuntani hangpon man sang mga pumuluyo, sang mga motorista kag tanan nga nagalabay sa sina nga dalan, ukon mga nagosyante sa sina nga lugar ang posible matuga nga huol. Apang, ang huol may kabaylo nga kasulhay kon matapos na ang proyekto.
Maga-umpisa ang proyekto sa bangga sang Arroyo kag J.M. Basa Streets tubtob sa Plaza Libertad kag magadulog sa bangga sang dalan Zamora.
Ginpahayag ni MORE Power president Roel Castro nga ang 96.4 million pesos nga Underground Distribution System (UDS) project sang More Electric and Power Corporation kabahin sang ila kakomitido kag suporta sa mga proyekto sang local government ilabi na ang pagpreserbar sang iya culture kag heritage.
Luyag sang More Power nga magbulig sa pag-amlig kag pagpeserbar sa dagaya nga heritage kag kultura nga makita sa mga edipisyo, sa mga monumento kag iban pa nga patimaan sang kapinasahi sang syudad sang Iloilo.
Tuman ka daku sang kantidad nga ginpain para sa sini nga proyekto kag lauman sang mga konsumidor ang pagsaka sa balayran sa kuryente bangud sa sini nga proyekto, apang minimal rate lamang.
Nagalaum kita nga indi man mangin gulpiyada ang pagsukot ukon amat-amat lang agud nga indi man mabug-atan ang aton mga konsumidor.
Mas daku ang ibalik nga benepisyo sini sa mga pumuluyo sang syudad sang Iloilo paagi sa pagdugok sang mga turista nga magakadto kag sa mga magasulod nga negosyo.
Lauman naton sa palaabuton nga wala na sang may makasangit nga trak ukon bus, wala na sang makasalawid nga nagamotorsiklo ukon nagabisikleta tungod wala na sang may magawayway nga kable.
Medyo madugay na ini nga ginaplano apang karon lang mahatagan sang katumanan tungod sang kadaku sang kantidad nga kinahanglan agud ini ang mapatuman. Kadamo sang posible ginkonsiderar antes nagpatimaan nga matigayon na gid man ang proyekto.
Kuntani, ang iban man nga kompaniya nga nagagamit ang poste kag nagasunod sa linya sang kuryente ang magbuylog man kag magpakigbahin sa sing nga katuyuan agud nga malakip ang ila linya nga mapasuhot sa idalom sang duta agud mangin matinluan na sang mga kable kag magabot na ang mga nagadupa kag kon kaisa nagahilay nga mga poste.
Kabay nga magapadayon ang ini nga proyekto sa iban pa gid nga mga prayoridad nga lugar tubtob nga malikop ang syudad sang Iloilo.
Bisan hinay-hinay lang ang pagtikang, basta nagatikang lang, makalab-ot gid sa padulungan., malab-ot gid ang ginahandom nga katuyuan.
Kabay pa nga magpadayon ang MORE Power sa pagpanguna sa mga mapuslanon nga lihok kag pagpatuman sang mga proyekto nga makabulig sa local government kag sa mga pumuluyo.
Ang MORE Power nagahatag sa tagsa ka panimalay sang iwag kag kapawa sa paglab-ot sa masanag nga bwas-damlag. (bertladera@gmail.com/PN)
