SILING sang National Economic and Development Authority (NEDA) ang P10,000 makaigo na sa pamilya nga may lima ka myembro sa sulod sang isa ka bulan.
Ambot kun sa diin nagkuha ang NEDA sang ila datus. Ginbase ini sa survey suo sa NEDA. Pero kun tan-awon sang simple kag ordinaryo nga tawo, imposible nga maigo ang amo nga budget. Siguro kun nagapuyo ka sa nabukid nga bahin sang Pilipinas nga wala sang tuhay nga galastuhan maluwas lang sa pagkaon. Kun magmasakit ka, hampulan lang sang dahon sang kahoy nga labnog, ukon bugahan sang minama ang nagbutod nga tiyan sang lapsag.
Diri sa atun sa Rehiyon 6 sa Kabisaya-an Nakatungdan ang minimum nga sweldo P323. Paano ini paiguon kun lima kamo sa pamilya? Ini nga minimum wage indi makalambot sa P10,000 nga benchmark sang NEDA sa budget isa ka pamilya.
Indi makatilingala nga madamo sang mga Filipino ang balati-anon. Kadam-an sang ila mga sakit may angut sa hypertension, kidney disorder, diabetes kag iban pa nga mga lifestyle diseases. Kun padaluman ini nga mga balati-an, ini bunga sang atun diet ukon pagkaon. Bangud sang kakulang sang budget, mas ginasapar na lang sang pamilya ang kan-on bisan dyutay ang isda.
Kuntani ang balanced nga pagkaon amo ang kan-on, isda ukon karne, utan kag prutas. Ugaling bangud sa kakulang sang budget kun kaisa kan-on na lang kag dyutay nga isda ukon utan.
Ang masakit pa kun nagaagwanta na lang sang asin ukon uga nga tuman ka alat. Problema lang kay bisan uga mahal na. Bisan gani asin mahal man.
Ang gobyerno sa Pilipinas makabig nga capitalist-centered. Nahadlok ang gobyerno nga tandugon ang mga kapitalista kun benepisyo sang mga mamumugon ang hambalan. Indi sini makabatyag ang ara sa gobyerno ilabi na sa mataas nga posisyon kay bastante ang ila sweldo. Pati plete sabat s ang gobyerno.
Kun nakita nila ang sitwasyon sang mga manunudlo kag mga police noncommissioned officers ayhan mahangpan sang gobyerno ngaa may pag-alburoto ang publiko sa ginsiling sang NEDA. Bisan gani sobra pa sa P10,000 ang basic pay sang mga manunudlo sa entry level kag police nga PO1. Indi bala ini talaksan nga dapat tamdon sang gobyerno ang mga nagasweldo sang tuman ka nubo? Hamakon mo ang sweldo sa Region 6 isa lang ka serbe sang kape sa mga dalagko nga hotel ukon bisan lang sa isa ka sikat nga kapehan.
San-o pa ayhan makasweldo ang rehiyon nga makabuhi man sang masulhay sa isa ka pamilya?
By the way naga-inspect man bala ang Department of Labor and Employment kun nagasunod ang mga negosyante diri sa rehiyon sang husto nga sweldohanay? (jpranco1975@gmail.com/PN)
