NABUYAGYAG ang pinasahi nga abilidad sang mga kapulisan sa probinsya sang Iloilo tuhoy sa mga serye sang insidente sang holdap nga nagkahinabu sang damlag lang kag ang gilayon nga pagsolbar sa sini nga mga kaso.
Una nga natublag si 4th District Board Member Rolando Distura sa asud-asud nga insidente sang pagpangholdap nga nagluntad sa iya distrito kabangdanan nga iya ginduso ang paghiwat sang committee hearing nga ginhatagan sang katumanan sang Committee on Public Order and Security nga ginapamunuan ni 2nd District Senior Board Member June Mondejar.
Ginplastar sang mga kapulisan kon ano ang sitwasyon, kon ano ang mga hitabu, kon kanday sin-o ang mga suspek kag mga biktima. Ginhatagan man nila sang update ang komitiba kon ano na ang kahimtangan sang mga kaso.
Nahibaluan nga naglab-ot sa 52 ka robbery incident ang nagluntad sa probinsya sang Iloilo umpisa January 1, 2023 tubtob September 20, 2023 suno sa report sang Iloilo Provincial Police Office (IPPO).
Ginpahayag ni PLt. Col. Raymond Celoso, Chief sang Provincial Investigation and Detection Management Unit (PIDMU) sang IPPO sa ginhiwat nga committee hearing sang Committee on Public Order and Security sadtong September 21, 2023 sa Session Hall sang Sangguniang Panlalawigan ng Iloilo nga sa 52 ka robbery incident, 13 diri ang armed robbery incident kag anum sa sini nga insidente mga Indian nationals ang biktima.
Ginsiling sini nga sa 13 ka armed robbery incident, lima ang nagluntad sa 4th District sang Iloilo. Sa sini nga 13 ka insidente, walo ang solved, duha ang cleared, kag unsolved ang nabilin.
Gintuad sini nga sa 13 ka insidente, apat lang ka indibidwal ang suspek nga taghimo sang krimen nga ila na natumod.
Samtang, sa 52 ka kabug-usan nga insidente, 37 ang solved, 10 ang cleared, kag 5 ang unsolved.
Ginpabutyag sini nga ang isa sa mga rason ukon problema sang mga imbestigador amo ang indi pagkooperar sang mga Indian nationals tungod sa kahadlok nga sila ang balikan sang mga suspek kon magpasaka sila sang kaso.
Tuhoy naman sa mga intervention sang IPPO, ginpatpat ni Celoso nga may lima ka interbensyon ang operations, intelligence, police community relations, kag investigation sections nila. Ang operations section ang maga-strategize sa mangin deployment sang kapulisan kon sa diin masami nagaluntad ang insidente kag lugar kon sa diin posible nga magaluntad ang krimen tungod nga natumod naman ang ruta sang mga suspek.
May deployment man sang kapulisan nga naka-civilian attire, nagapadulong man ang kapulisan sa kabarangayan kag nagahinun-anon, kag importante nga mapasaka ang kaso tungod nga bisan natumod na ang mga suspek apang kon wala sang warrant of arrest indi nila sila madakpan.
Gintalupangod ni PLt. Col. Raymond Celoso ang pinasahi nga abilidad ni Police Major Ken Albert Lepsia, Chief of Police sang Dumangas MPS kon paano sini napakumpisar ang mga suspek nga nagresulta sa pagsolbar sang kaso.
Ginsiling ni Celoso nga tungod sa istratehiya ni Lepsia, ang duha ka mga suspek sa serye sang robbery incident ang nagtuad kag naghatag sang impormasyon nga daku nabulig sa ila pagsolbar sa krimen.
Nagpakig-abyan si Lepsia sa mga suspek kag iya nakuha ang ila simpatiya kag pagsalig nga nangin alagyan sa pagtuad nila sang mga impormasyon.
Makita naton nga wala nagapabaya ang kapulisan sa probinsya sa pagsolbar sa mga krimen kag nagapangita sang paagi kon paano matapna ang posible nga paglutad sini.
Nangin isa ka kahigayunan ang committee hearing agud nga mapalab-ot sa komunidad sang Indian nationals ang ila pag-ugyon sa ginahimo sang kapulisan agud sila ang mapangapinan batok sa krimen.
Madamo man sang mga suhestyon nga makabig mapuslanon kag daku ang mabulig agud nga maproteksyunan ang mga Indian nationals nga nagasulod sa kabanwahan kag nagapanukot sang ila mga pautang.
Matapna lamang ang pagluntad sang krimen kon magbinuligay ang kapulisan, komunidad kag ang pumuluyo. Indi makaporma ang mga kriminal kon naga-aligmat ang tanan kag wala nagahatag sang bihang, higayon, ukon kahuyang nga mahimo ila nga pamentahaan.
Handa ang Iloilo Provincial Government nga magbulig sa kapulisan sang IPPO sa kon ano ang ila kinahanglanon. Yara man ang Sangguniang Panlalawigan nga nagapamati kag nagatalupangod sa kon ano ang kinahanglan sang IPPO agud nga mas mangin maabtik, mas epektibo kag mas makaserbisyo sing lubos ang kapulisan.
Ang kahangkilan sang mga kapulisan sang IPPO mangin mapuslanon kon may kolaborasyon sa koomunidad kag sa lokal nga pamunuan.
Importante ang pagbinuligay sang kada isa agud nga masumpong ang pagluntad sang kriminalidad.
Ang kahangkilan sang kapulisan kag kooperasyon sang komunidad makatapna sa krimen. Ipangibabaw naton ang kalinong kag katawhay sa probinsya sang Iloilo para sa padayon nga progreso. (bertladera@gmail.com/PN)
