MAATHAG nga nagahinambog ang MORE Power sa ila pagsiling nga anom ka bulan lang ang ila kinahanglan para sa transition gikan sa Panay Electric Company (PECO).
Paano natun nasiling nga naghinambog?
Ini bangud nga gusto sang Energy Regulatory Commission (ERC) duha ka tuig ang himoon transisyon agud mangin matawhay kag wala sang dako nga problema.
Makapamangkot man kita ngaa amo gid ini ka isog ang MORE Power nga mahapos lang ang ila panan-awan sa transisyon?
Nagapati sila bala nga ihatag lang sang PECO sa ila ang pasilidad sang kumpaniya nga wala sang away? Ukon may ginasaligan sila nga nagapasalig nga wala sang problema sa ila pag-take over sa PECO?
Ang ordinaryo nga mga Ilonggo wala man nagabale kun sin-o kag ano ang mangin power distributor sa syudad sang Iloilo. Ang ila nga ginabantayan amo nga pagtum-ok nila sang switch masiga ang ila suga, wala sang brownout kag kasarangan ang bili sang kuryente. Amo ini ka simple ang gusto sang mga konsumidor. Makabatyag sila nga wala ginadayaan sa ila bill kag kun may reklamo madasig ang pagsabat sang ila palamangkutanon.
Samtang wala pa nagsulod sa senaryo ang MORE Power, madamo nga mga panghuna-huna kun ano ang sistema sang pag-take-over. May nagasiling nga gamiton ang power of eminent domain ukon expropriation sa pagkuha sang poder sa PECO agud makambyo ini sa kooperatiba. Apang sang nagsulod na ang MORE Power, nadula na ang panawagan nga himuon nga kooperatiba ang power distributor sa syudad sang Iloilo.
Halos nakibot kita sang hinali naggwa ang balita nga aprobado na sa committee level ang franchise sang MORE Power. Ngaa amo gid sini ka dasig?
Subong nga approved in principle na sa Senado ang ila franchise, apang indi pa kasuguan, nagpakita na sang kakahang ang kumpaniya.
Pahanumdum lang, ang tag-iya sang MORE Power indi tumandok sang Iloilo. Wala sila sang liwan nga tuyo kundi amo lang ang pagnegosyo. Kabay nga indi lang ang handum nga pagtipon sang manggad ang ila tinutuyo kundi ang matuod nga pagserbisyo sa mga Ilonggo.
Mangin mabinantayon lang kita kay sang makaisa nagdaog na ang atun kawsa kontra sa PECO sang ginpa-refund ang overbilling sa idalum sang ERC Case No. 2001-333 nga solo nga gin-away sang Freedom From Debt Coalition sa pagpamuno ni Atty. Romeo Gerochi.
Kun nahimo ini sa PECO, indi man mabudlay nga mahimo ini sa MORE Power kun maghimo man sila sang kapaltahan kontra sa mga Ilonggo.
Ang importante lang, indi mag-HINAMBOG! (jpranco1975@gmail.com/PN)
