GINAKASUBO naton ang pagkapatay sadtong kaagahon sang Hunyo 15 sang mag-asawa nga manunudlo samtang nagatabuk sa pedestrian lane, ukon pedestrian crossing (Ped Xing), padulong sa Esplanade 1 agud mag-jogging.
Ang huros-huros nga drayber ginkilala nga si June Paul Valencia, 32, nga sunu sa balita nagabakasyon lang sa Pilipinas halin sa Estados Unidos. Nabungguan niya ang duha sakay ang isa ka Mazda MX5 sports car.
Ang iya mga biktima amo sanday Joe Marie Osano, principal sa LaPaz II Elementary School, kag ang iya asawa nga si Alnie Dinah Osano nga Master Teacher sa Ticud Elementary School sa distrito man sang LaPaz. Ginbawian sing kabuhi ang duha tungod sa malubha nga kasamaran sa ulo kag sa nagakalain-lain nga bahin sang ila lawas.
Sa sobra nga dasig sang pagpadalagan sang suspetsado, ang balita nagsiling nga naglupad gid ang maestra padulong sa pick-up tungod sa kabaskug sang impact. Nalapakan pa ang bana nga ginguyod pa sang iya salakyan pila pa ka metros despues, samtang sige ang padalagan sa pagpalagyo.
Apang nasukol ini sang drayber sang pick-up nga truck nga naglagas sa iya malapit sa atubangan sang isa ka otel dira mismo sa Diversion Road (Ninoy Aquino Avenue).
Maabtik nga gin-citizen arrest siya sang drayber sang pick-up kag gindala sa presinto sang pulis, diin ginpasakaan siya sang panumbongon nga reckless imprudence kag double homicide.
Natingala kita ugaling, upod sa pila pa sa media kon ngaa, sa kabug-at sang iya sala, naka-piyansa ini dayon sadtong Sabado mismo sa balor lang nga P60,000.
To be fair sa hwes, wala na seguro magduha-duha si judge agud tagaan sing temporary liberty paagi sa piyansa si Valencia tungod wala man sing report kuno ang pulis sing dugang pa nga impormasyon luas sa hitabo.
Sa pag-grant sang piyansa (bail), importante nga mahibal-an sang hwes ang pila ka bagay, katulad sang edad sang suspetsado, kon bala may current charges siya, ano ang criminal history niya, kag kon bala may record siya sa indi pag-appear sa korte sang ginpatawag, nga dapat mahibal-an sang imbestigador nga pulis.
Tungod sa wala konsyensya niya nga pagpadalagan tabuk sa Ped Xing, suspetso sang kaupdanan ta sa media nga basi lulong ini sa droga.
Tungod sining suspetso, naisip sang iban nga basi maka-diskubre pa ang imbestigador nga mga pulis sang dugang nga impormasyon agud indi ini mahatagan sing bail, katulad sang mabug-at nga kaso angot sa ilegal nga droga, kag sila mismo mag-recommend sini sa hwes. Apang wala.
Basi ma-justify man sang pulis ang ila bahin sa gin-file nga kaso kontra sa haras-haras nga drayber sang Mazda MX5 sports car. Wala ugaling nila ini ginpaathag gid sang tul-id sa publiko. Gani ang suspetso amo nga wala nila gintagaan sing lubos nga ihibalo ang dugang nga kinahanglan mahibal-an pa sa suspetsado.
Tungod nakagwa na gid man ang suspetsado tungod sa bail, mangamuyo na lang kita nga tani atubangon niya kag indi pagpalagyuhan ang iya kaso agud matagaan sing hustisya ang masakit nga kamatayon sang duha ka manunudlo.
***
Maathag ang pag-violar sadtong daw nagapahambog pa nga drayber sa pagpaburhot niya sang ginadala nga Mazda MX5 sports car.
Ang mga testigo nagsugid nga madasig kag wala pagbulu-balikid ang pag-overtake sini sa pick-up nga truck nga nagapadalagan malapit na sa Ped Xing, sa diin nagatabuk ang duha.
Sentido komon mismo ang matudlo sa aton nga kon malapit na sa Ped Xing, dapat amat-amat na hinay kita, labi na gid kon naga-overtake, tubtub maseguro nga wala na sing nagalabay diri nga mga pumuluyo.
Sa subong, ang tanan nga mga eskwelahan sa Iloilo City Schools Division naka-halfmast ang bandera sa pagpatimaan sang ila kasubo sa natabo sa duha nila ka manunudlo.
Nagasinggit man sila sa pagpangayo sing hustisya batok sa huros-huros nga drayber sang Mazda MX5 sports car.
Personal ta man ginapangayo ang hustisya para sa duha. Upod man diri segurado ang bug-os ta nga pumuluyo nga nagakilala sang ila pagkamapuslanon sa aton sosyedad. (w_mateojr@yahoo.com/PN)
