NAPUKAW na naman ang interes sang tanan kon paano masaway ang mga salakyan nga naga-park sa kilid sang dalan.
Nabuksan naman ang aton mga mata bangud sa hitabu kon sa diin may yara sang nadisgrasya nga nakabunggo ang ginamaneho nga salakyan sa naga-park nga dump truck sa higad sang dalan sa Barangay Sambag, Jaro sang damlag lang.
Ginbawian sang kabuhi si Je Ian Francis Latumbo, 42-anyos, sang Barangay Dungon B, Jaro.
Liwat naton nga talupangdon ang Letter of Instruction No. 43, series of 1972 nga ginpirmahan sadto ni anay Presidente Ferdinand Marcos sang Nobyembre 28, 1972 nga napatuhoy sa tiglikom sang National Defense, tiglikom sang Public Works and Communications, komisyuner sang Land Transportation Commission, komisyuner sang Bureau of Public Highways, tsirman sang Board of Transportation kag sa mga City kag Municipal Mayor.
Ginmandu ni anay Presidente Marcos, paagi sa Proclamation No. 1081, napetsahan Setyembre 21, 1972, sa tanan nga nahinambitan nga ipatuman ang pagkakas sang tanan nga sablag sa dalan, sa mga sidewalk, kag sa mga highway kaangay sa mga konstruksyon, naga-park nga salakyan kag iban pa nga pwede mahulag nga mga propyedad nga nasablag sa hilway nga paglabay.
Dapat magdihon kag magpatuman sang rasonable nga mga tikang nga nadesinyo agud may disiplina kag maduso sa pangkanug-usan ang kaluwasan sang publiko kag ang kakombenyente sa mga dalan kag highways.
Himuon ang hugot nga koordinasyon kag maghatag sang ayudad sa madasig kag epektibo nga pagpatuman sang sini nga instruksyon.
Dapat gilayon nga kakason sang mga tag-iya ukon nagamaneho ang mga salakyan nga nagatenir sa mga dalan kag highway sa kon anuman nga rason, ukon ilegal nga naka-park sa highways, mga dalan kag sidewalk.
Nasaad diri nga sa first offense dapat kakason, guyuron kag iga-impound ang salakyan sa kagastuhanan sang tag-iya ukon claimant.
Kumpiskaron ang plaka sang salakyan kag kanselahon ang certificate of registration sang tag-iya kon liwat nga nagpasaway sa ikaduha nga higayon.
Maathag nga madugay na ang kasuguan apang kulang lang sa implementasyon kag bangud sa kapabayaan sang mga may katungdanan nga ipatuman ang simple nga patakaran para sa kaluwasan sang tanan nga mapahilayo sa disgrasya.
Mahimo nga nalipatan na ang Letter of Instruction No. 43 bangud sa kadugayon. Mahimo nga wala sang ihibalo ang subong nga henerasyon tuhoy sa sini nga pagsulundan. Mahimo man nga bangud nakita nila nga pwede man lang maka-park kag wala man sang may nagadakop rason nga ila ginasunod kag ang padayon nga paghimo sini ang nangin isa ka gawi kag nangin normal na para sa tanan.
Kinahanglan sang mga ahensya sang gobyerno nga magkampanya batok sa mga naga-park sa dalan. Kinahanglan sang local government unit nga butangan sang ngipon ang pagsulundan agud nga mabatyagan sang mga nagapasaway kag agud mangin leksyon sa luyag pa magpasaway.
Kon may political will ang LGU, kon mahugod ang mga ahensya sang gobyerno sa pagkampanya batok sa mga napasaway, posible nga malikawan nga may magluntad nga kaangay sini nga aksidente sa dalan.
Kon indi seryoso ang gobyerno sa iya katungdanan, magapadayon ang mga illegal parking sa kilid sang dalan./PN
