WALA pagtahaw ang numero sang nagakalatnan bangud sa padayon nga pagpadungol sang iban nga tawo. Halog na ang pagpanagang sang iban. Ang ila maskara daw halos na nila nga kalimtan.
Sa pinakaulihi nga datus sang Department of Health 6 sa Case Bulletin Nno. 377, naglab-ot na sa 28,877 ang kabug-usan nga kaso sang nagpositibo sa COVID-19 kon sa diin 2,392 diri ang total active cases.
Kapin na sa 25,678 ang nakarekober matapos nagbalhag sang 61 ka mga bag-o nga nakarekober kag 801 naman ang napatay.
Ang syudad sang Iloilo may 5,850 ka total cases, 5,377 ang total recoveries kag may 173 ka mga napatay.
Sa bahin sang probinsya sang Iloilo, may 5,453 ka total cases, 4,951 ang total recoveries kag may 143 ka mga napatay.
Sa nakalipas nga mga panahon, ang kaso nagsaka, nagpanaog kag liwat nga nagsaka kaangay sang Ferris Wheel. Apang, sa sini nga tinion halos nagbutyog gid pasaka bangud posible nga naghalog na ang iban sa pagbantay agud nga indi malatnan sang virus.
Madamo ang nauhaw nga magtamba-tamba sa dagat ukon sa swimming pool, madamo ang nahidlaw nga magkaon sa mga restaurant kag mansig sugid sang ila sitwasyon. Madamo ang nag-alipasa nga makagwa sa ila kural kag nagpadulong sa iban nga lugar.
Wala sang problema kon nagasunod, kon conscious kag kon aware lang sa gihapon ang tanan sa pandemya nga aton ginaatubang, apang ang makatalagam bangud ang iban nalipat sa aton sitwasyon kag nangin mahuyang nga naghatag sang higayon agud nga malatayan sa paglaton sang virus.
Isa sa natalupangdan ni 1st District congresswoman Janette Garin nga ang mga nakabaton sang una nga tublok sang bakuna ang nangin kampante kag wala na nagsuksok sang ila facemask ukon maskara.
Suno kay Garin nga indi dapat magkampante kon natublukan na sang bakuna bangud indi ini gilayon makahatag sang proteksyon sa lawas ilabi na nga ang aton lawas nagakinahanglan sang supisyente nga panahon agud makahimo sang panagang batok sa COVID.
Gin-athag sini nga ang epektibo nga proteksyon naga-umpisa duha tubtub apat ka semana matapos ang ikaduha nga tublok sang bakuna.
Kaangay sa panugyan sang akon classmate/schoolmate nga si Dr. Edgar Allan Sarusad ang Pathologist sa Western Visayas Sanitarium, nga dapat mas maghalong, dapat mas magtuman sa minimum health protocol ang mga natublukan na sang bakuna. Indi gid pagkalipatan ang pagsuksok sang facemask, face shield, paghugas sang kamot gamit ang habon kag tubig ukon alcohol kag ang pagdistansya sa kada isa.
Pinakamahapos nga himuon naton amo ang pagtuman sa mga panugyan sang mga eksperto sa medisina. Ang sarang lang nga mahimo sang gobyerno amo ang pagpatuman sang lockdown. Kaangay ini sang amay nga nagapanugyan sa iya bata nga sa ila balay indi anay maggwa bangud nagabundak ang ulan bangud kon mabasa mahimo nga trangkasuhon. Apang, may mga bata nga nagapasaway, sa ulan nagasulay kag nagaresulta sa paghilanat nila.
Tandaan naton nga sa mga panahon nga may epidemya ukon pandemya, ilabi na nga wala pa sang klaro nga bulong ukon bakuna, ang epektibo nga panagang agud nga wala sang may mahul-an amo lamang ang quarantine.
Bisan ang balaan nga kasulatan nagasiling, “indi ka ayhan mapaso kon sabakon mo ang baga?” Ini man ang rason nga dapat magdistansya kita agud nga indi kita mapaso ukon masunog, kag sa konteksto sang pandemya, ini ang pamaagi agud nga indi kita mangin palaagyan sa paglaton sang virus kag pagdamo sang kaso sini.
Kuntani indi malipat ang tanan kon ngaa nakadangat kita sa sini nga sitwasyon, kuntani balikdon ang aton paghimakas nga mapunggan ang paglaton sang virus, kag agud kuntani indi kita magbatyag sang kakapoy sa paghakwat sang aton taming agud nga mapunggan ang padayon nga paglaton sang COVID-19.
Lantawa bala ang sitwasyon sa karon, ang mga face mask nagatabon sa mga sag-ang kag ang mga face shield nagatabon sa mga agtang.
Makahalam-ot man lantawon apang dapat ini nga tadlungon para sa aton proteksyon. Dapat husto ang pagpanagang agud ang paghimakas indi mauyang kag indi mabutang sa peligro ang tanan.
Ginatuman naton ang minimum health protocol indi lamang para sa aton kaugalingon, indi lamang para sa iban nga tawo kundi para sa pamilya kag bug-os nga komunidad.
Paano naton maganyat ang iban nga magtuman kon makita nila nga kita mismo ang wala man nagasunod sa patakaran?
Ehemplo paagi sa akto. Ini ang ginasunod sang mga tawo. Diri sila nagabase sa kon ano kita ka seryoso kag determinado.
Indi kita makahalin sa aton sitwasyon kon ang pagpadungol nagapadayon. (bertladera@gmail.com/PN)
