NAGAKADAPAT lang nga kondenaron ang lapnagon nga pagpalibot kag pagpapirma sang isa ka papel nga ginapahamhaman ang ginapapirma imbes nga ipaathag sang husto kon ano ang ginapirmahan.
Ini isa ka paniplang agud matigayon ang lihok sang gobyerno ni Marcos Jr. nga “people’s initiative” para sa Cha-cha (Charter change o pagligwat sang Konstitusyon).
Mismo ang Cha-cha isa ka dako nga paniplang sa pumuluyong Pilipinhon kag pagluib sa aton interes, kabuhian kag buasdamlag. Lihok ini agud ipahanugot ang pagsulod sang mga dumuluong sa mga basehan nga negosyo kag ang pagpanag-iya sini. Ginabuko nila nga dulaon ang proteksyon diri sa subong nga Konstitusyon.
Kon matabo ini, dominaron sang dumuluong ang aton ekonomya. Ang malubha nga problema sang aton kabuhian subong magalubha pa gid.
Maluwas pa, may rason kita magduda nga kabahin sang Cha-cha ang pagpalawig sang termino sang presidente kag iban nga mga mataas nga opisyal sang gobyerno. Trying hard diri si BBM bisan pa nga halos tanan nga nagligad nga mga administrasyon nagpasimpalad diri pero tanan napaslawan kay ginsikway sang pumuluyo. Dugang pa ang pagdula sang proteksyon sa aton mga kinamatarung sa pagpabutyag agud indi na kita makareklamo.
Indi Konstitusyon ang problema kon ngaa pigado ang pungsod kag ang pumuluyo. Gani indi Cha-cha ang solusyon diri.
Ang pagkagaruk kag pagkahakugan sang mga opisyal sa gobyerno kag ang kapit-tuko nga mga dinastiya ang nagadala sa pumuluyo sa kaimulon.
Ang kakulang sang suporta sa agrikultura kag lokal nga industriya, pagsalig sa importasyon kag pagpatuman sang mga dikta sang dumuluong sa ekonomya amo ang nagaguba sang aton kabuhian.
Samtang nagasulong ang kontra-pumuluyo nga hubon sang ila maiya-iyahon nga kalihukan, kinahanglan ang mabaskog naton nga pag-isa agud liwat naman nga paslawon ang ila maitum nga handum.
Ugyunan naton ang dungganon nga mga lideres kag mga organisasyon nga nagapanindugan para sa kaayuhan kag bwasdamlag naton nga pumuluyo.
Pabaskugon naton ang pagsulong sang aton mga kinamatarung.
Buyukon ta ang gobyerno nga pasulabihon ang katibawasan sang mga pigado sang sa mga kurakot nga opisyal kag dumuluong nga negosyante.
Buylugan naton ang panawagan:
Pangabuhian kag demokrasya, indi Cha-cha!
Untaton ang pagtiplang sa pumuluyo, no to Cha-cha!
Easing economic provisions does not guarantee progress!
No to term extension!
We are not for sale!
Philippines is not for sale!
Demokrasya, indi tiraniya!
Indi magpirma!
Press freedom is not for sale! – BAGONG ALYANSANG MAKABAYAN (BAYAN) PANAY <bayanpanay2014@gmail.com>
