NAGAHUYANGO ang adlaw. Nagahulat sang angay nga takna agud nga mahibaluan kon sin-o ang mga napilian sang pumuluyo sa tagsa ka pwesto nga magadumala sa gobyerno.
Nagaabot ang panahon nga mas nagaawas sa kurit ang mga kandidato bangud sa indi matakus nga handom nga mangin magmadinalag-on. Nagabutyog sila kag nagaawas sa linyada rason nga nagakomiter sang supak sa patakaran. Nagapangibabaw ang handom nga kadalag-an kag wala na nagabalikid sa iya malapakan ukon masandaran.
Mas hugot ang kampanyahanay. Mabatyagan ang pwersa nga ginapadapat sang mga kandidato kag ila lideres sa ila mga tagsakdag. May ginasiguro ang mga tawo nga yara sa ila listahan. Ginatantyar ang maagom nga boto sa ila tagsa ka lugar nga nasakupan.
Mabatian man sa kahanginan ang mga tinaga nga halos dugmukon ang ila mga kasumpong. Kon mahimo pa lang nila nga pukanon paago sa mga tinaga, ila nga himuon agud masiguro ang kadalag-an sa Mayo 13.
Lauman ang padayon nga paghaboy sang lunang sa mga kasumpong. Padayon ang pagpanagang sa mga akusasyon nga patalang kag pagpangguba sa kredito kag kandidatura.
Madata na ang pagpaniplang gamit ang social media kon sa diin ginapakita ang sample ballot sang mga kandidato lakip na ang kantidad sang kwarta nga kuno ginaapid sa sina nga balota.
Madamo sang pwede makahimo sina ilabi na kon luyag mo nga gub-on ang imo kasumpong paagi sa paglaragway sa iya nga malaut kag nagasupak sa kasuguan.
Bisan sin-o ang mahimo nga maka-imprinta sang sample ballot kag ibutang sini sa balota ang ngalan sang iya kasumpong, tuparan sang daku nga kantidad kag ipalapnag nga ang kasumpong nagapamakal sang boto.
Buluhaton ini sang desperado nga kandidato nga nagabatyag na sa karon pa lang sang iya kalutusan. Nagawaras na sila sa paghimo sang mahigko nga padugi agud nga mamantsahan ang ila kasumpong kag maganyat nila ang botante nga magsaylo sang suporta sa ila.
Mangin madata ang propaganda ilabi na sa ginatawag nga “ultima ora” ukon ang ulihi nga oras antes ang adlaw sang piniliay.
Madamo sang mga sugilanon nga patalang ang mabatian. Madamo sang senaryo nga pampatiplang ang imi masalapuan. Madamo sang tinunto nga sugilanon ang magalanog sa mga radyo.
Mangin panaming mo ang kamatuoran kag ang mga impormasyon nga una mo na nga nahibaluan. Madamo sang ideya nga magatentar sa imo agud nga maghaylo ang imo panimuot apang ang mapag-on mo nga panindugan amo ang magasagang agud nga indi ka malingkang.
Indi ka magpatiplang sa imo makita kag mabahasan sa social media nga mga peke nga impormasyon. Angay mo nga timbangon ang tanan, tungkaron ang kamatuoran antes ka maghimo sang desisyon ukon magpati sa mga nagahantal nga mga impormasyon.
Tanan kita nagahandom sang pagbag-o sa pang-gobyerno. Tanan kita luyag nga maislan na ang nagadumala nga sa aton mapatyag nakatapos na sang iya tion kag higayon.
Luyag naton nga lantawon ang sidlangan sa iya masanag nga pagbutlak sa Mayo 14, sa pagpuas sang madamol nga asu sang Mayo 13.
Indi kita magpatiplang sa mga propanda sang linta nga mga kandidato.
Lantawa, sug-alawa ang masanag nga palaabuton sang aton banwa./PN
