NAGHAKOT na sang bulawan nga medalya ang mga Filipino nga atleta sa una nga adlaw sang hinampang. Ginpakita nila ang ila ikasangkol sa hampang nga ila ginpasakupan. Masobra 20 ka bulawan ang nabalhag kag ila ginkuritan ang mga kasumpong nga mga pungsod.
Liwat nga nakatipon sang 16 ka mga bulawan nga medalya sa ikaduha nga adlaw kag naglab-ot sa 38 ka bulawan nga medalya ang opisyal nga nabalhag sa ikaduha nga adlaw sang hinampang kag mas labaw na ini sa 23 ka bulawan nga medalya nga naagom sang Pilipinas sadtong 2017 Southeast Asian Games.
Ginapatihan nga posible sa bentaha ini sang pag-host sang pungsod sa sini nga daku nga sports event kag bangud man sa kadamuon sang mga hampang kag kompetisyon nga mahimo mapasakupan. Nalakip sa SEA Games roster ang dancesport, beach handball, e-sports, kickboxing, Kurash, sambo, modern pentathlon, jiu-jitsu, underwater hockey, skateboarding, surfing, floorball, netball, obstacle race sports, kag 3×3 basketball. Bisan pa nga bag-uhan sa pila sini ka mga hampang ang mga Filipino apang nakahakot na sang madamo nga bulawan nga medalya, ilabi na sa bahin sang arnis, dancesport kag Kurash.
Indi na bag-o ang Pilipinas sa pag-host sang mga hinampang bangud sadtong tuig 1981, 1991 kag 2005 naka-host na kita.
Namutikan man nga ang karon nga 30th SEA Games ang may pinakadamo nga sports sa maragtas sang hinampang nga may kabug-usan nga 56 ka sports kag 529 ka events nga ginahampang karon sa pungsod.
Malawig pa ang inadlaw kag madamo pa ang kahigayunan nga mas makatipon pa gid sang mga bulawan nga medalya ang mga Pinoy nga atleta bangud tubtub pa sa Disyembre 11, Miyerkules, ang hinampang.
Sa nasiling na, may bentaha ang aton nga pag-host sa sini nga tuig bisan pa nga antes ang pormal nga pagbukas sang hinampang nangin malapuyot ang hinabuyanay sang isyu, masingki ang mga balatyagon, may hublasanay sa sugilanon, kag mansig palhit sang buling sa guya sang kada isa.
Apang, napamatud-an nga ang pulitika tuhay sa hinampang bangud wala nagpatublag ang mga atleta sa ila handom nga makakwa sang bulawan nga medalya. Nakahibalo na sila sa kinaiya sang aton mga pulitiko. Mahilig sa pag-agaw sang eksena ilabi na kon nagapadulong ang mga bisita.
Kahibalo ang mga atleta nga wala sang bulawan nga medalya sa diskurso sang mga pulitiko, indi makabulig sa ila paghimakas, kag makaguba lang sa ila konsentrasyon kon ila pamatian ang mga mabulakon nga mga tinaga nga nagakawas sa ila mga baba.
Luyag sang mga atleta nga magpamati sa mga tawo nga makahatag sa ila sang inspirasyon kag determinasyon. Luyag nila makita nga mabakod ang liderato kag wala nagapalingkang sa mga isyu, nagaganyat sa ila nga magpadayon sa pag-agom sang kadalag-an.
Nagsulay ang mga atleta sa kritisismo, sa pakamalaut, kag malain nga impresyon nga ginpinta sang mga kritiko sa hosting sang Pilipinas sa 30th SEA Games. Ginpamatud-an nila nga wala sang negatibo nga pamulitika ang makapugong sa ila sa pagdawhat sa ginahandom nga bulawan nga medalya.
Nangin inspirasyon man ang opening ceremony nga nagpataas pa gid sa dungog sang mga Filipino.
Sa tunga sang lunang sang pulitika, ang aton salbabida amo ang inspirasyon kag determinasyon nga makapangibabaw sa anuman nga kompetisyon. (bertladera@gmail.com/PN)
