LUYAG ta anay gali magpaabot sang maayo nga paglakat pa-gwa sa luas kay Brod Ramon Lopez, nga presidente sang Iloilo Alumni Assn. sang Sigma Rho Frasority. Mabalik anay siya kuno sa pag-ubra sa Saudi Aramco.
“See you next year,” siling pa gani niya sa akon nga nagapadumdum sang iya tuigan nga bakasyon sa trabaho.
Maayo nga pagkalat, brod, kag indi ka malipat sang souvenir para sa akon sa pagbalik mo…he-he-he!
***
SINING ulihi lang may plano sa House of Representatives agud ma-revive ang House Bill nga naga-requirer sang mga restoran kag kasubong nga mga kalan-an agud magbaton sing order halin sa kostumer para sa half-cup (tunga sa tasa) nga kan-on, nga naandan i-serve sang mga restoran.
Ang indi magtuman sini may penalidad nga PhP20,000 tubtub PhP100,000 nga multa (fine).
Para sa aton indi ini maayo nga kasuguan, kon mapatuman gid man, sa aton Demokrasya kag Hilway nga Pagnegosyo (Free Enterprise).
***
Una, tungod isa ini ka pagpakanubo sa mga imol naton nga mga kautoran kay ining ideya nagapahilom sa aton mga pigado nga dapat sila magpagutom bisan sa aton mga kalan-an.
Makahuluya ini sa publiko. Okey lang sa aton mga puluy-an, pero indi sa publiko. May sense of dignity man ang mga Filipino. Kon pyesta gani, mas madamo pa ang handa sang pila ka pigado sangsa maganit nga mga may ikasarang.
Ikaduha, indi ini kinahanglan nga kasuguan sang mga pigado. Ang mga imol, nga ang kadamuan mga trabador, in fact, deserves much more sa pagkaon sang kan-on bisan sa mga restoran.
So, wala igu ining kasuguan. Pang-insulto lang ini sa ila. Sin-o man abe sa ila ang mag-order sang half-cup nga kan-on sa daku nila nga pagpagutom sa trabaho?
Ikatatlo, sa bahin sang mas may balatyagon sa isigkapareho, ining pag-order sang half-cup nga kan-on makapadabok lang sang ila balatyagon kay gapakita ini sa ila kon ano kapigado gali ang aton mga pumuluyo. Kag… kon ano ka pobre ispiritu ang ila gobyerno sa pagpatigayon sang mabungahon nga ekonomiya sang pungsod!
Ikaapat, angot sa mauyang nga kan-on halin sa sobra nga indi makaon sa order, wala man gani problema kon may mabilin nga sobra. Ginatugtan man sang mga restoran ang mga kostumer nga magdala pauli sang ila sobra nga pagkaon nga pwede nila maka-on sa sunod nga meal time sa ila puluy-an nga lakip pa dira ang mahatag nila sa ila mga pets.
Sa bahin sang restoran, makaganar pa gani ini sa mabilin nga pagkaon sang kostumer kay may nagabakal sini, kon ibaligya man nila, nga mga nagasagud sang baboy kag kasubong nga mga hayop nga mabaligya nila sa mga pumuluyo nga makauyon magka-on sang linuto sini. In other words, no problem dira sa “rice wastage”.
Ikalima, indi naman ini problema sa mga kostumer nga may ikasarang. Wala naman kinahanglan ang mga ini agud mag-order sang half-cup rice. Sa masami gani, ang mga ini naga-order sang extra cup sang mahamot kag mahumok nga kan-on, nga ginahatag sing libre sang mga restoran nga masami kadtuan nila, upod sa manamit nga sud-an nga ila gina-order para lubos mabusog.
Kon may yara gid man luyag mag-order sang half-cup nga kan-on, exception ini sila tungod kay basi labag ini sa ila relihiyon ang magkaon sing sobra kadamo kay kasal-anan ini nga “gluttony”, ukon labag sa ila ikaayong lawas ang magkaon sang madamo, labi na gid kon gab-i agud malikawan ang bangungot.
In fact, pwede man nila ma-share ang sobra nila sa one cup sa mga kaupod ukon dalhon pauli sa ila mga puluy-an agud dira mapuslan sa puluy-an.
Ikaanom, This is a free country kag ang pag-restrict sa kon ano kadamo ang ila makaon makatublag sang kahilwayan sang tanan, kubos man ukon makasarang. “Idiotic idea” ina, kon si Pedro pa ang pahambalon nga ginahilot-hilot sang iya buy-on.
Gani, instead sang sining pagutman ang kostumer sing half-cup nga kan-on, ang dapat himuon pa gani sang gobyerno amo ang pagpasanyog sang aton produksyon sang pagkaon kag ang pag-provide sang kakulangan sini halin sa importasyon, kaugalingon nga pagsagud sang mga hayop nga mabaligya para sa merkado ukon direkta sa mga manugbakal, pagtanom sang ulutanon sa palibut, kag iban pa nga paagi.
Indi kay did-an ang aton mga pumuluyo sang bastante nga pagkaon nga deserve sang kada isa sa aton nga ang panguna nga kalan-on amo ang kan-on halin sa bugas./PN
