GINLIKOP sang kasubo ang bug-os nga banwa sang Guimbal, lakip ang bug-os nga primer distrito sa probinsya sang Iloilo sang ginpaalinton sang mga himata ang pagtaliwan sang ginakabig nga political icon nga si Mayor Oscar “Oca” Garin Gemarino, Sr. sadtong Setyembre 26, 2021 sang hapon.
Malawig ang iya pagtenir sa ospital kag iya ginpakita ang iya kaisog sa pagpakig-away sa COVID-19. Tubtub sa ulihi sini nga ginhawa, nakita ang iya pagpakigbato nga mismo ang kamatayon ang nalugaw-an kag napaslawan nga malingkang si Oca Garin.
Bangud sa iya hugot nga pagtuo sa Diyos, bangud sa iya pagkamapinangadi-on, naglaton ini sa iban nga tawo, sa mga abyan kag kakilala, sa mga nabuligan kag nagabalikid sa iya, nga magpanguna sa pagpangamuyo nga mas nagpabakod sa iya kag mas nagpatingob sa ila.
Nabuhinan ang kasubo kag kahuyang nga nabatyagan sang pamilya Garin bangud sa nagbaha nga suporta kag pagpakig-unong nga ila nabaton. Naghatag ini sang kusog agud atubangon ang masubo nga sitwasyon.
Nagtaliwan si Mayor Oca Garin, ang pisikal nga lawas lamang sini ang indi na makita apang ang iya handumanan napagkit na sa paminsaron kag tagipusoon sang kada isa, ilabi na sa mga nabuligan niya sa iya pagserbisyo sa pumuluyo kag sa iya personal nga kapasidad.
Matuod nga may akig man sa iya, apang ini ang natabunan sang kaayo nga iya ginhimo para sa pumuluyo. Mahimo nga may mga tawo lamang nga wala nakasahu sa iya pamaagi sa pagdamdig sa interes sang iya nasakupan nga pumuluyo. Ang iya mga nasakupan kag naserbisyuhan amo ang mas makabungat sang maayo sini nga hinimuan.
Sa iya pagtaliwan, mas naghugot ang paghugpong sang iya pamilya. Mas nabatyagan sang pamilya Garin ang hugot kag sensiro nga pagpalangga sang mga tawo sa ila.
Masobra 30-anyos na ang pagserbisyo ni Oca Garin sa publiko.
Antes nagsulod sa pulitika, nagtrabaho siya bilang Junior Civil Engineer, Acting Associate Engineer, kag Associate Engineer sa Department of Public Works and Highways umpisa 1969 tubtub 1973.
Nangin katapo sang House of Representatives sadtong 8th, 9th, 10th kag 12th Congress bilang representante sang First District of Iloilo kag nangin katapo sang House Contingent sa gamhanan nga Commission on Appointments.
Nangin Presidential Assistant sadtong 2005 tubtub 2006 kag administrador sang Philippine Coconut Authority sadtong 2006 tubtub 2011.
Sadtong 2014, gin-confer sa iya ang Alumni Achievement Award for Government and Public Service sa University of San Agustin nga iya Alma Mater.
Nangin Municipal Mayor sang Guimbal, Iloilo umpisa Hunyo 2016 tubtub nga nagtaliwan.
Bilang passionate advocate sang agrikultura, gintukod ni Mayor Oca ang Aambis-Owa Partylist nga sa nakalipas nga 11 ka tuig daku ang kontribusyon sa ikaayo sang mangunguma nga mga Filipino.
Madamo siya sang proyekto kag programa nga gintukod sa banwa sang Guimbal kag sa primer distrito nga amo ang nagpakilala sa ila lugar sa bug-os nga probinsya, nabantugan kag ginadayaw gid sang mga tawo gikan sa iban nga mga lugar.
Nagadulog siya sa mga tawo nga iya nakita nga dapat hatagan sang bulig. Tuman ka alwan kag handa nga magbulig sa mga nagakinahanglan.
Nagpasad man sang madamo nga negosyo sang ila pamilya.
Nagbulig man siya sa madamo nga “deserving indigent young people” nga mahatagan katumanan ang ila mga damgo paagi sa iya scholarship program sa kondisyon nga ang madinalag-on nga iskolar ang magabulig man sa isa ka deserving indigent kag nagasibu ini sa iya motto sa kabuhi nga masami niya nga ginabungat sa publiko, “Do not repay kindness, pass it on.”
Luyag niya nga ang iya mga nabuligan magbulig man sa iban ukon ipasa ang kaayuhan nga ila nabaton gikan sa iya, indi na kinahanglan nga ibalik sa iya, agud nga mas madamo ang mag-maayuhan sa ila pagpangabuhi.
Madamo sa mga nabuligan ang liwat nga nagdumdom sa iya kaayo kag nagapasalig nga ila ipadayon ang legasiya ni Mayor Oca Garin.
Matuod gid man, kon ibalik sa iya ang kaayo, magadulog ina dira sa iya, apang kon ipakigbahin naman sa iban mas magadamo ang magaayuhan sa ila pangabuhi. Mas praktikal kag reyalistiko ini nga sahi sang istratehiya nga iya ginsuguran. Kaangay ini sang people empowerment, hatagan sang ikasarang ang isa ka tawo paagi sa pagbulig sa iya agud nga may ikasarang man siya nga magbulig sa iban pa.
Si Mayor Oca ang indi malimtan kag ang iya handumanan ang magapabilin sa mga tawo nga nahatagan niya sang inspirasyon, sa mga kabuhi nga iya naimprubar kag sa mga tagipusoon nga iya natandog.
Ang pagtaliwan ni Mayor Oca ang daku nga kadulaan, indi lamang sa iya pamilya kag abyan kundi lakip man sa Municipality of Guimbal, sa First District kag Province of Iloilo sa pangkabug-usan.
Kaangot sini, ginduso ni 4th District Board Member Domingo Oso, Jr. sa 109th Regular Session sang 13th Sangguniang Panlalawigan ng Iloilo ang resolution nga nagapahayag sang simpatiya kag pagpakig-unong sa nalisdan nga pamilya sang nagtaliwan nga si Honorable Mayor Oscar “Oca” Garin, Sr. sang Guimbal, Iloilo.
Gin-aprubahan unanimously ang resolution kon sa diin bug-os nga katapo sang 13th Iloilo SP ang nag-sponsor sa sini nga resolution nga may tigulo “Resolution Expressing the Deepest Sympathies and Heartfelt Condolences of the Sangguniang Panlalawigan, on Behalf of the Province of Iloilo, to the Bereaved Family of Honorable Mayor Oscar “Oca” Gemarino Garin, Sr. of Guimbal, Iloilo”.
Magapabilin ang legasiya ni Mayor Oca Garin. Ipadayon ini ni Former Congressman kag Mayor Richard Garin ang nasuguran sang iya amay, upod sa iya iloy nga si San Joaquin Mayor Ninfa Garin, kag mga utod nga sanday Aambis-Owa Partylist Representative Sharon Garin, newly installed Guimbal Mayor Jennifer Garin Colada, kag Vice Governor Christine “Tingting” Garin.
Magapabilin sa tagsa naton ka paminsaron kag tagipusoon ang tinaga kag legasiya ni Mayor Oca Garin nga ‘Do not only repay kindness, pass it on.” (bertladera@gmail.com/PN)
