LIWAT na naman nga gintay-og ang Philippine National Poluce Academy sang iskandalo seksyal nga nagluntad sa tunga sang tatlo ka upperclassmen kag sang duha ka mga bag-unahon nga mga kadete.
Ginkakas na sa pwesto si Philippine National Police Academy (PNPA) director Chief Superintendent Joseph Adnol agud nga hatagan sang ligwa ang imbestigasyon sa mga imbolbado nga kadete.
Kon aton lantawon ang ini nga senaryo, nagaluntad ini indi lang sa PNPA kundi bisan Philippine Military Academy. May mga reklamo nga indi makadangat sa natungdan nga mga opisyal bangud sa kahadlok sang kadete nga dalukan siya sang higayon nga makatapos sa iya paghanas sa sulod sang kampo.
May mga reklamo nga ginapangisugan sang mga biktima nga makalaba-ot sa matag-as nga opisyal kag makakwa sang atensyon sang publiko kag gilayon nga mahatagan sang angay nga akto.
May mga iskandalo seksyal nga nagaluntad sa tunga sang babaye kag lalaki kag sa tunga sang lalaki kag lalaki nga sa masami ang biktima amo ang yara sa idalom sang hiyarkiya samtang ang mga nagapangbiktima amo yadtong yara sa poder, may posisyon kag ginakahadlukan sang mga biktima.
Madamo man sang kaangay sini nga iskandalo ang nagaluntad bisan sa diin man nga akademiya sang militar sa bug-os nga kalibutan. May mga report man sadto gikan sa China, sa South Korea, sa Japan kag bisan sa Amerika.
Halimbawa diri ang natabu nga oral sex scandal sa tunga sang 30-anyos nga babaye nga guidance counselor kag sa biktima nga 16-anyos nga lalaki nga kadete sadtong Disyembre 4, 2011 sa Valley Forge Military Academy.
Sadtong tuig 2011, sa Australian Defence Force Academy, nagreklamo man ang babaye nga kadete bangud apisar nga may pahanugot siya sa pagpakighilawas nila sang lalaki nga kadete, apang wala sini naluyagan nga likom nga ginbidyuhan sang lalaki ang ila pagpakighilawas kag pagkatapos sini ginpadala sang lalaki ang bidyu sa anum ka abyan sini nga lalaki paagi sa Skype kag naglapta ang ila nga bidyu.
Ginreklamo man ang suldado sa US Military Academy sang West Point sadtong Mayo 2013 bangud sa sikreto sini nga pagkwa sang larawan sang mga hublas nga babaye nga mga kadete.
Ginreport man sang Pentagon nga ang ila tropa may yara sang 26,000 ka kaso sang unwanted sexual contact sadtong 2012 ukon may pasaka sa 35 porsyento.
Lakip man nga sa Naval Academy sa Annapolis sang US Military Academy sa West Point, may mga kaangay man nga reklamo sang iskandalo sekswal kag sa bahin sang Air Force Academy may 56 ka kaso sag sexual misconduct umpisa pa sadtong 1993 ukon may average nga 5.6 per year.
Pila lamang ini sa mga sitwasyon kag nabalhag nga reklamo angot sa iskandalo sekswal nga nagatay-og sa mga kampo sang militar kag pulis ukon sa ila mga akademiya.
Indi na kita matingala bangud bisan sila unipormado apang sa idalom sang uniporme amo ang ila matuod nga pagkatawo. Kangay man ini sa mga nagasuksok sang abito nga gintublag man sang iskandalo.
Dapat aktuhan kag indi paghingabunan ang iskandalo seksyal sa mga kampo. (bertladera@gmail.com/PN)
