ANG PAMBANSANG Lakas ng Mamalakaya – Panay ukon PAMALAKAYA-Panay mabaskog nga nagakundenar traidor kag imoral nga tikang sang rehimen ni Marcos Jr. paagi sa People’s Initiative nga ginapatigayon sini. Paagi sini, igaduso ang pagligwat sang 1987 nga Konstitusyon. Ang ini nga tikang ang nagabalewala sang kahimtangan sang pumuluyo nga yara sa tunga sang malala nga sistema pang-ekonomiya kag lapnagon nga kaimulon.
Nagatuyo ini nga palawigon ang poder ni Marcos Jr. kag iya nga mga alipores kag ikonsentrar ang tanan nga gahum sa kay Marcos Jr. sa idalom sang hapin sang pagbaylo sa porma sang panggubyerno halin sa presidential padulong sa isa parliamentaryo nga sistema nga kapareho sa pagpaniplang sang iya amay kag diktador nga si Ferdinand Marcos Sr. sadtong 1972-1973. Sa malawig na nga tinion, ang mga nagligad nga mga rehimen ang may dako nga pagtinguha ngadulaon ang mga upang sa ila gahum bilang presidente.
Ibaligya sini ang pungsudnon nga patrimonya sa nawong sang pagligwat sang mga probisyon pang-ekonomiya nga nagadula sang limitasyon sa dumuluong nga pagpanag-iya sang duta kag negosyo nga athag kaayo nga pagbayolar sa pungsudnon nga soberanya sang pumuluyong Pilipinhon.
Dugang pa, ang ini nga katuyuan sang Charter Change (Cha-Cha) ang dako nga pabor sa mga dumuluong nga korporasyon sa pagpangisda nga padayon nga patuyangan kag suyupon ang aton dunang manggad sa kadagatan samtang padayon nga mapalayas ang aton mga mangingisda sa ila palangabuhian.
Mahimo nga pagagamiton ini agod kakason ang probisyon nga naga dumili sa mga dumuluong nga base military, tropa militar, ila mga armas kag “weapons of mass destruction” sa teritoryo Pilipinas. Maathag pa sa siga sang adlaw nga nagasunod ang Marcos Jr. sa mandu sang US agod labi nga palaparon ang kusog militar sini sa sulod sang pungsod kag sa kabug-usan sang Asya–Pasipiko batok sa karibal sini nga China.
Gane ang PAMALAKAYA-Panay kaupod ang iya mga chapters sa bug-os nga isla sang Panay ang mabaskog nga nagapanawagan sang iban pa nga mga sektor, institusyon kag organisasyon nga updan ang pagbuyagyag sang maitom nga buko sang rehimen ni Marcos Jr. kag pamatukan ang iya nga ginaduso nga Charter Change. – MELBERT BALBON, PAMALAKAYA-Panay spokesperson <pamalakayapanay.mangingisda@gmail.com>
