ANG Sangguniang Kabataan (SK) kuno dapat independent, apolitical. Buot hambalon, wala ginahilabtan sang politiko kag wala sila sang political affiliation.
Pero ano ining nagakatabu? May mga impormasyon nga ang kampo ni Cong. Jerry Treñas nagatipon sang mga SK chairpersons agud iduso ang iya kandidato sa SK federation election?
Nabuyagyag ang pagkakabalan sang mga politiko sang nagreklamo ang isa ka SK chairman sa La Paz nga gintipon sang isa ka tawo nga identified kay Treñas ang mga SK chairpersons agud magpili sang ila district federation officials. Ang malain pa kay ang isa ka SK Chairperson gin-akusahan pa nga sa pihak nga kampo. Hugot ugaling ang pagpanginwala ni anay ICUPAO head Roy Firmeza nga may politika sa ila pagtililipon.
Apang dali lang, ano ining panyapon sa lugar ni Punong Barangay Maria Irene Ong nga nagtipon man ang mga SK chairpersons kag nagpamulong-pulong didto si Treñas? Intensyonal pa nga wala naggamit sang public address agud indi sila mabati-an sa ila ginapanghambal sa gwa sang venue. May ginpanagtag pa nga sample ballot nga may paaman nga isa ka libo ka pesos.
Wala pa kita sang nabati-an sa bahin sang Jaro, Molo, Arevalo, Mandurriao, kag Lapuz. Base wala na lang nadayun kay nabukig na.
Ano naman ining siling nga ang sa pihaka nga kampo (Mayor Joe III) may pagtililipon man sa Unle Tom’s?
Ay teh ano na lang ini? Pakabal na lang kamo ya mga pulitiko agud maduso ang agenda nyo?
Kabalan na gid ang atun nga politiko partikular na diri sa syudad sang Iloilo. Nahibaluan naman nila nga non-partisan ang SK pero entrahan gid. Ayhan sa tunga sini nga kontrobersiya, ipasa ta ang bola sa mga kabataan. Indi kamo magpadala sa inggat sang kwarta agud magboto.
Indi lang man SK ang ginapahilabtan. Bisan ang mga kapitan ginaentrahan man sang mga politiko. Damol-damol na gid ang ila guya.
Bantayan natun karon nga adlaw (Martes) kun sin-o ang manghin SK federation president. Diri mahibaluan kun sin-o ang may clout sa mga kabataan. Kag mahimo ini mangin talaksan kun sin-o ang mas maimpluwensya sa barangay. (jpranco1975@gmail.com/PN)
