Kadalag-an sang Filipinas ang kadalag-an ni Rabiya

GINAPAUNA naton ang pagpangamuyo, upod sa aton kauturan nga mga Filipino, ang kadalag-an ni Miss Rabiya sa Miss Universe Pageant nga hiwaton sa Mayo 16.

Tani indi kita malugaw-an katulad sang luyag matabo sang pila ka sup-sup bangongon nga naga-enjoy sang ila kademonyohan batok kay Miss Rabiya.

Mas importante sa karon ang kadalag-an sang Demokrasya sangsa aton personal nga sentimiento.

Labi na gid kay ginaukudan ta pa ang pagpasanyog sang Demokrasya nga gindaug naton batok sa kamot nga salsalon sang martial law ni anay Presidente Marcos.

Tungod sini, sikwali ang gawi nga diniktador sang iban sa aton nga indi makabaton sing kritisismo kag daw luyag pa nila busalan ang  pagpautwas sang iban sang ila baba paagi sang masakit nga sugilanon kag pamahog agud mapahipos sila.

Sa aton Demokrasya, nga gindaug naton sugod sadtong 1986, kinamatarong ina, por ejemplo, ni Presidente Duterte ang magpati nga “unfit” ang isa ka babaye agud magpangulo sang pungsod.

Pero kinamatarong man ina sang mga kababaenhan, katulad ni Miss Rabiya nga aton Miss Universe Philippines, kag bisan pa sang madamo man nga kalalakehan, sa pagpati nga may igual ng kinamatarong kag ikasarang man ang mga babaye agud mag-uyat sing mataas nga posisyon sa sosyedad lakip na sang iya sang presidente.

Indi kay pakamalauton si Miss Rabiya sang pila ka chochowa ni Presidente kag himu-himuan sing malaw-ay nga istorya nga makapanubo sang iya personalidad samtang nagahimos ini sa pagpasimpalad, sa ngalan sang mga Filipino, sa Miss Universe Pageant sa palaabuton nga Mayo 16.

Pwede ina iya masabat ni Presidente ang kritisismo sa iya pagpati sa matarong nga paagi nga indi kinahanglan pakamalauton pa si Miss Rabiya.

Salamat lang kay wala ini makalingkang sa “peace of mind” ni Miss Rabiya kag ginaatubang lang ining mga paglibak sa iya sing may kaugdang kag taas-noo.

In fact, ginadayaw naton ang kaisug ni Rabiya sa iya pagsupak sa pagpati ni Presidente Duterte nga “unfit” mangin presidente ang isa ka babaye.

Indi lang tungod kapanahunan na ini sang “Women Power”, kundi tungod sa pagpakita man sang iya personal nga karakter sa pagpanguna sing may kaisug ang maayo nga mga kawsa katulad sang iya sang mga kababaehan.

Ini nga personalidad nagapamatuod pa gani nga bagay siya mangin Miss Universe 2021 (kon palaron) nga dala ang tatak sang maisug nga panindugan pabor sa mga kababaehan nga katulad niya.

In fact, sa panahon karon, mas kinahanglanon naton ang liderato nga maki-iloy nga may balatyagon samtang wala naman gina-spoil ang binatasan sang iya mga anak, ukon liderato nga “firm but kind”, sa pagdala sang panimalay sang pungsod.

Indi ang kapintas kag wala balatyagon nga liderato, nga ginakangil-aran naton mabasahan sa mga pinanid sang  kasaysayan sang kalibutan.

Katulad sang liderato sang mga mapintas kag wala kaluoy nga liderato ni Hitler sang Gemany,  Joseph Stalin sang Rusya, Idi Amin sang Uganda, Augusto Pinochet sang Chile, kag iban pa.

Samtang isa lang ang nahibal-an ko nga mapintas kag wala kaluoy nga lider nga babaye – si Queen “Bloody” Mary sang England nga ginpugutan sang ulo sang mahusgaran na ang iya kalain.

Samtang, indi man malikom ang pagsuporta sang mga pumuluyo sa pila ka mga lideres sa kalibutan nga mga babaye sa ila tumalagsahon nga liderato katulad nanday The Marshall Islands President Hilda Heine, New Zealand Prime Minister Jacinda Ardern, Namibia Prime Minister Saara Kuugongelwa-Amadhila;

Nepal President Bidhya Devi Bhandari, Estonia President Kersti Kaljulaid, Germany Chancellor Angela Merkel, Croatia President Kolinda Grabar-Kitarovic, Norway Prime Minister Erna Solberg,Taiwan President Tsai Ing-wen;

Ethiopia President Sahle-Work Zewde, Bangladesh Prime Minister Sheikh Hasina,

United Kingdom Prime Minister Theresa May, kag Lithuania President Dalia Grybauskaite.

Syempre indi ta man dapat kalimtan si Presidente Cory Aquino nga nagpanguna sa pagtumba sang mapintas nga martial law regime ni Marcos. Lakip na dira ang pagpatigayon sang bag-o nga Konstitusyon nga nagpabalik sang Demokrasya sa pungsod, comprehsnive land reform, reforma sa military establishment, kag madamo pa.

Indi ta man dapat kalimtan si President Gloria Arroyo, ang iloy sang Pantawid Pamilyang Pilipino Program (4Ps) sa Filipinas nga nagahatag sing paglaum sa madamo nga pigado naton nga mga pumuluyo.

GOOD LUCK MISS RABIYA!/PN