KAPIN sa 2.85 billion ang aktibo nga nagagamit sang Facebook kada bulan suno sa sa datus sang statista.com, kutob sa first quarter sang tuig 2021. Pinakadaku nga social network sa bug-os nga kalibutan ang Facebook.
Sadtong third quarter sang tuig 2012, ang kadamuon sang aktibo nga nagagamit sang Facebook naglapas sa isa ka bilyon, kag nangin una nga social network nga nakahimo sini.
Ang active users amo yadtong mga nag-log sa Facebook sa nakalipas nga 30 ka adlaw. Sadtong first quarter sang 2021, ang kompaniya nagsiling nga 3.45 billion ka tawo ang nagagamit sang bisan isa sa core products nila sa kada bulan. Ang core products amo ang Facebook, WhatsApp, Instagram, ukon Messenger.
May yara sang 320 million ka Facebook users sa India lamang kag ini ang pungsod nga nagapanguna sa Facebook audience size.
Yari ang mga nagapanguna nga mga pungsod base sa Facebook audience size kutob sang Enero 2021, kon sa diin ang India may 320 million, United States nga may 190 million, Indonesia nga may 140 million, Brazil nga may 130 million, Mexico nga may 93 million, ika-anum ang Philippines nga may 83 million, Vietnam nga may 68 million, Thailand nga may 51 million, Egypt nga may 45 million, Bangladesh nga may 41 million, Pakistan nga may 40 million, United Kingdom nga may 38 million, Turkey nga may 38, Colombia nga may 36 million, France nga may 33 million, Argentina nga may 31 million, Italy nga may 31 million, Germany nga may 29 million, Nigeria nga may 29 million kag Myanmar nga may 27 million nga Facebook audience size.
Kutob sang Enero 2020, natukiban nga 98 percent sang active users naga-access sang ila Facebook account gikan sa ila mobile devices. Pamatuod diri, kapin sa 80 percent sang Facebook audiences sa bug-os nga kalibutan ang naga-access sa platform paagi lamang sa mobile phone.
Pinakabantog nga social network sa bug-os nga kalibutan ang Facebook kutob sang Enero 2021 nga may pinakadamo nga active users. Yari ang mga social networks kag kadamuon sang ila active users: Facebook nga may 2.850 billion, YouTube nga may 2.291 billion, WhatsApp nga my 2.000 billion, Messenger nga may 1.300 billion, Instagram nga may 1.221 billion, Weixin/WeChat nga may 1.213 billion, TikTok nga may 689 million, QQ nga may 617 million, Douyin nga may 600 million, Sina Weibo nga may 511 million, Telegram nga may 500 million, Snapchat nga may 498 million, Kuaishou nga may 481 million, Pinterest nga may 442 million, Reddit nga may 430 million,Twitter nga may 353 million kag Quora nga may 300 million active users.
Ang mga nagapanguna nga social networks ang masami available sa multiple languages kag ang users makakonekta sa ila mga abyan ukon mga tawo sa iban nga bahin sang kalibutan ukon across geographical, political, or economic borders.
Ginabulubanta nga yara na sa 3.6 billion ang nagagamit sang social networking sites kag ginalauman nga magamuad pa gid samtang nagadamo ang nagagamit sang mobile device kag ang mobile social networks mas magasulod pa gid sa mga wala pa naserbihan sang ila mga serbisyo.
Kapin na sa 110.3 million ang populasyon sang Pilipinas kutob Enero 2021. Nadugangan ini sang 1.5 million ukon 1.3 percent sa tunga sang Enero 2020 kag Enero 2021 suno sa datareportal.com kon sa diin 49.8% ang babaye kag 50.2% sang populasyon ang lalaki.
Sa sini nga populasyon, 47.6% ang nagapuyo sa urban centers samtang 52.4% naman sa rural areas.
Naglab-ot na sa 73.91 million ang internet users sa Pilipinas kutob sang Enero 2021, kon sa diin nadugangan ini sang 4.2 million ukon 6.1 percent sa tunga sang tuig 2020 kag tuig 2021. Ang internet penetration sa Pilipinas yara sa 67.0% kutob sang Enero 2021.
Sa bahin sang social media statistics, may yara sang 89.00 million social media users sa Philippines kutob sang Enero 2021, kon sa diin nadugangan ini sang 16 million ukon 22% sa tunga sang tuig 2020 kag tuig 2021.
Ang kadamuon sang social media users sa Pilipinas ang equivalent sa 80.7% sang kabug-usan nga populasyon kutob sang Enero 2021.
Sa bahin sang mobile connections sa Pilipinas, kapin na sa 152.4 million kutob sang Enero 2021, kag nagnubo ini sang 15 million ukon 8.9 percent sa tunga sang Enero 2020 kag Enero 2021. Ang kadamuon sang mobile connections sa Pilipinas kutob sang Enero 2021 ang equivalent sa 138.2% sang kabug-usan nga populasyon.
Ginapresentar naton ini agud makita naton ang kabug-usan nga larawan sang social network kon sa diin kita kabahin.
Halos tanan nga oras naton ang napain sa paggamit sang social media, bata man ukon tigulan. Halos tanan nga nagauyat sang cellphone sa Pilipinas ang may Facebook account kag iban pa nga mga account.
Bisan ang aton mainstream media ang may daku na nga bahin sa social network. Diri na halos makita ang tanan nga balita kag impormasyon. Nakatipon kag padayon ang ila pagtipon sang mga sang sumulunod sa social media.
Halos tanan nga mainstream media may yara gid sang unay nga social media account. Luyag nila nga magsangkad pa gid ang ila audience kag mas madamo ang makahibalo sa impormasyon nga ila ginapalapnag.
Indi na kita matingala kon mas magadamo pa gid ang magagamit sang social network ilabi na sa sini nga panahon sang pandemya ukon samtang gina-quarantine ang mga pumuluyo.
Kalabanan sang transakyon ang yara na sa online kag ang social network isa lang sa mga instrumento agud mapahapos ang paghulag sang tawo.
Gamiton lang naton sa husto nga paagi ang social network. Indi pag-abusaran kag gamiton sa kalautan ukon kahul-anan sang iban. (bertladera@gmail.com/PN)
