BY ROBERTO ‘BERT’ LADERA
KOMBINADO nga emosyon ang namulalungan sa dagway sang mga Ilonggo sang ila nakumpirmar nga nakapauli na sa pungsod si anay Mayor Jed Patrick Mabilog.
Masiling nga kombinado nga emosyon tungod nga may yara sang nahidlaw, nagakahangawa, kag nagakabalaka sa iya kahimtangan matapos nga nagpabilin sa luwas sang pungsod sa sulod sang pito ka tuig para sa iya seguridad kag sang iya nga pamilya.
Sa tunga sang iya kahadlok sa ginapangatubang nga sitwasyon, nagpangibabaw ang iya kaisog nga atubangon ang nagliligad kag tulukon ang masanag nga palaabuton. Gindesisyunan sini nga makapauli sa pungsod sa bulig sang mga abyan nga naga-ulikid sa iya, ilabi na si Congresswoman Jamjam Baronda.
Ang pumuluyo sang syudad sang Iloilo, ilabi na ang mga empleyado sang Iloilo City Hall nga nagavatyag sang kahidlaw sa iya ang nalipay gid sang nagbisita siya sa city hall kag liwat nga nagpanumbalik sa ila pang-ino-ino ang sahi sang pagdumala nga iya ginpakita sadto nga mo man ang nagmitsa sa mainit nga pag-abi-abi sa iya sang mga empleyado.
Kaangay lang nga nakakita sila sang paglaum nga ang ila gina-agwanta nga sitwasyon mahatagan sang kasulhay, mangin tuhay kaysa sa karon kag bisan sa makadali ang ila katagam, ang ila kahangawa kag ila kahadlok nga masing-alan ang napanas bangud sa presensya ni Mabilog.
Bisan pa nga nakahibalo ang mga empleyado sang posibilidad nga mapiktyuran sila ukon may nagabantay sa ila hulag apang ila nga ginasulay ang kahadlok agud lamang nga mabulong ang ila kahidlaw.
Kon nangisog si Mabilog kag nagpangibabaw sa ila kahadlok lamang nga mabulong ang iya kahidlaw sa iya pumuluyo, ayhan pa ang mga Ilonggo nga indi maninguha nga maumpawan sa kahidlaw nga ila nabatyagan?
Makita ang mainit nga pag-abi-abi kay Mabilog sadtong Biernes, Setyembre 20, sa Iloilo Sports Complex, sa ginhiwat nga DOLE-TUPAD Orientation sang masobra 7,300 ka mga benepisyaryo.
Kaangay lang nga daw ginbuy-an sa hawla ang pispis nga hilway nga naglupad, nagbutyog, kag naghalok sa guya sang langit.
Indi matago, indi mapeke, indi mapakuno-kuno ang sungaw sang balatyagon sang pumuluyo nga nahidlaw sa presensya ni Mabilog. Kaangay sang sonata nga nagduyan sa ila dulunggan ang tingog kag pag-amba ni Mabilog.
Liwat nga nakakita ang paglaum ang mga pumuluyo sang syudad sang Iloilo. Liwat sila nga nagahandom nga mangin malapit sa ila ang gobyerno sang syudad sang Iloilo.
Indi malipod, bilang tawo lamang, nga nagabatyag sang kakapoy, kakulangan, kapaslawan kag kaakig ang sin-o man sa aton.
Kaangay kay anay Mayor Jed Patrick Mabilog, kahibalo man ako kon paano siya maakig, kon ano ang iya personalidad bangud sa kadugayon sang panahon nga nakaupod ko siya bilang katapo sang media kag bilang naga-cover sang balita sa Iloilo City Hall.
Indi madumot si Mabilog. Kon akig siya, ginapautwas niya. Kag mas maayo na makapasungaw siya ang iya kaakig tungod pagkatapos sina, balewala na ina sa iya. Liwaton ko, indi madumot si Mabilog. Mabinuligon kag bukas ang puluy-an kag talatapan ni Mabilog sa tanan nga pumuluyo sang syudad.
Nahidlaw man ang pumuluyo nga makakita sang alkalde nga nagalibot sa ila barangay. Nahidlaw sila nga may alkalde nga nagapangumusta sa ila kag sa ila sitwasyon ukon kahimtangan. Nahidlaw ang mga pumuluyo nga mabatyagan ang presensya sang alkalde sa iya luyo.
Indi gusto sang pumuluyo nga makita ang ila lider nga yara sa ila barangay bangud may gina-akigan. Indi nila gusto nga may lider nga masami nagapamuyayaw kag nagapamahog.
Makahilidlaw para sa pumuluyo nga may alkalde nga nagaugyon sa ila kasadyahan kag naga-unong sa ila kasubo.
Sa nakalipas nga pito ka tuig, wala sang iban nga paaliwansan ang mga pumuluyo. Pilit sila nga nagakupo sa siit bangud wala sang palapilian nga mas maayo pa sa ila ginaagwanta nga sitwasyon. Nakaposas ang ila higayon.
Karon nga nagatamwa ang kapawa nga may dala nga paglaum. Mabatyagan na ang pagpangisog sang pumuluyo nga atubangon ang sirkumstansya lamang nga magbag-o ang ila kahimtangan.
Makabig nga isa ka inspirasyon para sa mga Ilonggo ang ginhimo ni anay Mayor Jed Patrick Mabilog. Maathag nga indi pagpanalaw ang pagpalayo sa klaro nga risgo kon naga-ulikid ka sa imo pamilya kag pinalangga nga banwa.
Ang iya pagpalayo sa sulod sang pito ka tuig naghatag sa iya sang realisasyon sa kabuhi. Mas maathag na sa iya panulok kon ano ang duga kag dagway sang mga tawo nga nagpalibot sa iya.
Husto si Mayor Jed Patrick Mabilog. Kon atubangon mo ang imo kahadlok, mabulong mo ang imo kahidlaw. (bertladera@gmail.com/PN)
